Read Chang Naga LUK 20 Bible Online

LUK 20 - Chang Naga bible

LUK 20

¹Nyetche, Jisu Lembüchema mütshuong la lenko hoba Ngühlang Maibü songlenko kijinei, thükkabou ungshedbü shuong hoba Ngühkhüm lenbou shuong jaishou shuong yoa liko loukei,

²hoba hao to laukei, “Nyi habü ho ai hauei kümdaje kün la lenbü. Ho hau aoei kala kukei?”

³Haoei haoen to jongaikei, “Ngeikei kan ka ngüh che phelabü: Küla lenbü,

⁴Johaneibü baptibü kho khuthük ka si müt ka?”

⁵Haoenei haoen yoa hai lauko joyokei, “Senei ‘Khuthük ka’, dogo laualonga, haoei, ‘Kanei aila hao to maialem?’, dogo laulabü.

⁶Lausikei senei ‘Müt ka’, dogo laualonga mütshuong pendouei sen to laangei sonlabü; aishanga Johan kho thuseibü che yingkei dogo haoenei mailema.”

⁷Kho lakabü yingkeije haoenei angekei dogo haoenei jongaikei.

⁸Jisuei haoen to laukei, “Hobaje ngei habü kho ai hauei kümdaje ngei kan to alenda.”

⁹Haoei mütshuong la ho ngühphatbü lenkei: “Müt cheei semlühlaak lekei hoba sekham la lela moubü shuong la apyokuan kaonyek saabü to jih lounyu shanga satkei.

¹⁰Jih sühbüa, khei sekmoubü shuongei hao la semlühlaak ka mai at nakua dogo sambü che koutikei; lausikei sekmoubü shuongei hao ngümeikei hoba ik kong ngaitikei.

¹¹Tokei haoei lubü sambü che koutikei; lausikei haoenei haokei ngümeikei hoba himou bautiko jungeikei hoba ik kong ngaitikei.

¹²Tokei haoei semboubü sambü che koutikei; lausikei haoenei haokei leilutikei hoba shian sattikei.

¹³Semlühlaak bunyuei laukei, ‘Ngei ai kümla? Ngei ngei sanoubü hoba jayangshou koutilabü. Haoenei hao to soumo hatlabü.’

¹⁴Lausikei ladang sekmoubü shuongei hao hapbei, haoenei haoen yoa joyoko laukei, ‘Phet- phanbou kho ho ki; kho phet senei lelabü lele senei hao haitiakho.’

¹⁵Hobaje haoenei hao semlühlaak ka shian sattikei hoba haitikei. “Hibü semlühlaak bunyuei haoen to ai kümla?

¹⁶Hao loulabü hoba haoei khübü sekmoubü shuong kho shemtilabü, hoba semlühlaak kho lubü la kulabü.” Ladang haoenei kho ditkei haoenei laukei, “Kheinyuje touma!”

¹⁷Haoei haoen to chühkei hoba laukei, “Kholonga ho Laishiba ngühtet ai: ‘Chemdangbü shuongei laobou laang ale kho chemnyek laang la yeikei’?

¹⁸Ao kho laang thüka atlaje hao netla yeilabü, hoba ho ao thükto lotlaje hao thamngu la yeiko ngünyinlabü.”

¹⁹Kho jih khüneitham Ngühkhüm lenbou shuong si ungshedbou shuongei hao to ik shatla lameikei, lausikei haoen mütshuong to hatkei; aishanga haoei kho ngühphatbü haoen khulimbo laukei dogo haoenei ngekei.

²⁰Haoenei jihsiphai maibü che chüheikei, hoba haoenei hao haoeibü ngüha mintilabü hoba governor hau hoba songdak hau la hao khümbo kuan apla shanga, aeibou lanan lenko kokpheibü dan litikei.

²¹Haoenei hao to phekei, “Lenbou, nyi laubü hoba lenbü kho tükde dogo künei ngekei, hoba nyi the to chühko akümda, lausikei ngühmaia Mühghaü lam shanga lenda;

²²künei Kaisar la khüm kujan si akujan?”

²³Haoei haoeneibü kok lapenkei hoba haoen to laukei,

²⁴“Kü la sempak che lenbü. Ho aoeibü noksa hoba ao nyen dokei?” Haoenei laukei, “Kaisareibü.”

²⁵Haoei haoen to laukei, “Kholongaje Kaisareibü Kaisar la kuashi hoba Mühghaüeibü Mühghaü la kuashi.”

²⁶Haoenei mütshuong thedanga haoei laubü ngüh ka lapoula athükko kikei; haoei jong- aibü ngüh to haoen maang- pangkei hoba ngüh üangko apbei.

²⁷Haibü ka alangngaida dogo laubü Sadukibü at loukei hoba hao to phekei,

²⁸“Lenbou, jaisina müt nyi kian che youyik akiko haialonga, na khoei latnyu kho leiyetjan hoba haojai shanga chemdang haatikujan dogo Mosaei kün shanga dokukei.

²⁹Tou jaisina müt nyet kiteikei. Jaishoubouei yak che ngakei hoba shousi akiko haikei.

³⁰Hobaje nyiboubüei

³¹hoba semboubüei sao lekei; kho tegü müt nyet khümboei sao ngakei; haoenei shousi akitei hoba haikhümbei.

³²“Thonla yaksa khokei haikei.

³³Nyibou langngaibüa sao kho aoeibü yak yingla? Aishanga haoen nyet pendouei sao yakla lekei.”

³⁴Jisuei haoen to laukei, “Ho kaodakeibü shousi shuongei chem kanda hoba laolam yaknga kuyoda,

³⁵lausikei aoyouei loulabü kaodak pailetla shanga hoba haibü ka langngaila muan ki haoenei chem akanda ayingsi laolam yaknga akuyoda.

³⁶Maimaitham haoen haila athükkei, aishanga haoen khuthük hangangbü shuong tegü ki, hoba haibü ka langngaibüa phejan lebüei haoen Mühghaü shousi shuong ki.

³⁷Lausikei haibü ka langngaibü shanga Mosaeikei wanlong buham shangabü Laia haoei Bunyubou kho Abraham Mühghaü, Isak Mühghaü hoba Jakob Mühghaü dogo lenakei.

³⁸Mühghaü kho haibüeibü aying lausikei langkeibü Mühghaü ki; hao to müt pendou lang kida.”

³⁹Ngühkhüm lenbou shuong yoa atei jongaikei, “Lenbou, nyi tükde laua”;

⁴⁰aishanga haoenei hao ka aei phela maangei asom.

⁴¹Haoei haoen to laukei, “Haoenei lai küman Khrista kho Dawideibü Shou dogo lauda?

⁴²Dawidei mangkei Nyensang chia lea lauda, ‘Bunyubouei ngeibü Bunyubou to lenkei,

⁴³ngei kaibü dangbou shuong ka you nakshang la ayeiti shongko kü mae aenei setshi.’

⁴⁴Hibü Dawidei hao to Bunyubou dogo ngada; kholonga hao laibü hao shou yingla?”

⁴⁵Haoei mütshuong pendouei ditko hao eikshuong to lenkei,

⁴⁶“Ngühkhüm lenbou shuong, aoyouei nei loubü lean paimang sühda hoba namyak namseishanga salem maikuda, sinagoga thükkabou setshang hoba lemalanga setshang maiboutham kimmang sühda,

⁴⁷aoyouei latnyueibü peisilei khümbuda hoba hela- haangla loubang welauda, haoen to maangsangashi; haoenei shedsikhau yaangbou haplabü.”