Read Chang Naga NGÜHKÜPAIBÜ 10 Bible Online

NGÜHKÜPAIBÜ 10 - Chang Naga bible

NGÜHKÜPAIBÜ 10

¹“Kho jihsiphaia BUNYUBOUei kü to laukei, ‘Shaangla tegü nyi laang penyi thüngenashi hoba kü jungto shongh to kai- yang, hoba buei busen che kümashi.

²Hobaje nyi shaangla leilubü laangdaka kibü ngüh shuong kho ngei laangdaka dolabü; hoba nyi khübü kho saopobü busena jinlabü.’

³“Hibü ngei akasia buei busen che kümbei hoba laangdak penyi shaangla kümbü phatko thüngenkei hoba laangdak penyi kho jungan shongh to angkei.

⁴Hobaje shaangla dobü tegü ngühkhüm an haoei laangdaka dokei, laobou kan takshatbü chaloua BUNYUBOUei shongha wan ka kan to joyokei; hoba khübü kho BUNYUBOUei kü la kukei.

⁵Kheijinei ngo sepeikei hoba shongh ka louyenan ngei kümbü busena laangdak penyi kho ngei phokei; hoba BUNYUBOUei kü la sakkubü tegü khübü kho khünei kia.”

⁶(Hobaje Israel shousi shuong Beeroth Benejaakan ka meimeian Mosera to loukei, khünei Aron haikei hoba khünei hao khünkei, hoba haoeibü shou Eleazarei ungshed kümsileia hao jeikei.

⁷Khüka haoenei Gudgoda to meimeijung haukei, hoba Gudgoda ka Jotbatha shumang dei kishang to loukei.

⁸Kho jihsiphaia BUNYUBOUeibü ngühkhüm busen jungla BUNYUBOU junga loan hao khangenla, hoba haoeibü nyena haükula khei tat sühko haoenei kümbü tegü BUNYUBOUei Levi chung khümbo kuan phokei.

⁹Khei Levi jembü mütli yoa ai phejan ayingsi phetphan akiko ki; BUNYUBOU kaibü Mühghaüei ka to laubü tegü, BUNYUBOU kho haoeibü phetphan ki.)

¹⁰“Kho tegü shaangbü phatko ngo shongha chalou saonyi hoba langyang saonyi kikei, hoba kho jihsiphaiakei BUNYUBOUei kü to ngüha lekei, hoba BUNYUBOUei kan amauti.

¹¹Hobaje BUNYUBOUei kü to laukei, ‘Meimeiashi, hoba mütshuong thedangto no you yaüjung hauashi, hoba haoeneibü pisibou to haoen la kulabü dogo thekubü kaonyek to haoen atlabü hoba lelabü.’

¹²“Hobaje tou, O Israel, BUNYUBOU kaibü Mühghaü to soumo hatlabü, hoba haoeibü ngühkhüm pendoua pailabü hoba hao to sanoulabü hoba BUNYUBOU kaibü Mühghaü kaibü maangpon pendouei hoba kaibü soushou pendouei khangenlabü.

¹³Hobaje kan maila shanga BUNYUBOUei sakkubü haoeibü ngühkhüm jungeila, hoto liman BUNYUBOU kaibü Mühghaüei ka ka ai hida?

¹⁴Chühashi, müh hoba thükkabou mühshuong, kaodak hoba khünei kibü pendou BUNYUBOU kaibü Mühghaüeibü ki.

¹⁵Khei yingasikei kaneibü pisibousi to haoen to sanoula BUNYUBOU maangshikkei, hoba tat sühko mütoje kan to aei maangshikko kibü tegü haoeneibü shousi shuong pienkei.

¹⁶Hibü kaneibü maangpon tangkabü kho kipan apashi, hoba touje kan maangpon kaangko teki.

¹⁷Aishanga BUNYUBOU kaibü Mühghaü kho Mühghaü shuong pendou thüka Mühghaü, bunyu shuong thüka BUNYUBOU yaangbü, hau yaangbü, hoba hatlamoklabü Mühghaü, aoei theto achühda, ayingsi besa aleda.

¹⁸Haoei aao müt si latnyu shanga ngühmaiei mat jembuda, hoba yenbou la neisimei hoba shausiyung kuko sanouda.

¹⁹Hibü kanei yenbou to sanoushi, aishanga kan jih chenei Ijep kaodaka yen la lean kikei.

²⁰Nyi BUNYUBOU kaibü Mühghaü to soumo hatjan; hao to nyi khangenjan; hoba hao to nyi kaangkhühtham hatlepashi, hoba hao nyen phongko theyolanyoashi.

²¹Hao kho kaibü nyensang ki, hoba hao kaibü Mühghaü, aoei no jembü nyekei hapbo habü kümsilei yaangbü hoba hatlamoklabü ka shanga kümbei.

²²Kaneibü pisibou müt anjinlei yoan Ijep to yankei, hoba touje BUNYUBOU kaibü Mühghaüei müha khanshoulitshou tegü no mütshang la yeitia.