Read Chang Naga LUK 4 Bible Online

LUK 4 - Chang Naga bible

LUK 4

¹Jisu Jordan ka Soushou Saopobüei shenko longeikei. Hao Soushouei

²chalou saonyi leiyeijinei shabü mühghaüei hao takteikei. Khübü chaloua haoei aikei ashau, hoba ladang khübü chalou onkei, hao mühei haiko kikei.

³Kheijinei shabü mühghaüei hao to laukei, “No Mühghaü Shou longa, ho laangei wentek la yeitiashi.”

⁴Jisuei hao to jongaikei, “Laishibaei lauda, ‘Mütei wentek lansanei lang akilabü.’”

⁵Shabü mühghaüei hao leijung angkei hoba insing che kanglanga hao la kaodak sangle pendou lenkei,

⁶hoba haoei hao to laukei, “Ngei kala habü sangle soneikangbü hoba ho songdak hau pendou kulabü; aishanga ho kü la kua, hoba ngei ho ngei pienbü che la kula thükakei;

⁷hibü nyi ngo lema longa ho pendou kaibü yinglabü.”

⁸Jisuei hao to jongaikei, “Laishibaei lauda, ‘Nyi Bunyubou kaibü mühghaü ong lemjan hoba hao ong khangenjan.’”

⁹Haoei hao Jerusalem to leilangkei hoba hao lembüchem chemkhu thüka settikei hoba hao to laukei, “No Mühghaü Shou longa, no lolo haka atashi;

¹⁰aishanga Laishibaei lauda, ‘Haoei khuthük hangangbü no thounoula yantilabü,

¹¹hoba ka you laang chenei ongkei akühtila haoenei no haoeneibü ikmaanga tonletlabü.’ ”

¹²Jisuei hao to jongaikei, “Ho lauakei, ‘Nyi Bunyubou ka Mühghaü tetaktei.’”

¹³Hobaje ladang shabü mühghaüei hao takteibü penkei, haoei hao tuisho shanga apyokei.

¹⁴Jisu Soushou Saopobü seia Galil to ngaikei; hoba hao shangabü ngühlang kaijembü kaonyek pendou ae aakei.

¹⁵Haoei haoeneibü sinagoga lenkei hoba müt pendouei hao sangkei.

¹⁶Hao inthonshang Nazaret to loukei, hoba hao hanghangbü tegü hao Nounyet sinagog to atkei; hoba hao wela lokei.

¹⁷Isaia thuseibü tulai hao la kukei, hoba ladang haoei kho sengkei, haoei ho doan kishang hapbei:

¹⁸“Bunyubou Soushou kü thüka kia, aieilausi shalebü to ngühlang maibü songlenla haoei ngo naangenko pienkei; thüngdang kabü shuong la litibü ngühlang si nyekthubü to nyek khittibü ngühlang ngekletla, hoba naklepbü la solo kuko litila,

¹⁹hoba Bunyubouei maangshikbü po ngekletkula haoei ngo hautikei.”

²⁰Hobaje Jisuei tulai kho tungaian khangenbou la kungaikei hoba setkei; hoba sinagoga kibü pendoueibü nyek hao to thekei.

²¹Haoei haoen to laukei, “Tat ho Lai kaneibü noukhüna loushada.”

²²Hobaje pendouei hao shangabü aukabü kukei hoba haoeibü sembung ka longbü onou ngüh to maangpangkei. “Ho Josef shou aying si?” dogo haoenei laukei.

²³Haoei haoen to laukei, “Küla ho tetentanbü ngüh laukulabü, ‘Maitibou, no lolo maiashi’, hoba laulabü, ‘Ai ong nyi Kapernauma kümbü künei ditkei, kho hanei jembü kaoakei kümashi.’ ”

²⁴Haoei laukei, “Ngühmaia ngei kan to lenda, thuseibü aokei jembü kaodaka asungletda.

²⁵Ngei kan la shangashatko lenda, Elija jihsiphaia Israela ladang po sem lit lak müh khinkei, hoba ladang kaodak pendoua mühsinou longkei, khonei latnyu juong kiteikei;

²⁶lausi dogokei Elija Sidon kaonyek ka Zarepta latnyu to liman ao jungtokei ohauti.

²⁷Elisha thuseibü jihsi- phaia Israela imbü juongnyu kikei lausikei Siriabü Naman to liman ao amai.”

²⁸Hobaje haoenei habü ngüh ditjinei sinagoga kibü shuong pendou khauangkei.

²⁹Haoen loenkei, sangnyu ka shian sattikei hoba laobou shong- ha haoeneibü sangnyu sangan kikei, kho küngkhüm to hao hangkosuko koulangtila shanga leian haukei;

³⁰lausikei hao haoen kanglang ka shetlangkei hoba satkei.

³¹Hobaje hao Galila Kapernaum sangnyu che to loukei, hoba Nounyet haoen la lenkei.

³²Haoei lenbüa haoen maang- pangkei, aieilausi haoei laubü khonei hau thonan kikei.

³³Hobaje sinagoga asaopobü shabü mühghaü soushouei lapbü müt che kikei. Haoei ngüh yaangei ngekkei,

³⁴“Nazaretbü Jisu, nyi kün to ai kümmang sühda? No kün shemtila loukei sai? No aoje ngei ngeakei: No Mühghaüeibü Saopobou kho ki.”

³⁵Jisuei haoen to phangko laukei, “Alemenko hao ka longan apashi!” Kheijinei shabü sou khoei hao lembüchem jenyua phetettikei, hoba hao aleilutiko longan apbei.

³⁶Haoen pendou maang- pangkei, hoba cheei che to laukei, “Haoei laubü kho ai? Aishanga haoei hau hoba sei yoan asaopobü soushou shuongla ngühkhüm kuda hoba haoen longan apda.”

³⁷Hobaje hao shangabü lauyobü kaijembü kaonyek pendou ae phinthonko haukei.

³⁸Haoei sinagog apyokei hoba Simon chem to atkei. Simoneibü yakeibü nyu mangbokei aeibou khonkuko kikei, hoba sao shangabü haoenei hao to joyokukei.

³⁹Sao thedanga loan haoei mangbok to phangko laukei, hoba khoei apyokei. Sao khoyam laksepbei hoba nongnaeko haoen la oknyinkei.

⁴⁰Chanyu nepbo kijinei shat phang pendouei shatbü hao jungto pendouei leibakei. Haoei haoen mütpem weko to ikei shangetkei hoba haoen maitikukei.

⁴¹Shabü soushou shuongkei, “No Mühghaü Shou” dogo ngekyoko longan apbei. Haoei haoen to phangko joyokei hoba haoen la laula shanga asakku, aieilausi hao Messia yingkei dogo haoenei ngekei.

⁴²Ladang lang ngekei haoei apyokei hoba sangliphang kaoen che to haukei; lausikei noknyühei hao lameiko kikei. Haoen hao jungto loukei, hoba haoenei hao haoen jungka asattila haujembei;

⁴³lausikei haoei haoen to laukei, “Lubü sangnyu shuongakei ngei Mühghaü Sangle Ngühlang Maibü songlenjan. Ho shanga ong ngo hautikei.”

⁴⁴Hobaje haoei Jihuda sinagog shuonga lenkei.