Read Chang Naga LUK 19 Bible Online

LUK 19 - Chang Naga bible

LUK 19

¹Hao Jerikho to atkei hoba kho nakjung danko kikei.

²Khünei Zakhia nyenbü müt che kikei; hao khukabou khüm hebou kikei, hoba hao keibü yingan kikei.

³Haoei Jisu kho laobou yingkeije chühla shanga haujembo kikei, lausikei haoei ühüp, aieilausi khünei mütshang yaang kikei hoba hao tuibü hanbü kikei.

⁴Hibü hao thedangto langkei hoba hao to chühla shanga bhuklong che to nguikei, aishanga Jisu kho lam to danla hauko kikei.

⁵Ladang Jisu khonei sühlangkei haoei chühantikei hoba hao to laukei, “Zakhia, hali kaiyena; tat ngo ka chema sühjan.”

⁶Hao tongde louyenkei hoba hao olin angko sungletkei.

⁷Haoenei ladang kho hapbei haoen pendou nyamnyamyoko laukei, “Hao shabü müt cheeibü yen la lela haua!”

⁸Zakhia khünei lokei hoba Bunyubou to laukei, “Yaangbou, ngei ngeibü nyaksinam jamde shalebü la kulabü, hoba ngei müt at ka ajanbüei sungan kialonga ngei phejan leiei aeian shemngailabü.”

⁹Jisuei hao to laukei, “Tat khümenbü ho chem to loda, aishanga haokei Abraham shou ki.

¹⁰Aishanga Müteibü Shou maubü lamla hoba khümenla loukei.”

¹¹Haoenei kho ditko kitoua haoei lubü ngühphatbü che lenkei, aieilausi hao Jerusalem nyangko kikei, hoba haoenei Mühghaü Sangle khoyam haüthüklabü dogo dambei.

¹²Haoei laukei, “Yaangbü müt cheei choba Sangle songdak hau sungletlabü hoba longeilabü dogo kaonyek heebü che to meimeikei.

¹³Haoei haoeibü sambü an ngakei hoba haoen mütpem weko la mina che bang kukei. Haoei haoen to laukei, ‘Ngo alongei shongko nam seiteiashi.’

¹⁴Lausikei hao kaonyek kabü mütshuongei hao to mangsenkei, hoba haoenei phainei hai lauko ngühlang künbü hautikei, ‘Künei ho müt kün thüka choba la lemang asühda.’

¹⁵“Ladang hao choba lela songdak hau sungletan longeikei, haoenei namseibü ka ku lai pailetkeije ngela shanga haoei sambü shuong aoyou la nam jankukei khübü dan hao jungto ngabala haoei ngühkhüm kukei.

¹⁶Shaangbou loukei hoba laukei, ‘Yaangbou, kaibü mina khoei mina an paileda.’

¹⁷Haoei hao to laukei, ‘Thumai sambü maibü! No kümsilei hanbü chenei maang lanan kikeibü, sangnyu an thüka songdakshi.’

¹⁸Nyiboubü kho loukei hoba laukei, ‘Yaangbou, kaibü minaei ngao aeila paileda.’

¹⁹Haoei haotokei laukei, ‘Hobaje nokei sangnyu ngao thüka songdakshi.’

²⁰“Lubü che loukei hoba laukei, ‘Yaangbou, kaibü mina, laobou ngei neiei sholepan phokei, kho ho yingkei.

²¹Ngo kato hatko kikei aieilausi no maangpon thotakbü müt yingkei; nyi lanei apho khüka nyi sungda hoba nyi lanei awen khüka nyi latda.’

²²Yaangenbou khoei hao to laukei, ‘Müt amaibou, ka sembung ka ngei ka mat jembho. Ngo maangpon thotakbü müt, khei ngei awenbü ka latda, dogo nyi ngo ngekei laushi lo?

²³Kholongaje nyi ngeibü nam thanshanga aila aphoku? Khei yingsije ngo longeijinei phobnam yoan hapbhoulabü.’

²⁴“Haoei nyangko loan kibü shuong to laukei, ‘Hao ka mina kho hiashi hoba mina an kibou khola kuyoashi.’

²⁵Haoenei hao to laukei, ‘Yaangbou, haoei mina an kia!’

²⁶‘Ngei kan to lenda, aoyouei ki haoen la aei kuyolabü, hoba aoei ai haoei ai ki khokei hao ka ngailanglabü.

²⁷Lausikei ngeibü dangbou shuong, aoyouei ngo haoen thüka choba la lemang asüh, haoen kho hato leiba hoba kü thedanga haitiashi!’ ”

²⁸Jisuei kho lauan phaia, hao Jerusalem to thedangto hauteikei.

²⁹Ladang hao Bethfage si Bethani nyangko Oliv shongh dogo laubou shuipem chenei sühlangkei, haoei haoeibü eik nyi hautiko

³⁰laukei, “Kasi thedang kabü sang khüto atashi. Kasi khüto atsi kasiei, ladangkei müt setan achühbü gadu shoushou che phenan haplabü. Kho sengashi hoba sungba.

³¹Hobaje müt atei kasi to, ‘Aila kasiei kho sengletda?’ dogo phesije, kasiei hai laujan: ‘Bunyubouei khamakei.’ ”

³²Ngühlang künbü shuong haukei hoba ajanjan pendou haoei haosi la lenbü tegü kikei.

³³Haosiei gadu shoushou sengletko kijinei kho bunyuei haosi to laukei, “Kasiei aila ho sengda”?

³⁴Haosiei laukei, “Bunyubouei khamakei.”

³⁵Haosiei Jisu jungto kobakei, hoba ladang haoenei kho gadu shoushou thüka nei imbukei, Jisu kho thüka settikei.

³⁶Hao hauko kijinei haoenei haoeneibü neisimei lama imbukei.

³⁷Ladang hao sangnyu nyangshangko Oliv shonghshui ka louyenko kikei, eikshuong tan pendouei haoenei hapbü maangpanglabü kümsilei pendou shanga olinangko Mühghaü la nyensang kula khangko

³⁸laukei, “Bunyubou nyena Choba tegü ao louada hao haülabou yingshi; khuthüka sangmai, khuthük suokboua soneikangbü.”

³⁹Shuong yo ka Farisibü atei hao to laukei, “Lenbou, ka eikshuong to hakashi.”

⁴⁰Haoei jongaikei, “Ngei kan to lenda, haoen semele kialonga habü laang shuongei ngekyolabü.”

⁴¹Ladang hao chunga nyangko loukei hoba sangnyu kho hapbei haoei haapbo

⁴²laukei, “Nyi, khei, tat sangmai shangabü ho ongkei ngean kiteikei yingma! Lausikei khübü kho ka nyek ka huletan kia.

⁴³Aishanga ka jungto chalou shuong loulabü, laobounei kaibü labou shuongei no shilabü, laangbaei leleplabü hoba kaoen pendou ae jembo khinleplabü;

⁴⁴haoenei no hoba ka shousi shuong kaoa yeptiko shemtilabü, hoba kala laang che thüka che üpyokulabü, aieilausi nyi Mühghaü no pean chühla loubü jih ashen.”

⁴⁵Hao lembüchem to atkei, hoba namseibü shuong shian sattiko,

⁴⁶haoen to laukei, “Laishibaei lenda, ‘Kü chem kho welaushang chem yinglabü’; lausikei kanei ho kokbü shuongeibü laangpob la yeitia.”

⁴⁷Haoei chalou angbüa lembü- chema lenkei, lausikei thükkabü ungshedbü shuong, hoba Ngühkhüm lenbou shuong hoba mütshuongeibü khukabü shuongei hao haitilabü lam lambei.

⁴⁸Lausikei, ai kümlaje haoenei alamen, aishanga mütshuong pendouei maangtakko hao to ditko kikei.