Read Chang Naga LUK 6 Bible Online

LUK 6 - Chang Naga bible

LUK 6

¹Nounyet hao whetlaak danko paiko kiteikei, hoba haoeibü eikshuongei youman yetan sungan ika nyuian shauko hapbei.

²Farisibü atei laukei, “Aila kanei ngühkhüm lulimbo Nounyet leilutida?”

³Jisuei haoen to jongaikei, “Dawid hoba hao you jambü shuong mühei haijinei haoei ai kümbei kanei ladangkei aweou lo?

⁴Hao Mühghaü chem to atkei, hoba Mühghaü thedanga phobü Wentek, laobou ungshedbou to liman lubüei shaujan aying, kho haoei sungkei hoba shaukei, hoba hao youjambü shuong la kukei.”

⁵Haoei haoen to laukei, “Müteibü Shou kho Nounyet Bunyubou ki.”

⁶Lubü Nounyet hao sinagog to atkei hoba khünei lenko kikei. Khünei mae ik sibü müt che kiteikei.

⁷Hobaje Ngühkhüm lenbou shuong si Farisi shuongei haoei Nounyet maitikuasaoje dogo, hao attila shanga aukabü lambo Jisu to chühko kiteikei.

⁸Lausikei haoei haoeneibü dambü ngeenkei hoba iksibü müt khüto laukei, “Pienashi hoba jenyua loashi.” Hao pienkei hoba khünei lokei.

⁹Jisuei haoen to laukei, “Ngei kan to pheda, Nounyet maibü kümla si amaibü kümla sakkuda? Langkei püetla si kho haitila sakkuda?”

¹⁰Haoei haoen pendou to chühkei hoba müt khüto laukei, “Kaibü ik shingashi.” Haoei khei kümbei hoba haoeibü ik maian apbei.

¹¹Lausikei haoen aeibou khauangkei hoba haoenei Jisu to ai kümsi maila dogo sangkukei.

¹²Khübü chaloua hao welaula shongh to angkei, hoba haoei langyang sünga Mühghaü to welauko dantikei.

¹³Ladang langngekei haoei hao eikshuong hao jungto ngakei, hoba haoen yoa haoei anthüknyi pienan haoen to Youkoikjai shuong dogo ngakei:

¹⁴Simon, ao to Peter laukei, hoba haona Andria, Jakob si Johan, Filip si Bartholomia,

¹⁵Mathi si Thoma, Alfia shou Jakob, Zealot nyenbü Simon,

¹⁶Jakob shou Judas hoba Judas Iskhariot, ao huonbou yeikei.

¹⁷Jisu haoen yoa yankei hoba yo chenei lokei. Hobaje hao eikshuong mütshang yaang, Judea kaodak hoba Jerusalem pendou aeka hoba Tair si Sidon yungko ka noknyüh yaang,

¹⁸hao ngüh ditla hoba haoen shat maila shanga loukei; hoba aoyou shabü souei khonsakko kikei haoen maitikei.

¹⁹Noknyüh pendouei hao to meitila lameikei, aishanga hao ka sei longko hoba pendou maitiko kikei.

²⁰Haoei hao eikshuong to chühangtikei hoba laukei, “Kan shalebü olinbou; aishanga Mühghaü sangle kaneibü.

²¹Kan tou mühei haiko kibü shuong olinbou; aishanga kan senyüh shemlabü. Kan tou haapbü shuong olinbou; aishanga kan nyilabü.

²²“Ladang Müteibü Shou nyen laüa mütei kan mangsenlaje, hoba ladang haoenei haoen yoka kan kuktilaje, hoba kaneibü nyen amaibü laueiko aplaje, kan olinbou.

²³Khünyet maang haiashi, hoba olinbüei saiyashi; aishanga khuthüka kaneibü jongsak yaangbü ki. Haoeneibü pisibou shuongei thuseibü shuong to kheinyu jungeikei.

²⁴‘Lausikei kan keibü shuong ügütü; aishanga kanei kaneibü olinbü lekhüma.’

²⁵‘Kan tou photetnyu kibü shuong ügütü; aishanga kan mühei hailabü.’ ‘Kan tou nyibü shuong ügütü; aishanga kanei manghaaplabü hoba haaplabü.’

²⁶“Ladang müt pendouei kan shangabü ngüh maibü laulaje ügütü. Aishanga haoen pisibouei amlangbü thuseibü shuong to khei jungeikei.

²⁷“Ngei kan kü ngüh ditbü shuong to lenda: Kaneibü dangbou to sanouashi, kan mangsenbü shuong to maibü jungeiashi,

²⁸kan to khükbüokbü shuong haükuashi, kan amaiko jungeibü shuong shanga welaukuashi.

²⁹Atei kaneibü om to ipalonga hao la ji ae khokei sepeikuashi, hoba kaibü nei sungbou ka mang- yukkei tesenet.

³⁰Kaka hibü pendou la kuashi, hoba kaibü peisilei langbou ka tehingai.

³¹Mütshuongei kan to lai jungeitimang sühda kho tegü kanei haoen to jungeiashi.

³²Kanei kan to sanoubü shuong to ong sanoua longa kanei ai nyensang hapla? Shabü mütshuongeikei haoen to sanoubü shuong to ong sanoungaida.

³³“Hobaje kan to maibü dan to kanei maibü küma longa kanei ai nyensang hapla? Shabü shuongeikei khei kümda.

³⁴Hobaje shemenlabü dogo dambü la kanei lotkua longa kanei ai nyensang hapla? Haoenei khüjoche hapmailabü shanga shabü shuongeikei shabü shuong la lotkuda.

³⁵Lausikei kaneibü dangbou sanouashi, haoen to maibü kümashi, hoba aikei hapmaila adambo lotkuashi; hoba kaneibü pailetbü yaang kilabü, hoba kan Thükkabou Mühghaü shousi shuong yeilabü aieilausi nyensang akubü hoba amaibü to haoei üeisanou ki.

³⁶Kaneibü Bou ailai üeisanou ki kho tegü üeisanou kishi.

³⁷“Mümat tejem, hoba kan matkei ajemlabü. Kanei mü tüatti, hoba kankei üattilabü. Ap kuashi hoba kanlakei ap kulabü.

³⁸Kuashi, hoba lubüeikei kan la kulabü; haoenei kan la shangko, hokeiko, hoba sopbojaiko kulabü; aishanga nyi mü shanga jungeibü takletbü khonei kala haungaikulabü.”

³⁹Haoei haoen la ngühphatbü che lenkei: “Nyekthubü cheei lubü nyekthubü leila thükkei lo? Ham püngkhün to üatetlep lo?

⁴⁰Eik che kho haoeibü lenbou thüka aying; lausikei ladang eik weko penbüsoubü yeilaje, jembü lenbou tegü kilabü.

⁴¹“Aila nyi jembü nyek kabü inphou shangabü adamenko, kaibü jaisina nyeka thamngu nepbü to chühkuda?

⁴²Ayingsi nyi kaibü jembü nyek kabü inphou kho üpbo kaibü jaisina to, ‘Jaisina, ngei ka nyek ka tham kho apbukho’ dogo lai laula thükkei? “Hibüyoubü, nyi jembü nyek ka shaang inphou kho apashi hoba kheijinei ong nyi kaibü jaisina nyeka kibü thamngu kho apbula nyi shangashatko haplabü.

⁴³“Bunyu maibüei buhek amaibü ehekkuda; ayingsi bunyu amaibüei buhek maibü ehekkuda.

⁴⁴Bunyu weko hekei shenda; aishanga mütei jaklong ka bhuk akheida, ayingsi haoenei biham ka semlühhek akheida.

⁴⁵Müt maibüei jembü maangpona maibü thanan phobü ka maibü sungenda, hoba müt amaibüei jembü maangpona amaibü thanan kibü ka amaibü sungenda. Aishanga aiei maangpon shenetnyu ki kho jembü sembungei lauda.

⁴⁶“Aila kanei kü to, ‘Bunyubou, Bunyubou’ dogoje ngada hoba ngei lenbü akümda?

⁴⁷Aoyou kü jungto louda hoba kü ngüh ditda hoba khübü jungeida, hao ao phatkei kho ngei kan la lenlabü.

⁴⁸Hao laang thüka haüko jakan chem huongbü müt che phatkei. Ladang yungsen loukoukei, kho deiei chem to thangyolangkei, lausikei anyaakei aieilausi kho aeibou maian dangkei.

⁴⁹Lausikei aoei ditda hoba ajungeida, hao huongshang ajakenko kaomaia chemdangbü müt che phatkei. Kho chem to yungsenei thangkei, hoba khoyam nopthetko tuongkei, hoba kho chem lusakbü kho yaang kiteikei.”