Read Chang Naga NGÜHKÜPAIBÜ 13 Bible Online

NGÜHKÜPAIBÜ 13 - Chang Naga bible

NGÜHKÜPAIBÜ 13

¹“Kan yoa thuseibü che ayingsi manghalibü mang tetenbü che longan tetsida che ayingsi seikümseilei che kan la kualonga,

²hoba, ‘Senei nyi angebü lubü mühghaü phaito haukho hoba senei haoen khangenkho,’ dogo haoei kan to lenbü tetsida hoba seikümseilei kho haüthük- alonga,

³kanei kho thuseibou ayingsi manghlibou ngüha alejan; aishanga BUNYUBOU kaneibü Mühghaüei kaibü maangpon pendouei hoba kaibü soushou pendouei BUNYUBOU kaneibü Mühghaü maimaitham sanouda si asanouda kho ngela kan takteida.

⁴BUNYUBOU kaneibü Mühghaü phaito kan semjan, hoba kanei hao to soumo hatjan, hoba haoei sakkubü jungeijan, hoba haoeibü ngühlang ditjan, hoba hao ong kanei khangenjan, hoba hao to kaangkhühtham hatlepan kijan.

⁵Hobaje kho thuseibou kho ayingsi mangh tetenkubou kho haitijan, aieilausi BUNYUBOU kaneibü Mühghaü, aoei kan Ijep kaodak ka leiyenkei hoba aaochem ka angngaikei hao khulimbo haoei laukei, hoba BUNYUBOU kaneibü Mühghaüei ka la sakkubü lamnyu ka leilangla haujembei. Kho tegü kanei amaibou kan yo ka wapan apjan.

⁶“Kaibü jaimai namai ayingsi kaibü jayang nouyangshou ayingsi kaibü sanounyu yak, ayingsi kaibü maangjam thangbouei huphanga sueijaeiko, ‘Nyi ayingsi kaibü nyusibousiei ai angebü

⁷khei no kaijembo kibü, no nyangko ayingsi ka jungka lounyu saako kibü kaodak jithon ka jithon sühko kibü lubü mühghaü shanga sen haukho hoba lubü mühghaü lembho,’ dogo lensi,

⁸nyi hao to hehoat akijan, ayingsi hao to ngüha alejan. Kaibü nyekei hao sanoudambü alenjan, ayingsi nyi hao khei ong tephoku, ayingsi nyi hao to akhüpetjan;

⁹lausikei maimaitham nyi hao haitijan; hao haitila shanga nyi hao khulimbo kaibü ik shaangjan, hoba kho phaia ong müt pendou ik lijan.

¹⁰Nyi hao laangei tetetjan aishanga aaochem ka Ijep kaodak ka leiyenkubü BUNYUBOU kaibü Mühghaü ka haoei no leilangla haoei lambei.

¹¹Hobaje Israelbü pendouei kho ditlabü hoba hatlabü, hoba kho tegü kümsilei amaibü kan yoa ladangkei akümlabü.

¹²“BUNYUBOU kaibü Mühghaüei kan la kan kila kubü sangnyu chenei,

¹³kan yoa shosiek atei thinei sangnyua kibü at suletan, ‘Senei hauan kanei angebü Mühghaü lubü mühghaü khangenkho,’ dogo laualonga,

¹⁴kheijinei nyi pheiei phaneiko maisho lamjan, hoba chühashi, kan yoa kho mangsenlabü kümsilei küma dogo aukabü kuko maimaitham dogo laualonga;

¹⁵kanei kho sangnyua kibü shuong maimaitham inei maisho shemtilabü, hoba khünei kibü pendou hoba samkeisamuk yoan inei wapetkhümjan.

¹⁶Hobaje soletbü peisilei pendou kho nyi khongji to sungbajan, hoba sangnyu kho soletbü peisilei yoan BUNYUBOU la khümbo juokbü lembü kubü tegü wanei juokan apjan, hoba kho ponpen shanga leilubü che kilabü; kho ladangkei nyibou akümetlabü.

¹⁷Hobaje BUNYUBOUei hao khauang longbü hatlamoklabü ka sepeian haoei kaneibü pisibou la thekubü tegü ka to onou lenlabü, hoba no bukko haako hautila shanga khümbo kubü peisilei aikei ka shanga aphojan;

¹⁸tat ngei ka la kubü haoei sakkubü pendou nyi jungeikho lausi, hoba BUNYUBOUkaibü Mühghaü junga ai tükde kho kümalonga hoba BUNYUBOU kaibü Mühghaüeibü ngüh nyi ditkualonga kho tegü kilabü.