Read Chang Naga LUK 23 Bible Online

LUK 23 - Chang Naga bible

LUK 23

¹Haoen shuong pendou loenkei hoba Jisu Pilat thedangto leibakei.

²Hobaje haoenei hao attila khangko laukei, “Ho mütei kün mütli ayingbü to leilangko, Kaisar la khüm kubü shiletko, hoba hao lolo hao Khrista choba ki dogo lauko künei hapbei!”

³Pilatei hao to phekei, “No Jihudabü Choba lo?” Haoei hao to jongaikei, “Kho nyi lauda.”

⁴Pilatei ungshedbou shuong si noknyüh to laukei, “Ngei ho müt to shedbü ai alapenda;”

⁵lausikei haoenei aei ong kaangbou laukei, “Haoei Judea pendoua lenko mütshuong pühnyintida; haoei Galila khangkei hoba tou hao hanei kia.”

⁶Ladang Pilatei kho ditkei haoei kho müt Galilbü yinglaoje dogo phekei,

⁷hoba ladang haoei Jisu kho Herod songdak kommang kabü dogo damenkei, haoei hao Herod jungto leian hautikei, aieilausi haokei kho jihsiphaia Jerusalema kiteikei.

⁸Ladang Herodei Jisu hapbei, hao aeibou olinkei; haoei chalou lounyu ka hao chühmang sühko kikei, aieilausi haoei hao shangabü ditan kikei, hoba haoei amaaphilabü at kümbü to chühla haoei dambo kikei.

⁹Haoei hao to ngüh juong phekei, lausikei Jisuei hao to ai ajongai.

¹⁰Ungshedbou shuong si Ngühkhüm lenbou shuong maangshat lamlam hao attiko khünei lokei.

¹¹Herod hoba haoeibü sepai shuongeikei hao aeibou aweasüngko hoba nyikuko jungeikei; kheijinei haoei hao thükto soneibü nei neikukei hoba hao Pilat jungto leian ngaitikei.

¹²Khünyet Herod si Pilat cheei che to thangbou la yeikei; thedangtoje haosi dangbou kikei.

¹³Pilatei ungshedbou shuong, leiyeibü shuong hoba mütshuong pendou chela ngashaikei,

¹⁴hoba haoen to laukei, “Kanei ho müt kü jungto mütshuong ayinglamto leilangbou che tegü leibuakei. Ngei hao kan thedanga phanan chüha hoba ngei kanei hao khulimbo sungbabü khünei hao shedlabü lele aikei ühüpou;

¹⁵ayingsi Herodeikei alapen aishanga haoei hao sen la leian ngaitikuakei. Haoei haila muko aikei akümbei.

¹⁶Hibü ngei hao semeilabü hoba litilabü.”

¹⁷(Püetbülem weko Pilatei haoen la thüngdang kabü che litikujan.)

¹⁸Lausikei mütshang pendouei ngekkei, “Kho müt haitiashi; kün la Baraba litikuashi.”

¹⁹Baraba kho haoei sangkhu limbo khüpyobü shanga hoba müt haitibü shanga thüngdang to jinkei.

²⁰Pilatei Jisu litimang sühko haoen to nyibou la joyokei;

²¹lausikei haoenei, “Peiseia thüngashi, hao peiseia thüngashi!” dogo ngekdang lekei.

²²Haoei haoen to semboula lenkei, “Aila, haoei ai amaibü kümbei? Ngei hao to hailabü kayang muko ai ühüpenda. Hibü ngei hao to semlabü hoba litilabü.”

²³Lausikei haoenei kaang ngekko hao haoenei mangsühbü tegü peiseia thüngashi dogo aeibou thungeikei, hoba haoenei ngekbüei thükan apbei.

²⁴Hibü Pilatei haoenei mangsühbü sakkula janthetkei.

²⁵Haoei haoenei mangsühbü müt, ao khüpyobü hoba müt haitibü shanga thüngdang to jinan kibou kho litikukei; lausikei Jisu, haoenei mangsühbü tegü haoei kuan apbei.

²⁶Haoenei hao leilangjinei Kurinibü Simon, yen ka louko kibü lapbei, hoba Jisu phainei pean semtila shanga peisei kho hao la tonan jinkukei.

²⁷Mütshang yaang hao phainei yangkei, hoba yaksa shuong khüklang to jangngailangko hao shanga manghaapbo sembei.

²⁸Jisuei haoen ae sepeikei hoba laukei, “Jerusalem nouyangshou shuong, kü shanga tühaap, aeiko kan shanga hoba kaneibü shousi shuong shanga bouje haapashi,

²⁹aishanga jihsiphai che louada, laonei mütshuongei hai laulabü, ‘Angkongbü shuong, ladangkei na abukbü shuong, hoba ladangkei na ayopbü shuong olinbou.’

³⁰Kheijinei haoenei shongh shuong to laulabü, ‘Kün thükto lotkai’, hoba shonghshou to laulabü, ‘Kün küplepkai.’

³¹Aishanga mütshuongei bunyu sangtinga khei kümsije, kho linan phaia ai kümla?”

³²Amaibü kümbü shuong, lubü müt nyi, hao yoa haitila shanga leian haukei.

³³Hobaje ladang haoen “Khulo”, dogo nyenbü kaoen to loukei, haoenei hao khünei peiseia thüngkei, hoba amaibü kümbü müt nyi che maenei hoba che nanaenei peiseia thüngkei.

³⁴Jisuei laukei, “Abou, haoen la amai apbushi; haoenei ai kümdaje kho haoenei angekei.” Haoenei phaang pakko haoeibü neisimei haoen yoa jankei.

³⁵Mütshuongei khüto chühko lokei. Leiyeibü shuongeikei nyikuko laukei, “Haoei lubü shuong püetkei; ho müt Mühghaüei pienbü Khrista yinga longa, hao lolo püetashi.”

³⁶Sepai shuongeikei hao to nyikukei. Haoen hao jungto loukei hoba hao la haijepbü dei kuko

³⁷laukei, “No Jihudabü Choba yingsije, no lolo püetashi.”

³⁸Khünei tokei hao thüka, “HO JIHUDABÜ CHOBA” dogo doan kikei.

³⁹Amaibü kümbü peiseia saüan phobü cheei hao khulimbo nyikula khangko laukei, “No Khrista aying si? No lolo püetashi hoba küsikei püetkai.”

⁴⁰Lausikei che khoei hao to hakko laukei, “Nyije Mühghaü to ongkei ühütda lo? Nokei hao to jeteibü kayanga kia.

⁴¹Seti shangaje ho janbü ki, aishanga setieije setieibü kümsilei mubü hapngaida, lausikei ho müteije ai shedbü akümbei.”

⁴²Hobaje haoei laukei, “Jisu, no kaibü Sanglea loujinei ngo damenashi.”

⁴³Jisuei hao to laukei, “Ngei ngühmaia kato lenda, tat no kü yoa Paradaisa kilabü.”

⁴⁴Tou ho chajihbou kikei. Kaonyek pendoua angh sem jih asühshongko nakthüh lotkei,

⁴⁵hoba chanyu ngesakbü ohauko apbei; hoba lembüchema thangbü nei jenyu ka jitthetkei.

⁴⁶Jisuei ngüh yaangbüei ngekko laukei, “Abou, ka ik to kü soushou kuda”; hoba haoei kho lauan phaia hao haikei.

⁴⁷Ladang saongao thükkabouei haüthükbü kho hapbei haoei Mühghaü la soneikangbü kuko laukei, “Maimaitham ho müt saopobü kiteikei.”

⁴⁸Khünei jichühko shaibü mütshang pendouei ai haüthükkei kho hapbei hoba haoeneibü khüklanga jangngaiko haapbo ngaikei.

⁴⁹Lausikei hao ngean kibü shuong pendou heebüa lokei. Kho tegü Galil ka hao phai sembü yaksa shuong pendouei tangkünga khübü pendou to chühko lokei.

⁵⁰Müt che Josef dogo nyenan, daman chühbou che kikei.

⁵¹Ho mütei haoeneibü huonsiyou hoba kümsilei aineikei ayo. Hao Jihudabü sangnyu che, Arimathia ka kikei, hoba hao Mühghaü Sangle haiyeiko kikei.

⁵²Hao Pilat jungto haukei hoba Jisueibü mang hiletkei.

⁵³Haoei kho sungletan nei inyaibüei shokei, hoba aokei khünan achühbü laang ka jakenbü hee chenei hao khünkei.

⁵⁴Ho Lamlebü chalou kikei, hoba Nounyet sühko kikei.

⁵⁵Hao yoa Galil ka loubü yaksa shuong phainei sembei, hoba haoenei hee hoba haoeibü mang lai khünkei kho hapbei.

⁵⁶Hobaje haoen ngaian ponlem si onang lamlekei. Lausikei haoenei ngühkhümei sakkubü tegü Nounyet haksokei.