Read Chang Naga LUK 7 Bible Online

LUK 7 - Chang Naga bible

LUK 7

¹Mütshuongei ditko haoei habü pendou laukhüman phaia hao Kapernaum to atkei.

²Saongao thükkabouei maangshikbü sambü che kikei; hao shatko kikei hoba hailabü lele kikei.

³Saongao thükkabouei Jisu shangabü ditkei hoba Jihudabü jaishou shuong hao jungto hautiko, haoeibü sambü püetkula loushi dogo sukeijakei.

⁴Haoen Jisu jungto loukei hoba hao to aeibou sukojako laukei, “Hao shanga ho kümsilei nyi kümla muakei;

⁵haoei kün mütli sanouda hoba kün la sinagogkei haoei dangkukei.”

⁶Jisu haoen yoa meimeijung haukei. Hao chem ka lalok ohauko kijinei saongao thükkabouei thangbou shuong hautiko laukei, “Yaangbou, no ailakei khon tesak, aishanga no kü chemsophang to lotla ngei amukei.

⁷Khoei ngo ka jungto loula ongkei amukei dogo ngei dambei; lausikei ngüh kho ong lenshi hoba kü sambü mailabü.

⁸Aishanga ngokei kü phanga sepai phoan songdak hau phanga kibü müt che ki. Ngei che to, ‘Khou’, dogo lauda hoba hao hauda; hoba lubü che to, ‘Kaiya’, dogo lauda hoba hao louda; hoba kü sambü to, ‘Ho kümashi’, lauda hoba haoei kho kümda.”

⁹Ladang Jisuei kho ditkei, hao hao to maangpangkei. Haoei hao phai sembo kibü noknyüh ae sepeikei hoba laukei, “Ngei kan to lenda, Israela mangkei ho tegü mailem yaangbü ngei ühüpou.”

¹⁰Ladang hautibü shuong chemto ngaikei haoenei sambü kho maian hapbei.

¹¹Kho phaia hao Nain nyenbü sangnyu che to haukei, hoba hao eikshuong si mütshang yaangbü che hao yoa haukei.

¹²Hao sangnyu bakou lousühbüsi, haibü müt che lengbakei; hao kho latnyu cheeibü jayangshou kiteikei. Hobaje sangnyu ka mütshang yaang sao yoa kikei.

¹³Ladang Jisuei sao hapbei haoei sao to sanouko chühkei, hoba sao to laukei, “Tühaap.”

¹⁴Hao thedang ae haukei hoba mang lengshang to meitikei, hoba pebü shuong atopeiko lokei. Haoei laukei, “Heshoubou, ngei kato lenda, pienashi.”

¹⁵Haibou kho lokei hoba joyola khangkei; hoba Jisuei haonyu la kukei.

¹⁶Müt pendou hatbüei shenkei hoba Mühghaü la nyensang kuko laukei, “Sen yoa thuseibü yaangbü che longakei, hoba Mühghaüei hao mütshuong pean chühda.”

¹⁷Hao shangabü ngühlang kho Judea khümbo hoba kaijembo kibü kaonyek pendou to aakei.

¹⁸Johaneibü eikshuongei hao la khübü pendou shangabü lenkei; hoba Johanei haoeibü eik nyi ngakei

¹⁹hoba haosi Jisu jungto, “Loula kibou kho no si ayingsi künei lubü che shanga haiteila?” dogo phela hautikei.

²⁰Mütshuong hao jungto loukei hoba laukei, “Johan Baptibouei kün ka jungto, ‘Loula kibou kho no si, ayingsi künei lubü che shanga haiteila?’ dogo phela hautikei.”

²¹Kho jihsiphaia haoei shat phang phanga shatbü nyatbü hoba shabü souei shatbü juongnyu maitikei, hoba haoei nyekthubü juongnyu haptikukei.

²²Haoei mütshuong to laukei, “Ngaiashi hoba kanei ai hapbei hoba ditkei kho Johan la lenashi: nyekthubü shuongei hapda, sokebü paida, imbü shuong saüenda, obangbüei ditda, haibü shuong langngaitida hoba shalebü shuong to Ngühlang Maibü songlenda;

²³hoba ao kü hangshong aphaiyetda haoei haükei.”

²⁴Ladang Johaneibü ngühlang künbü shuong ngaikei, Jisuei noknyüh to hao shangabü laukei, “Ai to chühla kan yam to haukei? Yeiei thakdu soueibü chühla si?

²⁵Lausikei kan aito chühla haukei? Inyaibü neisimei lebü müt che to chühla sai? Aoyou lailaibü neisimei leda hoba apsilebü langkeia haangda haoen choba chema ki.

²⁶Lausikei kan ai chühla haukei? Thuseibü che sai? Haü, ngei kan to lenda, thuseibü che to khaibou,

²⁷Laishibaei lenbü ho hao shangabü ki: ‘Chühashi, ngeibü ngühlang künbou, aoei ka thedanga ka lamnyu lamlelabü, hao ka thedangto ngei hautida.’

²⁸“Ngei kan la lenda, yaksaei bukbü yoa Johan to yaangbou aki; lausikei Mühghaü Sanglea hanbou kho hao to yaangbou ki.”

²⁹(Ladang haoenei kho ditkei, khüm hebü shuong yoan müt pendouei Mühghaü la nyensang kukei, aishanga haoen Johan Baptibouei baptikukei.

³⁰Lausikei haoei abaptikubü Farisi shuong si Ngühkhüm lenbou shuongeije haoen shangabü Mühghaü lamthen asunglet.)

³¹“Khülonga, aito ngei ho meten mütshuong takteila? Haoen ai phatkei?

³²Haoen namyakshanga cheei che to ngako, ‘Künei chia teibü lauko kan la pithung metkukei, hoba kanei atom; künei manghaap chia laukei, hoba kanei ühaap.’ dogo lauko setbü nashousi shuong phatkei.

³³Aishanga Johan Baptibou wentek ashauko hoba ih ayungko loukei hoba kanei, ‘Hao to shabü soushou kia’ dogo lauda.

³⁴Müteibü Shou shauko yungko loukei hoba kanei, ‘Chühashi, shaumang yungmang müt, ih yungbou, khüm hebou si shabü shuongeibü thangbou’, dogo lauda.

³⁵Lausikei songsihon kho saoeibü shousi shuongei aukabü kuenda.”

³⁶Farisibü müt cheei hao yoa shaulayungla hao huikei; hoba hao Farisibou chem to atkei hoba setkei.

³⁷Kho sangnyua shabü langkeia kibü yaksa che kiteikei. Saoei hao Farisibü chema shaushang yungshanga setakei dogo ngekei hoba saoei ponlem onang ninulaang thungdou che sungbakei.

³⁸Sao hao phainei haapbo lokei, hoba saoeibü nyeksiei haoeibü you nemla khangkei. Saoei saoeibü khulouei kho haman apbukei, hoba you to shepbo, ponlem onang naangkukei.

³⁹Ladang hao leiyetbou Farisibouei kho hapbei, haoei hao lolo laukei, “Ho müt thuseibü che tegüje hao to meitinyu kho ao hoba ailaibü sao haoei ngelabü. Sao shabü sao dogo haoei ngejan.”

⁴⁰Jisuei hao to jongaikei, “Simon, ngei ka to aiche lenlabü kia.” Haoei laukei, “Lenbü, Lenbou.”

⁴¹“Lotkubou müt che la sangh thebou müt nyi kikei. Cheei nam saongao hoba cheei anjinsem thean kikei.

⁴²“Ladang haosiei shemla ai akitei, haoei haosi ham la sangh kho apbukei. Haosi yoa aoei hao to aei sanoula?”

⁴³Simonei jongaikei, “Sangh juongbou thebouei, dogo ngei damda.” Jisuei hao to laukei, “Kho tükde!”

⁴⁴Yaksanyu aei sepeian haoei Simon to laukei, “Nyi kho yaksa hapdalao? Ngo ka chem to lotkei. Nyi kü you shanga dei aku; lausikei saoeibü nyeksiei kü you nemtikei hoba saoeibü khulouei haman apbukei.

⁴⁵Nyi kü sembung to ashep; lausikei saoeije ngo lotsilengko küyou shepbü athak.

⁴⁶Nyi kü khua onang anaangku; lausikei saoei kü youa ponlem naangkukei.

⁴⁷Khoei ngei ka to lauda, sao shabü juongnyu kiasikei apbuda, hoba ho saoeibü sanou yaangbou aukabü ki. Lausikei ao la hansho ong amai apbuda haoei hansho ong sanouda.”

⁴⁸Hobaje Jisuei sao to laukei, “Ka shabü apbuda.”

⁴⁹Hao yoa shaushanga setan kibü shuongei haoen lolo laungaikei, “Shabü to liko apbulabü müt kho ao?”

⁵⁰Haoei yaksanyu to laukei, “Kaibü mailemei no khümena. Haksoa ngaiashi.”