Read Chang Naga LUK 8 Bible Online

LUK 8 - Chang Naga bible

LUK 8

¹Kho phaia Jisu sangnyu hoba sang shuong to hauko Mühghaü Sangle Ngühlang Maibü phinthonko songlenkei. Anthüknyi kho hao yoa haukei,

²hoba tokei yaksa shuong aoyou ka shabü sou shian sattia hoba shat maitikua, haoenkei yoan kiteikei. Khübü kho Magdalin nyenbü Mari, ao ka shabü sou nyet satkei;

³Herod chema thükkabou sambou Khuza yak Joanna, Sussana hoba lubü juongnyu yoan kikei. Khübü sao shuongei haoen ik ka longbüei ong Jisu hoba hao eikshuong pangteikei.

⁴Ladang mütshuong yaang takshatkei hoba sangnyu juong ka mütshuong hao jungto yangkei, haoei haoen to ngühphatbüei laukei,

⁵“Youli saakbü che haoeibü sek to youli saakla koukei. Haoei saakjinei youli at lamkhonga shatkei hoba youei nakmaukei hoba mühkabü aushuongei hekhümbei.

⁶Youli at laangnyina shatkei, hoba ladang kho yembei yuian apbei aieilausi khünei nindei atakkei.

⁷Lubü youli jaklaaka shatkei, hoba jakham chingkei hoba naülepbei.

⁸Youli at kaomaia shatkei hoba yembei, hoba saongao onko lang hekkei.” Haoei kho laukhüman phaia ngekkei, “Ao nou yembei, haoei ditashi.”

⁹Hao eikshuongei kho ngühphatbü tetlabü ai dogo hao to phekei.

¹⁰Haoei laukei, “Mühghaü Sangle huphang ngüh ngela kan la kuakei, lausikei lubü shuong toje haoenei chühkokei aditenlabü lele ngei haoen to ngühphatbüa lauda.

¹¹“Ngühphatbü tetlabü ho: Youli kho Mühghaü ngühlang.

¹²Lamkhonga atbü kho ngüh ditbü shuong. Haoen mai alemtila hoba akhümentila shanga shabü mühghaü louan haoeneibü maang- pon ka ngüh kho langkuda.

¹³Laangnyina atbü youli tetlabü kho haoenei ladang ditda, olinbüei ngüh kho sungletda, lausikei haoen to li üatkei; hibü haoenei longche mailemda, hoba takteibü jihsiphaia haoen atetda.

¹⁴Jaklaaka atbü youli tetlabü kho, haoenei ngüh kho ditkei, lausikei haoen haujinei, maangmau hoba nyaksinam hoba ho kaodak olinbüei naülepda, hoba lang ehekda.

¹⁵Kaomaia shatbü youli maibü tetlabü kho, müt maibü hoba lanbü shuongei ngüh kho ditkei, haoenei maangpona kaangkhühtham sungletkei hoba youman asung shongko natenda.

¹⁶“Aoeikei wanthung sapan kam maanga aküplepda, ayingsi shenphanga aphoda. Lausikei chem to lotbü shuongei ngesakbü haplabü lele haoei kho wanthung anshanga phoda.

¹⁷Aishanga akhuokenlabü lele aikei huan aki hoba angelabü hoba tang akhitlabü lele aikei aki.

¹⁸Hibü kanei ai ditdaje maangkuashi; aishanga aoei ki hao la kuyolabü, hoba aoei aki, haoei ai ki dogo damda, khokei hao ka langlabü.”

¹⁹Haonyu si haonasi shuong hao jungto loukei, lausikei mütshang yaangbü ka hao nyangko ohauen.

²⁰Hao to, “Kanyu si kanasi shuong tanga loakei, hoba haoenei no haüyomang sühda”, dogo laukei.

²¹Haoei haoen to jongaikei, “Aoyouei Mühghaü ngühlang ditda hoba khübü jungeida kho künyu hoba künasi shuong.”

²²Nyetche hao hoba hao eikshuong long che to atkei, hoba haoei haoen to laukei, “Senei thim kho khatko thi aedang to haukho.” Hibü haoen meimeijung likei.

²³Haoen haujinei hao nyeket shikei. Hobaje thim khonei yeinak lotkei, hoba haoeneibü long deiei shenda yingsije haoen thusheda kikei.

²⁴Haoen louan hao kangan pitikei hoba laukei, “Lenbou, Lenbou, sen nyemda.” Hao pikei hoba yei si deishou to hakkei. Kheijinei yeinak thakkei, hoba jemetshouko kikei.

²⁵Haoei haoen to laukei, “Kaneibü mailem lan ki?” Haoen hatkei hoba maang- pangkei, hoba haoen si haoen lauyokei, “Ho ao? Haoei yei si dei la mangkei ngühkhüm kuda, hoba haoenei hao ngüha leda.”

²⁶Haoen Galil tangküng aenei kibü Gerasa kaonyek sühlangkei.

²⁷Hao kao to lotjinei kho sangnyu kabü müt che louan hao to haüyokei. Hao to shabü sou shuong kikei hoba halokche haoei neisimei aleko kikei; hoba hao chema akiko heelaaka yepbo paikei.

²⁸Ladang haoei Jisu hapbei, haoei ngekkei, hoba hao thedanga khüpetkei hoba ngüh yaangbüei hao to laukei, “Thükkabou Mühghaü Shou, Jisu, nyi aila ngo peksekda? Ngo ashiakoela ngei kato sudajada.”

²⁹Aishanga Jisuei shabü soushou kho hao ka longan apla shanga ngühkhüm kukei. Hanghangko hao lapbei hoba hao yangmen hoba thüngdang namei khühan lombü phangakei phoko lekei; lausikei haoei phenbü kho thettikei hoba shabü soushouei hao yam to shian koutiko kikei.

³⁰Jisuei hao to laukei, “Ka nyen ai?” Haoei laukei, “Juongnyu”, aieilausi shabü sou juongnyu hao to atan kikei.

³¹Haoenei hao to haoen thonshang akibü püngkhün to tohautikai dogo sukeijakei.

³²Khünei shongha ukshuong lamshauko kiteikei; hoba shabü sou shuongei haoen khüto atla ngühkhüm kubü dogo hao to sukeijakei. Hobaje haoei sakkukei.

³³Shabü sou shuong uk shuong to atkei, hoba uk shuong laanglip to nyuyoko koulangan thima shemetkei.

³⁴Ladang lombou shuongei kho hapbei haoen satyokei hoba sangnyu si kaonyeka kho phinthonkei.

³⁵Hobaje ai haüthükkei khüto chühla mütshuong yangbakei. Haoen Jisu jungto loukei, hoba shabü sou shuong longan apbou müt kho neisimei lean Jisu junga setan hapbei, hoba haoen hatyokei.

³⁶Hobaje kho hapbü shuongei shabü souei lapbü müt lai khümenkei, kho haoen la lenkei.

³⁷Gerasin kaon- yek kaijembo kibü müt pendouei haoen apyoan satla hao to sukeijakei, aishanga haoen aeibou hatenan apbei. Hibü haoen long to atkei hoba ngaikei.

³⁸Shabü sou longan apbou müt khoei hao yoa kila sukeijakei, lausikei haoei hao to,

³⁹“Kan chem to ngaiashi, hoba Mühghaüei ka shanga ai kümbeije kho lenashi”, dogo lauko ngaitikei. Hibü hao ngaikei hoba sangnyu pendoua Jisuei hao shanga ai kümbei kho phinthonkei.

⁴⁰Jisu longeijinei noknyühei olinko sungletkei, aishanga haoen pendouei hao chüheiko kikei.

⁴¹Sinagoga setshangbou, Jairas nyenan müt che loukei. Hao Jisueibü youa khüpetkei hoba hao to hao chemto loula sukeijakei,

⁴²aieilausi haoei nouyangshou che ong po anthüknyi nashou kikei, hoba sao haiko kikei. Hao haujinei noknyühei hao omlepbei.

⁴³Hobaje yaksa che po anthüknyi sii koubüei shatko kikei, hoba saoei daktar shuong shanga saoei kibü pendou meisikei, aoeikei sao amaitien.

⁴⁴Sao phaito loukei hoba haoeibü neiyik to meitikei, hoba khoyam sao sii koubü thakkei.

⁴⁵Jisuei laukei, “Aoei kü to meitikei?” Aoeikei atheku, hoba Peterei laukei, “Lenbou, noknyühei no kailepan thungda.”

⁴⁶Lausikei Jisuei laukei, “Atei kü to meitia; aishanga kü ka sei longa dogo ngei ngekei.”

⁴⁷Ladang saoei uhuenlabü dogo ngekei, sao lühjilühko louan hao thedanga khüpetkei. Müt pendou thedanga saoei hao to aila meitikei kho wanan lenkei, hoba sao khoyam maian apbü shangabü khokan lenkei.

⁴⁸Haoei sao to laukei, “Nashounyu, kaibü mailemei no maia. Haksoa ngaiashi.”

⁴⁹Haoei lauko kijinei sinagog bunyu chem ka müt at louan laukei, “Kashou nouyangshou haia. Lenbou kip tejimti.”

⁵⁰Jisuei kho ditkei hoba hao to laukei, “Tehüt. Maiong lemashi, hoba sao maian aplabü.”

⁵¹Ladang hao chem to loukei haoei Peter, Johan, Jakob hoba naeibü nyusibou to liman aokei hao yoa atla asakku.

⁵²Müt pendou sao shanga manghaapbü ka haoeneibü khuku to jangngailangko haapyoko shaian kikei. Haoei laukei, “Tühaap. Sao ühaikei; sao yepbei.”

⁵³Sao haia dogo ngebü ka haoenei hao la nyikukei.

⁵⁴Haoei saoeibü ika jenan ngekko laukei, “Nashounyu, pienashi.”

⁵⁵Saoeibü soushou longeikei hoba sao khoyam pienkei. Sao la denche okashi dogo haoei sakkukei.

⁵⁶Saoeibü nyusibou maangpangkei, lausikei haüthükbü kho aola alenla shanga haoei sakkukei.