Read Chang Naga LUK 2 Bible Online

LUK 2 - Chang Naga bible

LUK 2

¹Khübü chaloua ho longkei, kaodak pendoua nyen dojan dogo Kaisar Agusta ka ngühkhüm hautikei.

²Kho shaangbou nyen doletbü kikei. Ho Kurinia Siria governor kibü jiha kikei.

³Kho kümsilei shanga mütpem weko jembü sangnyu to haukei.

⁴Josefkei Galil ka Nazaret sangnyu ka, Jihudaa Bethlehem nyenbü Dawid sangnyu to haukei, aishanga hao Dawid phang hoba thensilen kikei.

⁵Kiman phobü Mari yoa, mang akongko kijinei hao nyen dola haukei.

⁶Haosi khünei kijinei sao jih sühkei,

⁷hoba saoei shaangbou jayangshou bukkei. Saoei hao sholepbei hoba youho nyaishang ukhong chenei phokei, aieilausi haoen shanga sühshang khünei kaoen akitei.

⁸Kho kaonyeka sanlombü shuong lamshaushanga nangnak haoeneibü sanshuong lombo kiteikei.

⁹Khuthük hangangbü che haoen thük to lotkei, hoba Bunyubou soneikangbü haoen kaijembo haukei, hoba haoen aeibou hatyokei.

¹⁰Khuthük hangangbüei haoen to laukei, “Tehüt: ngei kan jungto mütshuong pendou shanga olinbü ngühlang yaangbü künbada:

¹¹tat kan la Dawid sangnyua Khümenbou che bukkuakei; hao kho Bunyubou Khrista ki.

¹²Kan shanga amaaphilabü ho kilabü; kanei nasak che neiei sholepan youho nyaishang ukhong chenei yeptian haplabü.”

¹³Mangde ong hangangbü yoa khuthükbü tan yaangbü che longan Mühghaü nyen sangko laukei,

¹⁴“Thükkabou khuthüka Mühghaü to soneikangbü, hoba kaodaka haoei maangshikbü mütshuong yoa hakso.”

¹⁵Ladang khuthük hangangbüei haoen apyojung khuthük to ngaikei hoba sanlombü shuong cheei che to laukei, “Sen Bethlehem to hauakho hoba Bunyubouei sen la ngetibü hoba haüthükbü kho chühakho.”

¹⁶Haoen tongde haukei hoba haoenei Mari si Josef hoba na kho youho nyaishang ukhonga yeptian hapbei.

¹⁷Kho hapan haoenei na shangabü haoen to ngetibü pendou lenkei.

¹⁸Sanlombü shuongei haoen to lenbü ditbü shuong pendou maangpangkei,

¹⁹lausikei Mariei kho pendou saoeibü maangpona künkei hoba haüko dambei.

²⁰Hobaje sanlombü shuong Mühghaü la soneikangbü kuko hoba haoenei ditbü hoba haoenei hapbü pendou shanga hao nyen sangko ngaikei; aishanga kho haoen la lenbü tegütham kikei.

²¹Chalou setbounyet hao kiplabü chalou sühkei, hoba hao shia mokünjinei khuthük hangangbüei kubü nyen, hao la Jisu dogo nyenkukei.

²²Ladang Mosa Ngühkhümei sakkubü tegü saüenbü jih kho wankei, haoeibü nyusibouei Bunyubou la kula

²³(Bunyubou Ngühkhüma Laishibaei lenda, “Shaangbou bukbü jayangshou weko kho Bunyubou to saopobü” dogo nyenlabü,)

²⁴hoba Bunyubou Ngühkhümei sakkubü tegü dukutuk dang che ayingsi guduru shoushou dang che dogo lemla shanga Jerusalem to loukei.

²⁵Jerusalema müt che nyenei Simeon kikei. Hao kho, Israel püetla Khrista loubü to aeibou waangko chüheiko saopobü hoba songlea maangdakbü müt che kiteikei; hoba Soushou Saopobü hao thüka kikei.

²⁶Hobaje haoei Bunyuboueibü Khrista ühüp shongko hao ühailabü dogo Soushou Saopobüei hao to tang khittian kiteikei.

²⁷Soushouei leibü ka hao Lembüchem to loukei, hoba ladang Ngühkhümei mangsühbü tegü hao to kümlaleila shanga nyusibouei nashou Jisu kho leibakei,

²⁸haoei hao hao ikmangto sungletkei hoba Mühghaü sangko laukei,

²⁹“Bunyubou, tou ka ngüh tegü, nyi no khangenbou haksoa bangtiashi.

³⁰Aishanga Küksithang to tang khitlabü ngesakbü, hoba ka mütli Israel shanga soneikangbü laobou nyi phangshuong nyekei hapbo lamlekei, kü nyekei kaibü khümenbü kho hapa.”

³¹

³²

³³Haobou si haonyu hao shangabü laubü to maangpangko kikei.

³⁴Simeonei haoen haükukei hoba haonyu Mari to laukei, “Chühashi, maangpon juong ka dambü longla shanga Israela juongnyu tuongtila hoba phonla shanga hoba amaaphilabü laobou khulimbo ngüh laula, ho nashou pienakei.

³⁵Haü, hoba inei ka soushou paiko seplabü.”

³⁶Asher phang ka Fanuel shou Anna nyenbü thuseinyu che kiteikei. Sao kho aeibou sinan kikei; sao chem kanan phaia lao junga po nyet kikei;

³⁷sao kho latnyu po sao leito lei noushou kiteikei. Saoei lembü chem ladangkei üpyo, lausikei change nangnak mühei nyengko hoba welauko Mühghaü khangenkei.

³⁸Kheijinei sao loukei hoba Mühghaü la nyensang kukei hoba Jerusalem khümenbü shanga haiyeibü shuong pendou to nashou kho shangabü laukei.

³⁹Ladang Josef si Mariei Bunyubou Ngühkhümei sakkubü tegü khümbo wankei, haoen Galil to haoeneibü sangnyu Nazaret to ngaikei.

⁴⁰Nashou kho chingkei hoba hau kiko yeikei. Hao songsihonei shenkei hoba Mühghaü onou hao thüka kikei.

⁴¹Haoeibü nyusibou po weko Püetbü Lema Jerusalem to haukei.

⁴²Hao po anthüknyi onjinei poshou natshou tegü haoen lem to haukei.

⁴³Ladang chalou kho penkei haoen ngaijinei, nashou Jisu Jerusalema setngaikei, lausikei haoeibü nyusibouei ange.

⁴⁴Haoenei hao shuong yoa yangakei dogo dambei, hoba haoen chabük che wakou haukei; kheijinei haoenei haoen chempen hoba himshuong yoa hao lameikei.

⁴⁵Haoenei hao ühüpdang lesi, haoen Jerusalem to ngaikei hoba hao lambei.

⁴⁶Chalou semnyet danan phaia haoenei hao lembüchema lenbou shuong yoa haoen ngüh ditko, hoba haoen to pheyoko setan hapbei.

⁴⁷Hao ngüh ditbü shuong pendou haoei ditenbü hoba jongaibü to maang- pangkei.

⁴⁸Ladang haoeibü nyusibouei hao hapbei, haoen maang- pangkei hoba haonyuei hao to laukei, “Kü shou, nyi aila kün to hainyu jungeikei? Kabou hoba ngo maangmauko no lameida.”

⁴⁹Haoei haosi to laukei, “Aila kanei ngo lameiko kikei? Ngo kü Bou chema kijan dogo kanei ange lo?”

⁵⁰Lausikei haoei haoen to laubü kho haoenei aditen.

⁵¹Hao haoen yoa Nazaret to loukei, hoba hao haoen phanga ngühaleko kikei. Lausikei haonyuei khübü ngühsidei pendou saoeibü maang- pona thankei.

⁵²Hobaje Jisu songsihona hoba süngalopa Mühghaü hoba müt thedanga onoua chingkei.