Read Chang Naga LUK 3 Bible Online

LUK 3 - Chang Naga bible

LUK 3

¹Kaisar Tiberia songdak po anthük ngaoboubüa, Pontia Pilat Judeaa governor kijinei, Herod Galila tetrark, haona Filip Itumia si Trakonitaa tetrark, hoba Lusania Abilena tetrark kiteikei.

²Ana si Kaifa nyi thükkabü ungshedbou kiteikei. Kho jihsiphaia yama Zekharia shou Johan jungto Mühghaü ngüh loukei.

³Haoei Jordan kaijembo kibü kaonyek pendou ae shabü ap haplabü shanga maangpon sepeiko baptila songlenko haukei.

⁴Isaia thuseibü lea doan kibü tegü: “Yama cheei ngekbü ngüh, ‘Kanei Bunyubou Lamnyu lamleashi, hoba haoeibü youlam tangshaitham kümashi;

⁵kaonop pendou shenlabü, hoba shongh hoba shonghshou pendou yenlabü, nongbü kuokbü kaoen tangshaibü lam la yeilabü hoba tokbü khuongbü lam lenglengtham yeilabü;

⁶hoba khunak shousi pendouei Mühghaü khümenbü haplabü.’ ”

⁷Haoei hao la baptitila loubü mütshuong to laukei, “Kan pinyu shousi shuong, loulabü maangshat ka satenla kan to aoei thungeikei?

⁸Kan tükde maang- pon sepeiakei dogo kaneibü thechühei lenenashi; hoba kan lolo, ‘Abraham küneibü bou kia’ dogo telau, aishanga ngei kan to lenda, Mühghaüei habü laang shuong ka Abraham shousi shuong longtila thükakei.

⁹Tokei wou kho bunyu chungthema thenakei. Laobou bunyua lang maibü eheklaje khoje aklabü hoba wan to jinlabü.”

¹⁰Noknyühei hao to phekei, “Khülonga künei ai kümla?”

¹¹Haoei haoen to jongaikei, “Aoei mangyuk nyi ki haoei akibou to janyoashi, hoba aoei shausiyung ki haoeikei khei kümashi.”

¹²Khüm hebü shuongkei baptitila loukei hoba haoenei hao to laukei, “Lenbou, künei ai kümjan?”

¹³Haoei haoen to laukei, “Ngühkhümei sakkubü to liman tehe.”

¹⁴Sepai shuongeikei hao to phekei, “Hobaje küneikei ai kümjan?” Haoei haoen to laukei, “Ao kakei nam tukosekko teso ayingsi amlangbüei mü tüatti; kaneibü muei maanghaiashi.”

¹⁵Hobaje mütshuongei chüheiko kijinei, hoba müt pendouei Johan shangabü jembü maang- pona hao Khrista yinglaoma dogo dambo kijinei,

¹⁶Johanei haoen pendou to jongaikei, “Ngei maimaitham kan deia baptikuda, lausikei kü to hau kibou, aoeibü nguoklüh sengkula ngo amu, hao louada. Haoei kan Soushou Saopobü hoba wanei baptikulabü.

¹⁷Haoeibü amshang maisho saüenla hoba jembü nyak bunga thansheila shanga hao ika wan jungakei; lausikei haoei sho shuong ladangkei anyetbü wan to jinlabü.”

¹⁸Kho yoa lubü ngüh juongei haoei mütshuong thungeijangeiko songlenkei.

¹⁹Lausikei haoei Herod tetrark, haonaeibü yak Herodia aoa, hoba haoei kümsilei amaibü kümbü pendou shanga hakeikei.

²⁰Tokei Herodei Johan thüngdang to jinkotham yongbou amaibou kümbei.

²¹Ladang müt pendou baptikhümbei Jisukei baptikei, hoba hao welauko kijinei, müh ipbei

²²hoba Soushou Saopobü dukutuk phatko lotan hao to pakkei. Khuthük ka ngüh cheei joyoko laukei, “No ngei sanoubü Jayangshou. Ngei kato aeibou maanghaida.”

²³Jisuei hao po khujin onjinei haoei jembü khangenbü kümsilei khangkei; dambü tegütham hao Josef shou kiteikei: Heli shou Josef, Mathat shou Heli,

²⁴Levi shou Mathat, Malkhai shou Levi, Janai shou Malkhai, Josef shou Janai, Mathatia shou Josef,

²⁵Amos shou Mathatia, Nahum shou Amos, Esli shou Nahum, Nagai shou Esli, Maat shou Nagai,

²⁶Mathatia shou Maat, Semein shou Mathatia, Josek shou Semein, Joda shou Josek, Joanan shou Joda,

²⁷Resosa shou Joanan, Zerubabel shou Rhesa, Shealtiel shou Zerubabel, Neri shou Shealtiel, Melkhei shou Neri,

²⁸Adi shou Melkhi, Kosam shou Adi, Elmadam shou Kosam, Er shou Elmadam, Joshua shou Er,

²⁹Eliezer shou Joshua, Jorim shou Eliezer, Mathat shou Jorim, Levi shou Mathat, Simeon shou Levi,

³⁰Judas shou Simeon, Josef shou Judas, Jonam shou Josef, Eliakim shou Jonam, Melia shou Eliakim,

³¹Mena shou Melia, Matatha shou Mena, Nathan shou Matatha, Dawid shou Nathan, Jesse shou Dawid,

³²Obed shou Jesse, Boaz shou Obed, Salmon shou Boaz, Nashon shou Salmon, Aminadab shou Nashon,

³³Admin shou Aminadab, Arni shou Admin, Hezrion shou Arni, Perez shou Hezron, Jihuda shou Perez, Jakob shou Jihuda,

³⁴Isak shou Jakob, Abraham shou Isak, Tera shou Abraham, Nahor shou Tera, Serug shou Nahor,

³⁵Reu shou Serug, Peleg shou Reu, Eber shor Peleg, Shela shou Eber, Kenan shou Shela,

³⁶Arfashad shou Kenan, Shem shou Arfashad, Noa shou Shem, Lamek shou Noa, Methusela shou Lamek,

³⁷Enok shou Methusela, Jared shou Enok, Mahalalel shou Jared, Kenan shou Mahalalel, Enosh shou Kenan,

³⁸Seth shou Enosh, Adam shou Seth, Mühghaü shou Adam.