Read Chang Naga LUK 22 Bible Online

LUK 22 - Chang Naga bible

LUK 22

¹Püetbülem dogo laubü Tokai ajinbü Wentek Lem nyangko kikei.

²Ungshedbou shuong hoba Ngühkhüm lenbou shuongei Jisu haitilabü hangsilam lambo kikei; aishanga haoenei mütshuong to hatkei.

³Anthüknyi yo kabü che, Iskhariot, dogo laubou Judas maangpon to Satan atkei;

⁴hoba Judas wenjung satkei hoba ungshedbou shuong si lembü- chem lombou leiyeibü shuong to haoei Jisu haoen ik to lai khümbo kuan apla kho sangkukei.

⁵Haoen olinkei hoba hao la nam kula theletkei.

⁶Hao maanghaikei, hoba mütshang akijinei haoen la Jisu khümbo kuan apla shanga jih maibü che chüheikei.

⁷Tokai ajinbü Wentek Lem, laonei Püetbülem sanlon shoushou lemla haitilabü kikei, kho chalou sühkei.

⁸Jisuei Peter si Johan hai lauko hautikei, “Hauashi hoba senei shaula Püetbülem lamleashi.”

⁹Haosiei hao to laukei, “Nyi küsi la ho lanei lamletimang sühda?”

¹⁰Haoei haosi to laukei, “Ladang kasi sangnyu to atlaje müt cheei thamchaka dei künan kasi to haüyolabü. Hao atbü chem to hao phai semshi,

¹¹hoba chem bunyu to hai laushi, ‘Lenbouei kato lauda: Ngei kü eikshuong yoa Püetbülem shaulabü popchem kho lanei ki?’

¹²Haoei kasi la thükkabü popchem yaangbü che jemetsangettian lenlabü. Khonei lamleashi.”

¹³Haosi haukei hoba ajanjan pendou haosi la lenbü tegü yingan kiteikei hoba haosiei Püetbülem khünei lamlekei.

¹⁴Ladang jihsiphai sühkei hao hoba haoeibü youkoikjai shuong setkei,

¹⁵hoba haoei haoen to laukei, “Ngo khonakutoua ho Püetbülem kan yoa shaula ngei aeibou maangdühkei,

¹⁶aishanga ngei kan la lenda, ho nyekchüh Mühghaü Sanglea aloushad shongko ngei ho kan yoa nyibou ashaulabü.”

¹⁷Kheijinei haoei thung che sungletko Mühghaü la nyensang kukei hoba laukei, “Ho sungletashi hoba kan yoa shomashi;

¹⁸aishanga ngei kan la lenda, tou ka jaüan Mühghaü Sangle alou shongko ngei semlüh hek dei ayunglabü.”

¹⁹Haoei Wentek sungan nyensang kuko shaknyinkei hoba haoen la kuko laukei, “Ho kan shanga kubü ngeibü mang. (Ngo damenko hai kümashi.”

²⁰Hobaje shauan phaia kho tegü ong haoei thung kho sungko laukei, “Ho thung kü siiei kümbü haanbü theyolanyobü ki; ho kan shanga kouda.)

²¹Lausikei chühashi, aoei ngo yaakshaulabü ki haoeibü ik kü phau denshanga hamakei;

²²aishanga huongsepbü tegü maimaitham Müteibü Shou hailabü, lausikei hao ao danko khümbo kuan apda hao shangaje ügütü!”

²³Haoenei haoen yoa laobouei ong ho kümla kima dogo cheei che to pheyola khangkei.

²⁴Haoen yoa ao yaangbou yingla dogo haoen wetyo khangkei.

²⁵Jisuei haoen to laukei, “Kaodak choba shuongei mütli thüka bunyu yeida, hoba haoen thüka hau jungeibü shuong to Thuibou shuong dogo lauda.

²⁶Lausikei kan yoaje khei aying; kan yoa yaangshangbou kho nashoubou tegü yingshi, hoba khuleibou kho khangenbou tegü yingshi.

²⁷Laobou yaangbou, shaushanga setbou si nongeibou? Shaushang yungshanga setbou kho aying si? Lausikei ngo kan yoa khangenbou che tegü ki.

²⁸Kü khonsak pendou dantiko kü yoa thüngbü shuong kho kan ki;

²⁹Kübouei küla Sangle che pentibü Kü Sanglea ngeibü shau shang yungshanga shaulabü lele ngei kan pentida;

³⁰hoba kanei Israel phang anthüknyi mat jembo choba setshanga setlabü.

³¹“Simon, Simon, kan pendou youshou tegü sipan apla shanga Satanei hileda;

³²lausikei Simon, kaibü mailemei no athük alottila shanga ngei ka shanga welaua. No ladang haan sepeingailaje, kaibü jaisinasi shuong hau kingaitiashi.”

³³Peterei jongaikei, “Bunyubou, ngo ka yoa thüngdang to atla hoba hailakei lamleakei.”

³⁴Jisuei laukei, “Ngei kala lenda, Peter, nyi ngo angekei dogo semnei alau shongko tat aunak akoulabü.”

³⁵Haoei haoen to laukei, “Ngei kan neimok, nyungkai ayingsi nguok akünko hautijinei kan aieije shalelao?” Haoenei laukei, “Ai aying.”

³⁶Haoei haoen to laukei, “Lausikei touje aoei neimok kije jungashi, hoba nyungkaikei, hoba aoei inlou aki, haoei haoeibü mangyuk yakashi hoba che jekashi.

³⁷Ngei kan to lenda, Laishiba laobouei, ‘Hobaje hao ngühkhüm lulimbü dan yoa weoukei’, dogo laukei kho kü to loushatda.”

³⁸Haoenei laukei, “Chüha, Bunyubou, hanei inlou penyi kia.” Haoei haoen to laukei, “Khoei soua!”

³⁹Haoei apyokei hoba hao hanghangbü tegü Oliv Shongh to haukei; hoba eikshuongei hao phai sembei.

⁴⁰Ladang haoei kaoen sühkei haoei haoen to laukei, “Kan takteibü to aloulabü shanga welauashi.”

⁴¹Hao haoen ka jutak shijo thüng banglangkei, hoba khüpetko welaukei,

⁴²“Abou, nyi maangangsije ho thung kü ka langkai; lausikei kü maang aying, nyi maangangbü kümshi.”

⁴³Khuthük ka khuthük hangangbü che louan hao hau kingaitikei.

⁴⁴Hao aeibou khonkukei hoba aei kaangko welaukei, hoba haoeibü lemli dei sii kao to sangbü tegü yeikei.

⁴⁵Hao welaubü ka loenan eikshuong jungto loukei, hoba haoen maangmaubü ka yepan hapbei.

⁴⁶Haoei haoen to laukei, “Kan aila yepan kida? Pienashi hoba kan takteibü to alotla shanga welauashi.”

⁴⁷Haoei kho lauko kitoua mütshang che lousühkei, hoba Judas nyenbü, Anthüknyi yoa che kho thedang lean kikei. Haoei hao to sembung shepla shanga Jisu nyangko loukei.

⁴⁸Jisuei hao to laukei, “Judas, nyi sembung shepbo Müteibü Shou khümbo kuan apda lo?”

⁴⁹Loushadla kümbo kibü kho hapan hao phai sembü shuongei laukei, “Bunyubou, künei küneibü inei wapbo no?”

⁵⁰Haoen yo ka cheei thükkabou ungshedboueibü sambü to wapbei hoba mae nou shipan apbukei.

⁵¹Lausikei Jisuei laukei, “Thakashi! Khüae leshi!” Hobaje haoei kho müteibü nou to jungkei hoba maitikukei.

⁵²Jisuei hao khulimbo loubü ungshedbou shuong, lembüchem lombü leiyeibü shuong hoba jaishou shuong to laukei, “Kokbüsembü müt khulimbo loubü tegü kan in si juthep japan louda lo?

⁵³Ngo kan yoa liko kijinei kü khu limbo ik ashing. Lausikei ho kaneibü jihsiphai; touje nakthühei songdakda.”

⁵⁴Haoenei hao lapan leilangkei hoba thükkabou ungshedbou chem to leibakei. Peterei tangküng heeko sembei.

⁵⁵Ladang haoenei khongchia wan jikkei, haoen pendou setkei hoba Peterkei haoen yoa setyokei.

⁵⁶Sambü-medei cheei hao wanlong junga setan hapbei hoba hao to tangko chühkei. Saoei laukei, “Ho mütkei hao yoa kiteikei.”

⁵⁷Lausikei Peterei hao athelet hoba laukei, “Yaksa, ngei hao angekei.”

⁵⁸Longche kian müt cheei hao hapbei hoba laukei, “Nokei haoen yoa che yingkei.” Lausikei Peterei laukei, “Ji, ngo aying.”

⁵⁹Angh che thüng kian phaia lubü müt cheei chongchingko shean laukei, “Toknoklabü aki ho müt ho hao yoa kikei, aishanga hao Galilbü yingkei.”

⁶⁰Lausikei Peterei laukei, “Nyi ai laudaje ngei angekei.” Khoyam, haoei lauko kitoua aunakei koukei.

⁶¹Jisuei sepeikei hoba Peter to chühkei, hoba Peterei Jisuei hao to, “Aunak akoutoua nyi ngo tat semnei sühko atheletlabü”, dogo laubü damenkei.

⁶²Hao ngaikei hoba kaang haapbei.

⁶³Hao to hatan kibü shuongei hao to nyikuko hoba ngümeiko kikei.

⁶⁴Haoenei haoeibü thenyek yuklepbukei hoba hao to phekei, “Kato ngümbou kho ao? Tetenashi!”

⁶⁵Hobaje haoenei hao khulimbo Mühghaü nyikubü ngüh juong laukei.

⁶⁶Ladang lang ngekei, mütli jaishou shuong, hoba ungshedbou shuong si Ngühkhüm lenbou shuong takshatkei hoba haoenei hao Thükkabou Kambü to leian hauko

⁶⁷laukei, “No Khrista yingsije kün la lenbü.” Haoei haoen to laukei, “Ngei lenalonga kanei maialemlabü;

⁶⁸hoba ngei kan ka phealonga, kanei ajongailabü.

⁶⁹Tou ka jaüan Müteibü Shou Mühghaü sei mae aenei setan kilabü.”

⁷⁰Haoen pendouei laukei, “Khülonga no Mühghaü Shou lo?” Haoei haoen to laukei, “Ngo hao dogo kanei lauda.”

⁷¹Haoenei laukei, “Sen shanga aukabü aei ai kümsilei ki? Senei lolokei hao sembung ka kho dida.”