Read Chang Naga LUK 21 Bible Online

LUK 21 - Chang Naga bible

LUK 21

¹Haoei chühantikei hoba keibü danei haoeneibü jongsak lembüchem namphot to jinko hapbei.

²Haoei akialebü latnyu cheei poisa penyi jinko hapbei;

³hoba haoei laukei, “Ngühmaia ngei kan la lenda, ho shalebü latnyuei haoen pendou to juongbou jina,

⁴aishanga khübü pendou kho haoen kibü keibü ka jinkei, lausikei ho yaksaei sao shalejongle ka saoeibü langkei shanga kibü pendou jinkukei.”

⁵Haoen yoa atei lembüchem hoba hemaibü laang shuong hoba lembüsabüei he maitibü shanga lauyoko kikei. Haoei laukei,

⁶“Kanei chühko kibü habü shuong shanga laang che thüka che alusakko thenan akilabü lele chalou che loulabü.”

⁷Haoenei hao to phekei, “Lenbou, khübü kho ladang ong yingla? Hobaje khübü loushadlamto amaaphilabü ai yingla?”

⁸Haoei laukei, “Kan ayingbü to aleilangtila maangsangashi. Aishanga kü nyena, ‘Ngo hao’, hoba ‘Pienbü jihsiphai kho süha’, dogo lauko loulabü. Haoen phai tesem.

⁹Lausikei ladang kanei wapyosuyo hoba bangku sakku ditlaje temok. Khübü shaang haüthükjan, lausikei thonbü khoyamje alousühlabü.”

¹⁰Kheijinei haoei haoen to laukei, “Phangei phang khulimbo hoba sangleei sangle khulimbo lolabü;

¹¹selo kaang nyilabü hoba kaoen kaoena mühsinou hoba shatsinyat limsilang kilabü; müha hatlalühlabü hoba amaaphilabü yaang kilabü.

¹²Lausikei khübü pendou ühaüthükjinei mütshuongei kan lamlabü hoba shieikoelabü; haoenei kan sinagog to khümbo kuan aplabü hoba kan thünglabü; kü nyen shangabüa kan choba shuong hoba governor shuong jungto leibalabü.

¹³Kan shanga aukabü kula kho jihsiphai maibü yinglabü.

¹⁴Jongaila shanga jihsiphai asühjinei lamlela tedamei,

¹⁵aishanga kaibü dangbou aoeikei tokngaila ayingsi khulimbo alauenlabü lele kan la ngüh hoba songsido kulabü.

¹⁶Kan nyusibouei, jaisinaei, chempenei hoba jenabou shuongei khümbo kuan aplabü, hoba haoenei kan at haitilabü.

¹⁷Kanei kü to ngüha lebü shanga müt pendouei kan mangsenlabü.

¹⁸Lausikei kaneibü khu ka khulou pemche ongkei amaulabü.

¹⁹Thon sühko natenbü danko hanei kaneibü langkei pailetlabü.

²⁰“Ladang kanei sepai shuongei Jerusalem kaijeman haplaje, kheijinei kanei sao leilulabü jihsiphai süha dogo ngeashi.

²¹Aoyou Judea a kilaje haoen shongh to satashi; sangnyu maanga kibü shuongei apyoan satashi, hoba aoyou batak aian kilaje haoen sangnyu to tütngai;

²²aieilausi khübü kho kayang chalou shuong ki; haoen Laishiba ngüh pendou loushadtila shanga loukei.

²³Khübü chaloua shia künan kibü ayingsi senyopbü yaksa shuong shanga ügütü! Aishanga kaonyeka khonku yaang hoba ho mütli thüka Mühghaü maangshat yaang kilabü.

²⁴Haoen inlouei tuonglabü, haoen phang pendou to lang senlabü, hoba Küksithangeibü pienbü chalou aloushad shongko Jerusalem kho Küksithangei nakeila lelabü.

²⁵“Chanyu, litnyu hoba khanshoulitshoua amaaphilabü kilabü hoba kaonyudaka phangshuong si hoba deishou ngühyobü langhei maang ngouan shempotham khonsakyolabü;

²⁶mütshuongei kaodaka haüthükko loubü hatlabü to chühan maang litilabü, aishanga khuthükbü sei kho nyaakeilabü.

²⁷Kheijinei haoenei Müteibü Shou sangmeia sei hoba soneikangbü yaanga louko haplabü.

²⁸Ladang khübü haüthükla khanglaje, chühangtiashi, ngüm shingan chühashi, aieilausi kaneibü khümenbü nyangko louda.”

²⁹Haoei haoen la ngühphatbü che lenkei: “Bhuklong hoba lubü bunyu pendou to chühashi.

³⁰Haoen pik nyemshang longsi lengko, aoei alensikei kanei khüto chühan sulang nepda dogo kanei ngeda.

³¹Kho tegü kanei ladang khübü haüthükko haplaje Mühghaü Sangle nyangko lousüha dogo ngeashi.

³²Ngühmaia ngei kan to lenda, habü ho pendou aloushad shongko ho meten adanlabü.

³³Khuthük si kaodak dankhümlabü, lausikei kü ngüh ladangkei adanlabü.

³⁴“Yaübükotbü, ihjaakbü hoba ho langkei maangdühei kaneibü maangpon atsheile ayeitila maangsangashi. Kho Chalou kho kan thükto hakde alottila shanga maangsangashi,

³⁵aishanga kaonyudaka kibü pendou thükto ho tin che tegü shemletlabü.

³⁶Pianleman kiashi, loushadlabü kibü khübü pendou ka satenlabü, hoba Müteibü Shou thedanga loenlabü lele, jihsiphai pendoua welauko kishi.”

³⁷Chaloua haoei lembüchema lenkei, hoba nangnak hao Oliv shongh shui dogo laubü shongh khünei yepbo kikei.

³⁸Mütshuong pendouei lembüchema hao ka ditla shanga enyu pian hao jungto louko kikei.