Read Chang Naga NGÜHKÜPAIBÜ 1 Bible Online

NGÜHKÜPAIBÜ 1 - Chang Naga bible

NGÜHKÜPAIBÜ 1

¹Jordan shumang danan yamlamanga Suf thedanga Arabaa Paran hoba Tofel, Laban, Hazeroth hoba Dizahab kanglanga Israel shousi pendou to Mosaei lenyobü habü ho ki.

²Ho Horeb ka Seir shongh to haubü lam Kadesh Barnea sühko chalou anthükche lam ki.

³BUNYUBOUei hao la ai sakkukei pendou Israelbü la lenla shanga Mosaei haoen to po anboubü lit anthük- che boubü shaangbou nyet joyokei.

⁴Kho Heshbona kibü Amorbü choba Sihon, hoba Edreia Ashtarota kibü Bashanbü choba Og thükan phaia.

⁵Jordan danan Moab kaodaka kho ngühkhüm Mosaei wanenkula khangan laukei.

⁶“BUNYUBOU seneibü Mühghaüei sen to Horeba laukei,

⁷‘Ho shongha kan kithüng kia, sepei- ashi, meimeijung hauashi, hoba Amorbüeibü shongh kaodak to hoba kho kaijembo kibü kaonyek pendou Arabaa shongh kaodak chanep aephei shongh you hoba Negeba hoba Jordan yungko nyangkoa, Kanan kao hoba Lebanon shumang yaangbü Eufrates Shumang sühko hauashi.

⁸Chühashi, ngei kan thedanga kaonyek kho phokua; BUNYUBOUei kaneibü nyusibou Abraham, Isak hoba Jakob, haoen la hoba haoen phainei haoeneibü shousi la kula thekubü kaodak to atashi hoba leashi.’ ”

⁹Mosaei mütshuong to laukei, “Hobaje kho chaloua ngei kan to lena, ‘Ngei kü mütpemei kaneibü onat künla athük,

¹⁰BUNYUBOU kaneibü Mühghaüei kan aeibou bukyohaayotia, hoba chühashi, tat kan shuong müha khanshoulitshou hima kia.

¹¹BUNYUBOU kaneibü nyusibou Mühghaüei kan hajar juongei toukei aei yeitiashi, hoba haoei kan la thekubü tegü, kan haükushi!

¹²Lai küman ngo kü mütpemei kaneibü on atshaibü hoba oyophetyobü künla?

¹³Kan chung weko ka songsido kibü, ditenbü kibü hoba hapbüngebü müt pienashi, hoba ngei kan thüka haoen leiyeibü yeitikulabü.’

¹⁴Hobaje kanei kü to laukei, ‘Nyi laubü kho kün shanga maiakei.’

¹⁵Hibü ngei kan chung jaishou ka songsido kibü müt hoba hapbü ngebü pienan kan thüka leiyeibü yeitikei, hajar thüka, saongao thüka, anjinsem thüka, an thüka lajamleibou hoba ikjaibü ka chung wekoa pienkei.

¹⁶“Hobaje kaneibü matjembou la ngei sakkuko laukei, ‘Kaneibü jaisina kanglanga ngüh ditan chühashi, hoba müt che hoba haoeibü jaisina kanglanga hoba hao yoa kibü küksithang yoa ngühmaanglanko mat jemashi.

¹⁷Mat jemjinei kanei the techüh, kanei hanbü si yaangbü ham to jetei ditkujan, kanei müt to tehüt, aishanga matjembü kho Mühghaü shangabü ki, hoba kan shanga ngüh aeibou sekbü kho kanei kü jungto sungba, hoba ngei kho ditlabü.’

¹⁸Kho jihsi- phaia kanei kümlabü pendou ngei kan la sakkua.

¹⁹“Kheijinei BUNYUBOU seneibü Mühghaüei sakkubü tegü, sen Horeb ka meimeijung haukei, hoba kanei hapbü yamlamang yaangbü hoba hatlamoklabü danko Amorbüeibü shongh kaodak aeto haukei; hoba sen Kadesh Barnea sühkei.

²⁰Hobaje ngei kan to laukei, ‘BUNYUBOU seneibü Mühghaüei kubü Amorbüeibü shongh kaodak to sen loua.

²¹Chühashi, BUNYUBOU kaneibü Mühghaüei kaonyek kho kan thedanga phokuakei; BUNYUBOU kaneibü nyusibou Mühghaüei kan to joyobü tegü angashi hoba lenashi: Tehüt ayingsi temok.’

²²“Lausikei kan mütpem weko kü jungto louan laukei, ‘Sen shanga kaonyek kho pheila haulabü hoba sen laobou lam to angla hoba laobou sangnyu shuong to loula, kho ngühlang sen jungto künla sen thedangto senei müt hautikho.’

²³“Kho ngei maian dambei; hoba kan ka ngei müt anthüknyi chung weko ka che che pienkei;

²⁴hoba haoen shongh aeto angkei, hoba Eskol pholi to louan kho pheianchühkei.

²⁵Hobaje kaonyeka kibü buhek at haoeneibü ika jungan sen jungto louyenkei.

²⁶“Lausikei kanei üangsaplep dogo laukei, hoba BUNYUBOU kaneibü Mühghaüei sakkubü khulimbo meimeikei.

²⁷Hobaje kanei kaneibü neichema nyamnyambo laukei, ‘BUNYUBOUei sen to mangsensi Amorbü ik to sen mautila khümbo kula shanga haoei sen Ijep ka leian longkei.

²⁸Sen lato hauda? Seneibü jaisinasi shuongei seneibü maang- pon koutiko laukei: Mütshuong kho sen tokei yaangbou hoba thong loubü ki; khünei sangnyu yaangbü hoba müh sühko ba leakei; hoba khoto limbo künei khünei Anakimbü shousi shuong hapa!’

²⁹“Kheijinei ngei kan to laukei, ‘Temok, ayingsi haoen to tehüt,

³⁰BUNYUBOU kaneibü Mühghaü ao kan thedangto hauda, haoei Ijepa kanei hapbo kümbü pendou tegütham, haoei kan shanga wapyolabü;

³¹hoba yama kanei ngekei, khei mütei jembü shou bukbü tegü ho kaonyek asühshongko BUNYUBOU kaneibü Mühghaüei kan paibü lamnyu sünga bukan loua.’

³²Khei yingasikei khünei BUNYUBOU kaneibü Mühghaü to kanei maialem.

³³Haoei kaneibü lam shanga nangnak wanei hoba kan ai lam to haula kho lenla shanga chaloua sangmeia kan thedangto haukei.

³⁴“Hobaje ladang kan nyamnyambo khauang lemenbü BUNYUBOUei ditkei, hao khauangko theyolanyoko laukei,

³⁵‘Maimaitham ho meten amaibü habü mütshuong che ongkei kaonyek maibü laobou kaneibü nyusibousi la ngei kula thekukei,

³⁶kho Jefuneeibü shou Kaleb to liman ühüplabü; hoba hao la hoba haoeibü shousi la haoyou yaüatlangbü kaonyek kho kulabü; aieilausi haoei khümbo kuan BUNYUBOU phai sembei.’

³⁷Hobaje kan hangshong BUNYUBOUei küto khauangko laukei: ‘No mangkei khüto üetlabü.

³⁸Naneibü shou Joshua, ao ka thedanga loan ki, hao khüto atlabü, nyi hao thungeijangeiashi; aishanga haoei Israelbü la kho phet phantilabü.’

³⁹“BUNYUBOUei sen pendou to laukei, ‘Tokei kaneibü shousi shuong aoyou haitila shanga yeilabü dogo kanei laukei, hoba kaneibü shousi aoyouei tat sühko maibü amaibü angekei, haoen khüto atlabü, hoba haoen la ngei kho kulabü, hoba haoenei kho lelabü.

⁴⁰Lausikei kanje sepeiashi, hoba Saklangbü Yungnyu ae yam to atashi.’

⁴¹“Kheijinei kanei kü to laukei, ‘Mosa, BUNYUBOU khulimbo künei shed shona, BUNYUBOU seneibü Mühghaüei sen la sakkubü pendou tegü kün angkho hoba wapyokho. Hobaje kan müt- pem wekoei wapyobü insiaubu jungkei, hoba shongh aeto angla songoktham dambei.

⁴²“BUNYUBOUei kü to laukei, ‘Haoen to lenshi, kaneibü dangbou la kan thüktisi amaibula angkei tüang, ayingsi maangkei temangpok aishanga ngo kan yoa ayokei.’

⁴³Kho tegü ngei kan to joyokei, hoba kanei ngüha ale; lausikei BUNYUBOUei sakkubü khulimbo kan meimeikei hoba lemenko shongh to angkei.

⁴⁴Kheijinei khübü shongha kibü Amorbü kan khulimbo longkei, hoba naoei shieibü tegü kan Seir ka Horma sühko shian koutikei.

⁴⁵Kheijinei kan sepeikei hoba BUNYUBOU thedanga haapbei, lausikei BUNYUBOUei kaneibü ngühlang adit.

⁴⁶Kho tegü kan Kadesha thüngbü sühko chalou juong kikei.