Read Chang Naga LUK 9 Bible Online

LUK 9 - Chang Naga bible

LUK 9

¹Jisuei Anthüknyi kho chela ngashaikei hoba haoen la shabü sou pendou shian sattilabü si shatbü maitilabü sei si hau kukei;

²hoba haoei haoen Mühghaü Sangle phinthonla si shatbü maitila hautikei.

³Haoei haoen to laukei, “Wakou shanga, ju ayingsi neikong, ayingsi wentek, ayingsi nam, ayingsi mangyuk nyibang aikei tekün.

⁴Kan ao chem to ong atlaje, kanei apyoan asatshongko khünei thüngashi.

⁵Hobaje laju- cheei kan asungletlaje, ladang kho sangnyu ka kan bangda, haoen khulimbo kaneibü you ka thamngu kangan apashi.”

⁶Haoen bangkei hoba sang che ka sang che to shonko Ngühlang Maibü songlenko hoba haushang pendoua shatsinyat maitikuko haukei.

⁷Herod tetrarkei ho kümbü pendou shangabü ditkei. Hao aeibou maanga shukei, aieilausi Johan haibü ka langngaia dogo atei lauko kikei,

⁸atei Elija longakei dogo, hoba atei shangiedbü thuseibü yo ka che longeiakei dogo lauyoko kikei.

⁹Herodei laukei, “Ngei Johan khu thetkei; lausikei ao shangabü ngei hainyu ditda?” Hobaje hao to chühla haoei haujembei.

¹⁰Youkoikjai shuong kho longeikei hoba haoenei kümbüleibü pendou Jisu la lenkei. Haoei haoen kokshoua Bethsaida nyenbü sangnyu che to leilangkei,

¹¹lausikei noknyühei lapenan hao phai sembei. Haoei haoen sungletkei hoba Mühghaü Sangle shangabü lenkei, hoba aoyou maitilabü khaman kikei haoen dan maitikukei.

¹²Chasemlamto Anthüknyi kho loukei hoba hao to laukei, “Kaijembo kibü sangnyu si sangshuong to hauan sühshang si shausiyung hapenlabü lele noknyüh kho lintian apashi, aieilausi sen hanei sangliphang kaoen chenei kia.”

¹³Haoei haoen to laukei, “Kanei bouje haoen la denche okashi.” Haoenei laukei, “Künei wentek ngao hoba ngau penyi to liman aki. Kün hauan habü mütshuong pendou shanga shausiyung jekla sai?”

¹⁴Aishanga haoen müt hajar ngao thüng kiteikei. Haoei hao eikshuong to laukei, “Haoen anjinsem bang san sana settiashi.”

¹⁵Haoenei khei kümbei hoba haoen pendou setkhümbei.

¹⁶Haoei wentek ngao hoba ngau penyi kho jungan khuthük to chühangtian phaia haükukei hoba shaknyinkei; hoba haoei noknyüh junga phokula shanga hao eikshuong la kukei.

¹⁷Haoen pendouei photko shaukei. Netshou heshaikei hoba khoei kam anthüknyi shenkei.

¹⁸Jisu sanshoua welaujinei eikshuongkei hao yoa kiteikei, hoba haoei haoen to laukei, “Noknyühei ngo ao dogo lauda?”

¹⁹Haoenei jongaikei, “Johan Baptibou; atei lauda, Elija, hoba ateije shangiedbü thuseibü che longeikei dogo lauda.”

²⁰Haoei haoen to laukei, “Lausikei kanei ngo ao dogo lauda?” Peterei jongaikei, “Mühghaüeibü Khrista.”

²¹Haoei kho aola alenla shanga haoen la kaangko ngühkhüm kukei,

²²hoba laukei, “Müteibü Shou aeibou khonkujan, hoba jaishou shuong si yaangenbü shuong si ungshedbou si Ngühkhüm lenbou shuongei inletlabü, hoba haitilabü hoba sembounyet langngailabü.”

²³Haoei mütpem weko to laukei, “Müt atei kü phai loumang sühalonga, haoei jembü lolo thepetashi, chaangboua haoeibü peisei peashi hoba kü phai semashi.

²⁴Aishanga müt cheei hao langkei püetmang sühalonga haoei kho maulabü; lausikei müt cheei kü nyen shanga hao langkei mausije haoei kho püetlabü.

²⁵Aishanga müt cheei kaodak khümbo pailetan phaia jembü langkei mautojana longa ai ku pailetla?

²⁶Aishanga aoei ngo hoba kü nyen shangabü the alenenlaje, Müteibü Shou jembü soneikangbü, Boueibü soneikangbü hoba saopobü khuthük hangangbü soneikangbüa loujinei hao shangabü the alenenlabü.

²⁷Ngei kan to ngühmaia lenda, hanei loan kibü yoa atei Mühghaü Sangle ühüpshongko haibü jepan achühlabü.”

²⁸Khübü ngüh lauan chalou set thüng danan phaia haoei Peter, Johan hoba Jakob leikei hoba shongh to welaula angkei.

²⁹Hao welaujinei hao the chühla son phangche yeikei hoba haoeibü neisimei thuphaitham hoba lailaitham yeikei.

³⁰Hobaje chühashi, müt nyi, Mosa si Elija hao to joyoko kikei.

³¹Haoen soneikangbüa longkei hoba hao bangbü danko Jerusalema Mühghaü lamthen loushadla kibü shangabü joyokei.

³²Peter hoba hao yoa kibü shuong aeibou ngak longkei, lausikei haoen ladang pienkei haoeneibü soneikangbü si hao yoa loan kibü müt nyi kho hapbei.

³³Mosa si Elijaei Jisu apyoan satjinei Peterei hao to laukei, “Lenbou, sen hanei kila aeibou maikei! Senei hanei dip sem, ka shanga che, Mosa shanga che, hoba Elija shanga che, dogo lekho.” Haoei ai laukeije haoei ange.

³⁴Haoei kho lautoua sangmei che lotan haoen khuilepbei; hoba haoen sangmei maangto atjinei haoen hatkei.

³⁵Sangmei ka ngüh che longko laukei, “Ho ngei pienbü Shou; hao to ditashi.”

³⁶Ladang sangmeiei ngüh joyokhümbei, Jisu mütpem hapbei. Haoenei ngüh üang hoba haoenei ai hapbei aotokei khübü chaloua alen.

³⁷Nyibounyet, ladang haoen shongh ka louyenkei, mütshang yaangbü cheei hao to haüyokei.

³⁸Noknyüh yo ka müt cheei ngekkei, “Lenbou, kü shou to chühkai, aishanga hao ngeibü jayangshou ki,

³⁹hoba shabü soushou cheei hao lapda hoba mangde ngekda; aishanga hoei hao semsem toptida hoba sembung ka uokjok ongtida; shayangleko longyoan ong haoei hao apyoda, hoba haoei hao la mo letida.

⁴⁰Ngei ka eikshuong to shian sattikula sukeijakei, lausikei haoenei athük.”

⁴¹Jisuei jongaikei, “Kan maialembü hoba khüpeinyu paibü meten! Ngo kan yoa lalok kila hoba kan to lalokche natenla?” Kheijinei haoei müt khüto laukei, “Kashou hato leiba.”

⁴²Hao louko kian shabü souei hao phetettikei hoba toptikei. Lausikei Jisuei shabü sou hakeiko nashoubou kho maitikei hoba haobou la kungaikei.

⁴³Haoen pendou Mühghaü yaangenbü hau hapan maangpangkei. Haoei kümbü pendou shangabü müt pendou maangpangyoko kijinei hao eikshuong to laukei,

⁴⁴“Habü ngüh nouanepbo ditashi; ho kan shanga ki: Müteibü Shou mütshuongeibü ikmang to khümbo kuan aplabü.”

⁴⁵Haoenei laubü ho aditen, hoba haoenei kho ngühtet ashuoklabü lele haoen ka huan kikei; hoba ho shangabü hao to phela haoen hatko kikei.

⁴⁶Ao yaangbou dogo haoen yoa ngüh wetyo khangkei.

⁴⁷Jisuei haoen maangphanga wetyobü ngekei, hoba haoei nashou che leibaan hao junga lotikei.

⁴⁸Haoei haoen to laukei, “Aoei kü nyena ho nashou sungletlaje haoei ngo sungletda; hoba aoei ngo sungletda haoei ngo hangangbou sungletda; aishanga kan yoa hanbou kho pendou to yaangbou ki.”

⁴⁹Johanei jongaikei, “Lenbou, müt atei ka nyena shabü sou shian sattiko künei hapbei, hoba künei hao shiletla haujembei, aieilausi hao kün yoa ka phai asemda.”

⁵⁰Jisuei hao to laukei, “Hao thangetla hau tejem; ao kan khulimbo aying hao kan shanga ki.”

⁵¹Ladang hao khuthük to anlanglabü jihsiphai sühkei, haoei maangnyu angko Jerusalem ae haula meimeikei,

⁵²hoba haoei hao thedangto ngühlang künbü shuong hautikei. Haoen haukei hoba hao shanga lamlela Samariabü sang che to atkei;

⁵³lausikei haoenei hao asunglet aieilausi hao Jerusalem ae hauko kikei.

⁵⁴Ladang eikshuong Jakob si Johanei kho hapbei, haosiei laukei, “Bunyubou, haoen lonan aptila künei khuthük ka wan lotla sakkula nyi maang angdalao?”

⁵⁵Jisuei chühngaian haoen to hakkei (hoba laukei, “Kan ai soushoueibü yingkeije kanei angekei,

⁵⁶aishanga Müteibü Shou mütshuongeibü langkei shemtila shanga aying lausikei haoen püetla loukei!”) Hobaje hao lubü sang che to haukei.

⁵⁷Haoen lama hauko kijinei müt cheei hao to laukei, “No lae ong haulaje ngo ka phai semlabü.”

⁵⁸Jisuei hao to laukei, “Selong shuongei laangpob ki hoba mühkabü aushuongei hap kia, lausikei Müteibü Shouje hao khu nongshang aki.”

⁵⁹Haoei che to laukei, “Kü phai semshi.” Lausikei haoei laukei, “Yaangbou, ngo shaang hauan kübou khünla sakkubü.”

⁶⁰Lausikei haoei hao to laukei, “Haibü shuongei haoen haibü khünla apyoashi, lausikei noje hauashi hoba Mühghaü Sangle ngühlang phinthonashi.”

⁶¹Lubüei laukei, “Ngei ka phai semlabü, yaangbou; lausikei shaangla chema kibü shuong to bangbü salem ngüh lenla sakkubuma.”

⁶²Jisuei hao to laukei, “Müt aoei hao ik sek shapshang to hatan phaiae chühngaidaje hao Mühghaü Sangle shanga amukei.”