Read Chang Naga NGÜHKÜPAIBÜ 12 Bible Online

NGÜHKÜPAIBÜ 12 - Chang Naga bible

NGÜHKÜPAIBÜ 12

¹“BUNYUBOU kaneibü pisibou Mühghaüei, kaodaka kan lang ki shongko kula kibü kaonyeka kanei maangsangko jungeilabü ngühkhüm hoba song habü ho ki.

²Kaoen pendou lanei aoyou phang kanei lelabü ki, haoeneibü shongh suokbüa shonghshoua bunyu bukhu shangbü phanga ainei haoeneibü mühghaü khangenko kikei, khübü pendou kanei maisho mautikujan;

³kanei haoeneibü lemshang leilutikuashi hoba haoeneibü saopobü thaonyu shuong ngümnyinkuashi, hoba khünei haoeneibü nyen mautikuashi.

⁴“BUNYUBOU kaneibü Mühghaü to kanei khei alemjan,

⁵lausikei BUNYUBOU kaneibü Mühghaüei kan chung pendou ka haoeibü nyen phola laobou kaoen pienlaje hao kishang kaoen lamjung loujan;

⁶khüto kanei juokbü lembü kanei haitibü lembü hoba kaneibü an phejan hoba kaneibü ikei lembü, hoba kaneibü takletbü hoba maangmai lembü hoba kaneibü masu hoba sanlon shuong shaang shatbü kanei sungbajan;

⁷hoba khünei BUNYUBOU kaneibü Mühghaü thedanga shaujan; hoba kanei kümbü pendou laoboua BUNYUBOU kaibü Mühghaüei kan haükuda; kan chemdang yoan olinyolabü.

⁸“Kanei tat senei hanei kümbü tegü, mütpem wekoei jembü maangleko aikei ajungeijan;

⁹aishanga BUNYUBOU kaneibü Mühghaüei kan la kula kibü kan haksoko kishang hoba phetphanlabü kho kanei mo asühkei.

¹⁰Lausikei ladang Jordan danlaje, hoba BUNYUBOU kaneibü Mühghaüei kan la kubü kaodaka kilaje, hoba kan kaijembo kibü dangbou pendou ka kan haksotiko kan khümenan kilaje.

¹¹Kheijinei laobou kaonyeka kan phokulaje khüto ngei kan la sakkubü pendou jungan kai, kaneibü juokbü lembü, kanei haitibü meisiau, kaneibü an phejan, hoba kaneibü ik ka lembü hoba kanei pienbü takletbü laobou kanei BUNYUBOU la takletkuda,

¹²hoba BUNYUBOUa kaneibü shousi, kaneibü yaksa shou, kaneibü sambü hoba sambüsao, hoba kaneibü sanga kibü Levibü olinyolabü, aishanga hao kan yoa phejan ayingsi phetphanbü aki.

¹³Nyi hapbü tagübü kaoen pendoua juokbü lembü akula maangsangashi;

¹⁴lausikei kaneibü chung yoa kaoen che laoboua BUNYUBOUei pienlaje khünei nyi kaibü juokbü lembü kuashi, hoba khünei ngei ka la sakkubü pendou kümashi.

¹⁵“Khei yingasikei, BUNYUBOU kaneibü Mühghaüei ka la kubü haülabü thüng, meishi tegü, saak tegü, asaopobü hoba saopobü meisiau nyi latetche shaumangsühlaje, kaibü ba phang mangthembüa shaula thükkei.

¹⁶Nyi sii ong ashaujan, nyi kho kaoa dei tegü jonashi.

¹⁷Kaibü nyak an phejan, ayingsi sanlon shuong ka shaang shatbü ayingsi tetan phobü, takletbü atbü at, ayingsi kaibü maangmai lembü, ayingsi kaibü ik ka kubü lembü an phejan nyi kaibü ba phanga ashaujan;

¹⁸lausikei nyi BUNYUBOUei pienbü kaoena no, kaibü nouyang ja- yangshou, kaibü sambü, samnyu hoba kan yoa kibü Levibü shuongei BUNYUBOU kaibü Mühghaü thedanga shaujan, hoba nyi kümbüleibü pendoua BUNYUBOU kaibü Mühghaü thedanga no olinko kilabü.

¹⁹No kaibü kaoa kishongko Levibü shuong awailetla maangsangashi.

²⁰“BUNYUBOUei ka la thekubü tegü, ladang haoei kaibü leilang yaangngaitilaje, hoba nyi, ‘Ngei phe shaulabü,’ dogo laulaje, nyi latetche shaumangsühda shaula thükkei, aieilausi nyi phe shaula maangdakda.

²¹BUNYUBOU kaibü Mühghaüei haoeibü nyen phola pienbü kho ka jungka lounyu hauan kialonga kheijinei kaibü masu ayingsi sanlon shuong BUNYUBOUei ka la kubü ka haitiashi, hoba ngei ka la sakkubü tegü kaibü soushouei latetche shaumangsühda kho kaibü ba phanga shauashi.

²²Nyi kho meishi, saak hoba asaopobü hoba saopobü phe liko shaubü tegü kho shaujan.

²³Sii ong ashaula maangsangashi, aishanga sii kho langkei ki, hoba langkei kho phe yoa ashaujan.

²⁴Nyi kho ashaujan, nyi kho kaoa dei tegü jonashi.

²⁵BUNYUBOU thedanga ai janbü ki kho nyi kümashi; no hoba ka phainei kaibü shousi maian kila shanga nyi kho ashaujan.

²⁶Ka shangabü ai saopobü peisilei hoba takletbü ki kho jungan BUNYUBOUei pienbü kaoen to hauashi.

²⁷Hobaje kaibü juokbü lembü phe si sii yoan BUNYUBOU kaibü Mühghaü lemshanga lemashi; hoba kaibü haitibü meisiaueibü sii kho BUNYUBOU kaibü Mühghaü lemshanga yeian jinkulabü hoba phe kho nyi shaulabü.

²⁸Nyi BUNYUBOU kaibü Mühghaü junga ai maibü hoba tükdebü kho kümjinei, no hoba ka phainei kaibü shousi shuong ponpen maian haula shanga ngei ka la sakkubü pendou jungeiashi hoba ngüha leashi.

²⁹“Ladang BUNYUBOU kaibü Mühghaüei kanei shian apan lela haubü phang shuong kan thedang ka mautilaje hoba nyi haoen kuktienlaje, hoba haoeneibü kaodaka kilaje,

³⁰ka thedanga haoen mautian, khüpeinyu haoen phai asemla no lolo maangsangashi; hoba nyi haoeneibü mühghaü shangabü, ‘Habü phangei haoeneibü mühghaü lai khangenda? Küneikei kho tegü kümlabü,’ dogo lauko tekhüpetti.

³¹Nyi BUNYUBOU kaibü Mühghaü khei telem; aishanga BUNYUBOU thedanga mangsenlabü kümsilei pendou, laobou haoei mangsenda, kho haoen jembü mühghaü shanga kümda; aishanga haoeneibü shousi bousukei yaksakei wana haoeneibü mühghaü shuong shanga haoenei juokettia.

³²“Ai ong ngei kan la sakkuda kho kanei kümla jungeiashi, nyi khünei tejinyo, ayingsi ho ka teshiti.