Read Chang Naga LUK 18 Bible Online

LUK 18 - Chang Naga bible

LUK 18

¹Haoei haoen to athakko welaulabü hoba ladangkei hau athetlabü shangabü ngüh- phatbü che lenkei.

²Haoei laukei, “Sangnyu chenei matjembü che kikei, haoei Mühghaü to ühüt hoba ao mütlakei soumo aku.

³Kho sangnyua latnyu che kikei, hoba sao hao jungto hai lauko loutang lekei, ‘Kü dangbou khulimbo kü la mat jembushi.’

⁴Longcheje haoei tokngaikei, lausikei kho phaia haoei hao lolo laukei, ‘Ngei Mühghaü to ühütsikei hoba müt la soumo akusikei,

⁵ho latnyuei ngo khonsaktidabü ngei sao mat jembulabü.’ ”

⁶Jisuei laukei, “Asaopobü matjembouei ai laudaje ditashi.

⁷Kholongaje Mühghaüei, chalou nangnak alauko ngekbü haoeibü pienbü shuong la ngühmaia mat ajembulep lo? Haoen to thuila hao kit khaiakei si?

⁸Ngei kan la lenda, haoei haoen pü lekuko tongde mat jembulabü. Lausikei, ladang Müteibü Shou loulaje kheijinei haoei kaodaka mailem haplep sai?”

⁹Müt atei jembü saopobüa maang leman lubü shuongje pendou nyikuko jungeikei, khoei khübü to haoei tokei ho ngüh- phatbü lenkei:

¹⁰“Müt nyi lembü- chem to welaula angkei, che kho Farisibü hoba lubü che kho khüm hebou.

¹¹Farisibou kho loan jembü lolo hai welaukei, ‘O Mühghaü, ngo lubü mütshuong tegü, aeilam aeiphopbü, maangalanbü, asang- alanbü ayingsi ho khüm hebou tegü ongkei ayingbü shanga ngei ka nyen sangda.

¹²Ngei bale chenei nyinei mühei nyengda, ngei hapbü pendou ka an phejan kuda.’

¹³Lausikei khüm hebou heebüa lokei. Haoei khuthük ae chühangtila ongkei maang üang, lausikei haoeibü khüklang to jangngailangko laukei, ‘O Mühghaü, ngo shabü müt to onoukai.’

¹⁴Ngei kan la lenda, che khütoje ho Mühghaü thedanga janbü hapan haoeibü chem to yankei; aishanga aoei jembü lolo tonenlaje hao hanlabü, lausikei aoei jembü lolo handa hao tonenlabü.”

¹⁵Hao la meititila shanga mütshuongei nashou hanbü shuong to luko hao jungto leibako kikei; lausikei ladang eikshuongei kho hapbei, haoenei khübü leibabü shuong to hakkei.

¹⁶Lausikei Jisuei nashousi shuong leibala shanga haoen ngakei hoba laukei, “Nashousi shuong kü jungto loutiashi. Haoen teshilet, aishanga Mühghaü Sangle kho haoen tegübü shangabü ki.

¹⁷Maimaitham ngühmaia ngei kan to lenda, aoyouei Mühghaü Sangle nashou hanbü che tegü asungletlaje haoei khüto üetenlabü.”

¹⁸Jihudabü leiyeibü cheei hao to phekei, “Lenbou maibou, pon- pen langkei hapla shanga ngei ai kümla?”

¹⁹Jisuei hao to jongaikei, “Nyi aila kü to maibou dogo ngada? Mühghaü to limanje aokei maibü aki.

²⁰Nyi ngühkhüm shuong ngeakei: Asangalanbü teshon, Tehaiti, Tekok, Amlangbü ngühchung teku.”

²¹Müt khoei jongaikei, “Ngei khübü pendou kho ngo nashoua thama jungeia.”

²²Ladang Jisuei kho ditkei haoei hao to laukei, “No tokei cheei aonkei; nyi kibü pendou yakashi hoba nam kho shalebü shuong la jankuashi, hoba nyi khuthüka nyaksinam kilabü; hoba kaiya hoba kü phai semshi.”

²³Lausikei haoei kho ladang ditkei hao aeibou maangto shatkei, aishanga hao aeibou keian kikei.

²⁴Jisuei hao aeibou maangto shatko hapan laukei, “Nyaksinam kibü shuong shanga Mühghaü Sangle to atlabü ho latetche sekkei!

²⁵Keibüei Mühghaü Sangle to atkhoulabü khantoje nidku khün to ut shetlangbü sobou.”

²⁶Kho ditbü danei laukei, “Kholonga ao ong khümenla?”

²⁷Haoei laukei, “Müt shanga athükaminlabü kho Mühghaü shangaje thüklaminlabü.”

²⁸Peterei laukei, “Kün shangakei lai? Künei küneibü chemsibung apyoa hoba ka phai sema.”

²⁹Haoei haoen to laukei, “Maimaitham ngühmaia ngei kan to lenda, aoyouei Mühghaü Sangle shanga jembü chem, yak, jaisinasi shuong, nyusibou ayingsi shousi apyoa,

³⁰haoen la toubü ho kaodak hanei aei phopan ashemmailabü ao aki, hoba loulabü metena ponpen langkei haplabü.”

³¹Jisuei Anthüknyi kho leilangkei hoba haoen to laukei, “Ditashi, sen Jerusalem to angda, hoba Müteibü Shou shangabü thuseibü lea doan kibü pendou loushadlabü,

³²aishanga hao Küksithang la khümbo kuan aplabü, hoba hao la nyikulabü, himou bautilabü hoba eokei thuoklabü;

³³haoenei hao semeilabü hoba hao haitilabü, hoba sembounyeta hao langngailabü.”

³⁴Lausikei haoenei khübü kho che ongkei aditen; kho ai ngühtet laukei haoenei ange hoba kho ai lauda haoenei adamen.

³⁵Jisu Jerikho sühlamto, nyekthubü müt che lamkoa hishauko setan kikei.

³⁶Ladang haoei mütshang danbü ditkei, haoei kho ai yingkeije dogo phekei.

³⁷Haoenei hao to Nazaretbü Jisu danda dogo lenkei.

³⁸Kheijinei haoei ngekkei, “Dawid Shou Jisu, kü to onoukai.”

³⁹Hobaje thedanga paibü shuongei alementila shanga hao to hakkei, lausikei haoei aei kaangbou ngekkei, “Dawid Shou Jisu, kü to onoukai.”

⁴⁰Jisu lokei hoba müt kho hao jungto leibala ngühkhüm kukei. Ladang hao nyangko loukei haoei hao to phekei,

⁴¹“Nyi kü la ka shanga ai kümtimang sühda?” Haoei laukei, “Yaangbou, kü la nyibou haptikai.”

⁴²Jisuei hao to laukei, “Khei yingashi. Kaibü mailemei no maia.”

⁴³Haoei khoyam hapngaikei hoba Mühghaü la soneikangbü kuko hao phai sembei. Ladang haoenei kho hapbei mütshuong pendouei Mühghaü nyen sangkei.