Read Chang Naga LUK 24 Bible Online

LUK 24 - Chang Naga bible

LUK 24

¹Lausikei balea shaangbounyet, ngeyang enyu, haoenei lamlebü ponlem onang jungan hee to loukei.

²Haoenei laang kho heekhün ka khokan apan hapbei,

³lausikei ladang haoen atkei haoenei Bunyubou Jisu mang kho ühüp.

⁴Haoen kho shanga maang phenyembo kitoua, müt nyi soneibü nei lean loukei hoba haoen junga lokei.

⁵Yaksa shuong hatkei hoba haoeneibü thenyek kao ae yeikei, lausikei müt nyi khoei haoen to laukei, “Kanei aila haibü yoa langkei kibou lameida?

⁶(Hao hanei aki; hao langngaia.) Hao Galila kijinei haoei kan to lai laukei kho damenashi,

⁷khei Müteibü Shou shabü shuongeibü ik to khümbo kuan aplabü, peiseia thünglabü hoba sembounyet nyibou langngailabü.”

⁸Haoenei haoeibü ngüh shuong damenkei,

⁹hoba ladang haoen hee ka ngaikei haoenei khübü pendou Anthükche khola hoba joubü shuong pendou la lenkei.

¹⁰Haoen Mari Magdalin, Joana, hoba Jakob nyu Mari; hoba lubü yaksa shuong yoan haoenei youkoikjai shuong la ajanjan pendou lenkei.

¹¹Yaksa shuongei lenbü kho pendou haoen la amlangbü la yeikukei hoba youkoikjai shuongei haoen to maialem.

¹²(Lausikei Peter loenkei hoba heedang to langkei, hoba haoei sühlangan semlitisi haoei nei inyaibü kho ong hapbei; ai haüthükkei khüto maangpangko hao chem to ngaikei.)

¹³Haoeibü eik yoa müt nyi khünyet, Jerusalem ka mail nyet thüng hean, Emos dogo nyenbü sang che to hauko kikei;

¹⁴hoba ai ong haüthükkei khübü pendou shangabü haosi lauyoko hauko kikei.

¹⁵Haosi lenyo lauyoko kijinei, Jisu nyangko loukei hoba haosi yoto haukei,

¹⁶lausikei haosiei ashen.

¹⁷Jisuei haosi to laukei, “Kasi lam sünga ai shangabü lauyoko paida?” Haosi khün the khüman lokei.

¹⁸Haosi yoa müt che, Kleopa nyenbüei hao to jongaikei, “Jerusalem to loubü yenbou yoa tat ngiet ai haüthükkei kho angebüje no ong yingakei lo?”

¹⁹Haoei haosi to laukei, “Ai yingkei?” Haosiei hao to laukei, “Nazaretbü Jisu, ao Mühghaü hoba müt pendou thedanga ngüh hoba kümsileia sei kakbü thuseibü che kikei,

²⁰hoba küneibü ungshedbou shuong hoba khuleibü shuongei hao haitilabü shanga khümbo kuan apbei, hoba hao peiseia thüngkei.

²¹Hobaje künei hao kho Israelbü deletlabü müt che yingkei dogo dambo kiteikei. Lausikei khei ayingtei, aishanga, khüto liman, haüthükan phaia tatei sembounyet yinga.

²²Kün yo kabü yaksa shuong atei kün moktikei. Haoen hee to enyu haukei;

²³haoenei haoeibü mang ühüp, lausikei haoenei khuthük hangangbü mangsang hapbei hoba hao lang kia dogo haoen to lenkei dogo lauko longeikei.

²⁴Hobaje kün yoa kibü at heedang to haukei, hoba yaksa shuongei lenbü tegü kikei, lausikei haoje haoenei ühüp.”

²⁵Haoei haosi to laukei, “Kan ngoubü mütshuong! Thuseibü shuongei lenan kibü pendou to mailemla kan latetche kit khaikei!

²⁶Khrista kho khonkuan phaia haoeibü soneikangbü to atlabü kümsilei aying si?”

²⁷Hobaje Mosa ka khangan hoba thuseibüa sühko haoei Laishiba phang pendou ka hao shangabü dobü wanan lenkei.

²⁸Haoenei haoen hauko kibü sang nyangko loukei, hoba hao saabou haula kibü tegü hanglenkei;

²⁹lausikei haosiei hao haosi yoa setngaila sukojako laukei, “Chasemlam süha hoba chanyu nepla kümda.” Hibü hao haosi yoa sühla haukei.

³⁰Ladang hao haosi yoa setkei haoei wentek jungkei hoba haükuko shaknyinkei hoba haosi la kukei.

³¹Haosieibü nyek khitkei, hoba haosiei hao shenkei; hoba hao haosi jungka mauan apbei.

³²Haosi cheei che to laukei, “Haoei lama seti to joyojinei hoba seti to Laishiba ka ngühtet wanan lenjinei setieibü maang- pon to lambei aying lo?”

³³Haosi khoyam loenkei hoba Jerusalem to ngaikei; khünei haosiei Anthükche kho hapbei hoba haoen yoa lubü shuongkei chela kaman kikei.

³⁴Haoenei, Bunyubou kho tükde langngaia hoba Simon to longan lena dogo lauko kikei.

³⁵Kho tegü Emos kabü müt nyi khoei lama ai haüthükkei hoba wentek shaknyinjinei haosiei hao lai shenkei kho ngetikei.

³⁶Ladang haoen yoa khübü shangabü lauyoko kikei hao haoen yoa lokei hoba haoen to laukei, “Kan yoa sangmai kishi.”

³⁷Haoenei sou hapda dogo daman haoen mokde apyokei hoba hat- yokei.

³⁸Haoei haoen to laukei, “Kan aila kheinyu maangpon shaleyoda? Kanei aila maanga hainyu shuyoda?

³⁹Ngeibü ik hoba you to chühashi; ho ngo yingkei. Kü to meitiashi hoba chühashi; kanei kü to hapbü tegü soushou la phejak si lo aki.”

⁴⁰(Haoei kho lauan phaia haoei haoen la haoeibü ik hoba you lenkei.)

⁴¹Haoenei khün sühkokei maialem, hibü haoen olinbüei shenan maangpangyoko kijinei haoei haoen to laukei, “Kanei han denche shaula kilao?”

⁴²Haoenei hao la ngau thungbü pem che hean kukei.

⁴³Haoei kho sungletkei hoba haoen thedanga shaukei.

⁴⁴Haoei haoen to laukei, “Mosa Ngühkhüm, Thuseibü hoba Nyensang Chiaa kü shangabü dobü pendou loushadlabü kümsilei dogo ngo kan yoa kijinei ngei kan la lenbü kho ho ki.”

⁴⁵Kheijinei haoei Laishiba ditenlabü shanga haoeneibü maangpon ipbukei;

⁴⁶hoba haoei haoen to laukei, “Laishibaei lenbü kho ho ki: Khrista kho khonkujan, hoba sembounyeta haibü ka langngaijan,

⁴⁷hoba hao nyena maangpon sepeibü hoba shabü ap shanga Jerusalem ka khangan phangshuong pendou la songlenlabü.

⁴⁸Khübü aukabü kho kan ki.

⁴⁹Hobaje ngei Kübouei theletbü kan la hautikulabü kia; lausikei thükae ka kan thükto sei alot shongko kan sangnyua setjan.”

⁵⁰Haoei haoen Bethani aeto leilangkei, hoba haoeibü ik shingan haoen haükukei.

⁵¹Haoei haoen haükuko kian hao haoen ka bangkei, hoba khuthük to anlangkei.

⁵²Haoenei hao lembei hoba olinbü yaangei Jerusalem to longeikei;

⁵³hoba haoenei haoeneibü jihsiphai khümbo lembüchema Mühghaü nyen sangko dantikei.