Read Chang Naga NGÜHKÜPAIBÜ 11 Bible Online

NGÜHKÜPAIBÜ 11 - Chang Naga bible

NGÜHKÜPAIBÜ 11

¹“Hibü nyi BUNYUBOU kaibü Mühghaü sanoujan, hoba ponpen haoei sakkubü haoeibü ngühkhüm, haoeibü matjem hoba haoei sakkubü jungeiashi.

²Hobaje kanei tatbü chalou hanei ngeashi, aieilausi kaneibü shousi aoyouei BUNYUBOU kaneibü Mühghaüei hakbü ange ayingsi langkeia takteian achüh, hao yaangbü haoeibü hau kibü ik hoba phemshingbü, haoeibü tetsida shuong,

³hoba haoeibü kümsilei shuong Ijepbü choba Farao to Ijepa kümbü;

⁴hoba Ijepbü sepai dan to haoei ai kümbei, haoeneibü koli hoba kailong shuong laobou saklangbü yungnyu to haoenei kan shijung loujinei khüpeitikei, hoba tat sühko BUNYUBOUei haoen mautikei;

⁵hoba kanei ho kishang asühshongko yama haoei kan to ai kümbei;

⁶hoba Reubeneibü shou Eliabeibü shou Dathan hoba Abiram to haoei ai kümbei, lai kaoei jembü sembung ipbei, hoba Israelbü pendou thedanga haoen chemdang, haoeneibü neichem hoba haoen phainei sembü lang kibü pendou yoan, haoen suikei;

⁷lausikei BUNYUBOUei kümsilei yaangbü kümbü pendou kaneibü nyekei hapa.

⁸“Hibü kan hau kila, hoba kanei laobou kaonyek lela atda, khüto atan kila shanga, ngei tat sakkubü ngühkhüm pendou jungeijan;

⁹khei sendei si naodei kouko kibü kaonyek laobou BUNYUBOUei kaneibü pisibou la hoba shousinasi la kula thekukei, khünei kan salangko kila shanga.

¹⁰Aishanga kaonyek laobou kanei lela atda kho kan loubü Ijep kaonyeka kibü, kanei lilabü jinko kaibü youei dei leian jinko shiklaak bamang lebü che tegü aying.

¹¹Lausikei kanei lela kibü kaonyek kho shongh hoba pholi kaodak hoba müh kabü dei yungda;

¹²BUNYUBOU kaibü Mühghaüei thounoubü kaonyek po khangbü ka po thonbü sühko athakko BUNYUBOU kaibü Mühghaüei chühan yantibü kaonyek.

¹³“Tat ngei kan la kubü sakkubü ngüh kanei ditkho laualonga, BUNYUBOU kaneibü Mühghaü sanoukho laualonga hoba kaibü maangpon pendouei hoba kaibü soushou pendouei hao khangenkho laualonga,

¹⁴jih tükdea ngei kaneibü kaonyek shanga lang yantikulabü, khei shaangbü hoba phaibü lang yantikulabü, khei yingsije kanei kaneibü youshou, semlühdei, hoba oliv onang yoshailabü.

¹⁵Hobaje ngei kaneibü shatsinam shanga kaneibü khongthua sang yemtikulabü, hoba kanei shauan senyühshemlabü.

¹⁶BUNYUBOU khauang kan khulimbo longko haoei lang aloutilabü lele müh khinan apbo, hoba kaoei lang ehekkuko, hoba kan la kula kibü kaonyek maibü ka kan tongde mautibula,

¹⁷kan lubü mühghaü ae sepeian haoen khangenko hoba haoen lembo kaneibü maangpon akhüpettila shanga kan maangsangashi.

¹⁸“Hibü kanei ngeibü ngüh shuong kaneibü maanga hoba kaneibü soushoua thanan phoashi; hoba amaaphelabü che tegü khühbü kho kaneibü ika khühan phoashi, hoba khübü kho kaneibü khüngjaa shensinge shanga kaiashi.

¹⁹Kanei kho kaneibü shousi shuong la lenashi; no chema setjinei hoba no yento haujinei, no yepjinei hoba pijinei khübü shanga nyi laueiashi.

²⁰Nyi kaibü chem kouyema hoba bakoua khübü kho doashi,

²¹hibü langkei hoba kaibü shousi shuong langkei BUNYUBOUei kaneibü pisibou la kaonyu thüka müh kishongko haoen la kula thekubü kaonyeka salangko kilabü.

²²“Ngei kan la sakkubü pendou kanei maangsangko jungeia longa, BUNYUBOU kaneibü Mühghaü sanouko, haoeibü lam pendoua paiko, hao to kaangkhühtham hatlepnyu khüpalonga,

²³kheijinei kan thedang ka BUNYUBOUei phang pendou shian aplabü, hoba kan to yaangbou hoba hau kibou phang kanei shian sattienlabü.

²⁴Kaneibü youei naksühbü pendou kaneibü yinglabü; yam ka Lebanon sühko, shumang ka, kho Eufrates chanep yungnyu sühko kaneibü leilang yinglabü.

²⁵Kan khulimbo aoeikei alouenlabü; hoba haoei kan to lenbü tegü, BUNYUBOU kaneibü Mühghaüei ainei ong you yaüjung atlaje kaonyek pendoua kan to hatbü hoba mokbü longtikulabü.

²⁶“Chühashi, tat ngei kan thedanga haülabü che hoba shedsikhau che phokuda;

²⁷tat ngei kan la kubü BUNYUBOU kaneibü Mühghaüei sakkubü kanei ngüha lealonga haülabü kilabü;

²⁸hoba BUNYUBOU kaneibü Mühghaüei sakkubü kanei ngüha alelonga hoba tat kan la sakkubü ka bangjung hauan kanei angebü lubü mühghaü phai semjung haualonga, shedsikhau kilabü.

²⁹Ladang BUNYUBOU kaibü Mühghaüei kanei lela hauko kibü kaonyek to kan leian loulaje kanei haülabü kho Gerizim shongha pholabü hoba shedsikhau kho Ebal shongha pholabü.

³⁰Morea yembulong nyangko Gilgal thedanga Arabaa kibü Kananbü kaonyeka Jordan danjung hauan, chanep aenei khübü kho aki lo?

³¹Aishanga BUNYUBOU kaneibü Mühghaüei kan la kubü kaonyek lela Jordan danan kan atlabü lele ong kia; ladang kanei kho lelaje, hoba khünei kilaje,

³²ngei kan thedanga phokubü ngühkhüm songkhüm pendou jungeila kan maangsangjan.