Read Chang Naga LUK 5 Bible Online

LUK 5 - Chang Naga bible

LUK 5

¹Ladang noknyüh hao kaijembo aüyoko loukei hoba Mühghaü ngühlang ditkei, hao Genesaret thim junga loan kikei,

²hoba haoei long nyi thimkoa senenan hapbei. Lausikei ngaulapbü dan khübü ka longan haoeneibü tak sakko hapbei.

³Hao long che to atkei, laobou Simoneibü kiteikei, hoba hao to long kho deiko ka leilila phekei. Hao setkei hoba noknyüh la long ka lenkei.

⁴Ladang haoei joyokhümbei haoei Simon to laukei, “Dei haübü aedang to long leiliashi hoba kaneibü takshuong mangto ngaulapla tekashi.”

⁵Simonei jongaikei, “Langyang sünga künei kümbeileikei hoba ai alap, lausikei nyi laualonga ngei takshuong teklabü.”

⁶Ladang haoenei khei kümbei haoenei ngau juongnyu seilepbei, hoba haoeneibü tak jitthetla khangkei.

⁷Haoenei lubü longa kibü haoeneibü eikjambü shuong louan thuiyola ik lepan lenko ngakei. Haoen sühlangkei hoba long nyi ham ngauei shensije long shuong mangto atla khangkei.

⁸Ladang Simon Peterei kho hapbei haoei Jisueibü youa khüpetko laukei, “Kü jungka bangashi Bunyubou, aieilausi ngo shabü müt.”

⁹Aishanga ngau juongnyu lapbei, hao hoba hao jambou shuong pendou maang- pangan apbei,

¹⁰hoba tokei Zebedi shou nyi, Jakob si Johan, aonyi Simon to thujambü shuong kiteikei, maangpangan shembei. Jisuei Simon to laukei, “Tehüt; tou ka jaüan nyi müt laplabü.”

¹¹Haoenei long kaomai to leibakei, pendou apyokei, hoba hao phai sembei.

¹²Hao sangnyu chenei kijinei nyetche imei shenan müt cheei hao hapbei. Haoei Jisu thedanga the khüman khüpetkei hoba sukojako laukei, “Yaangbou, nyi maang angsije nyi ngo saüenkula thükkei.”

¹³Jisuei hao ik shingan hao to meitiko laukei, “Ngei maangangda; no saüenashi.” Kheijineitham imei hao apyokei.

¹⁴Jisuei hao la ngühkhüm kuko laukei, “Aolakei telen, lausikei hauashi hoba no lolo ungshedbou la lenashi, hoba haoen to aukabü shanga Mosaei sakkubü tegü no saüenkubü shanga lemashi.”

¹⁵Lausikei hao shangabü ngühlang aei aei phinthonko haukei, hoba noknyüh yaang hao ngüh ditla hoba haoeneibü shat maila shanga takshatkei;

¹⁶lausikei hao sangliphang to satkei hoba welaukei.

¹⁷Nyetche haoei lenko kikei. Galil, Judea hoba Jerusalem ka loubü Farisi hoba Ngühkhüm lenbou shuongkei khünei setan kikei; hoba maitilabü shanga Bunyubou sei hao yoa kikei.

¹⁸Kheijinei mütshuongei tuokshatei shatbü müt che shena lengbakei hoba hao Jisu thedanga lengan phokula haujembei.

¹⁹Mütshang hangjong haoenei atla athüksije haoen chemdak to nguikei, hoba laangkhüh khünyet danko haoeibü shen yoa jenyu to Jisu thedang to hao tonyantikei.

²⁰Haoeneibü mailem hapan haoei hao to laukei, “Thangbou, ka shabü apbua.”

²¹Ngühkhüm lenbou shuong si Farisibü shuongei damngeilangko laukei, “Mühghaü nyikuko laubü müt kho ao? Mühghaü to liman aoei shabü apbula thükkei?”

²²Jisuei haoeneibü maangpona wetyobü ngekei hoba jongaikei, “Kanei aila kaneibü maangpona dameida?

²³‘Ka shabü apbua’ laubü sokei si, ayingsi, ‘Pienashi hoba paiashi’, dogo laubü sokei?

²⁴Lausikei kaodaka Müteibü Shou la shabü apbula hau kia dogo ngei kan la lenlabü.” Hobaje haoei tuokshatei shatbü to laukei, “Ngei lenkho ditashi: pienashi, kaibü shen peashi hoba chem to ngaiashi.”

²⁵Hao haoen thedanga phühde pienkei, hoba ainei hao yepbei kho haubakei, hoba Mühghaü la soneikangbü kuko chem to ngaikei.

²⁶Hobaje haoen pendou maangpangkei, hoba Mühghaü la soneikangbü kukei, hoba haoenei aeibou hatko laukei, “Tat senei maangpanglabü hapa.”

²⁷Kho phaia hao satkei hoba haoei Levi nyenbü khüm hebou che heshang chema setan hapbei, hoba haoei hao to laukei, “Küphai semashi.”

²⁸Haoei pendou apyoan loenkei hoba hao phai sembei.

²⁹Hobaje Jisu shanga Leviei hao chema lem yaang huiletkei, hoba khonei khüm hebü shuong mütshang yaang hoba lubü shuong dogo haoen yoa nyak shaushanga setan kikei.

³⁰Farisi hoba haoeneibü Ngühkhüm lenbou shuongei hao eikshuong khulimbo nyamnyambo laukei, “Aila kanei khüm hebü si shabü shuong yoa shaudayungda?”

³¹Jisuei haoen to jongaikei, “Maisho kibü shuong shanga ayingko shatbü shuong shanga daktar khamda.

³²Saopobü shuong ayingko shabü shuong maangpon sepeibü to ngala ngo loukei.”

³³Müt atei hao to laukei, “Johaneibü eikshuong hoba Farisi shuongei hanghangleko nyengko welauda: lausikei ka eikshuongei shauda yungda.”

³⁴Jisuei haoen to laukei, “Kanei chemkanbou haoen yoa kian chemkanbou thangbou shuong mühei nyengtila thükkei sai?

³⁵Lausikei chemkanbou haoen yo ka ngailanglabü, kheijinei haoenei mühei nyenglabü.”

³⁶Haoei haoen la ngühphatbü che lenkei: “Aoeikei nei haanbü ka jitan nei hangbüa athipda; khei kümsije khoei nei haanbü ka jitan sungbü kho hangbü to abaulabü.

³⁷Hobaje aoeikei ih haanbü phekhon shongmok hangbüa atakda; khei kümsije ih khoei phekhon shongmok kho thalabü. Hobaje kho saangkhümlabü, hoba phekhonkei leilulabü.

³⁸Lausikei ih haanbü kho phekhon shongmok haansangmai to jinjan.

³⁹Hobaje aoeikei ih hangbü yungan phaiaje haanbü amangsühda aishanga haoei lauda, ‘Hangbü kho ong maibou.’ ”