Read Chang Naga NGÜHKÜPAIBÜ 14 Bible Online

NGÜHKÜPAIBÜ 14 - Chang Naga bible

NGÜHKÜPAIBÜ 14

¹“Kaneibü BUNYUBOU kaneibü Mühghaü shousi shuong yingsije kanei kan lolo awapngaijan, ayingsi haibü shanga kaneibü khüngja kütan üpjan.

²Aishanga BUNYUBOU la khümbo kubü eikshuong kan ki, hoba kao thea kibü müt pendou yoka kan hao jembü eikshuong phangche yeila pienan kia.

³“Nyi asaopobü peisilei aikei ashaujan.

⁴Habü ho nyi shaula thükbü meisiau ki; masu pongsu, sanlon, lon,

⁵meishi, saak, kongmeishi, yao, dishon, yamkabü masu, hoba shongh kabü sanlon,

⁶hoba haak pheinyinbü weko haak penyi pheinyinbü, hoba shatnyaibü nyi shaula thükkei.

⁷Khei yingasikei, shatnyaibü hoba haak pheinyinbü meisiau yoa nyi habü ho ashaujan: ut, langyuk hoba sanshou; aieilausi shat nyaisikei haoen haak apheinyinkei, khübü kho kan shanga asaopobü ki.

⁸Tokei uk, aieilausi haak pheinyinsikei shat anyaingaida, kho kan shanga asaopobü, kho phe kanei ashaujan; hoba khübü haibü mang to ameitijan.

⁹“Deia kibü pendou kanei shaula thükkei, ai ong kaak hoba kou yeman ki, kanei shaula thükkei;

¹⁰lausikei ai ong kaak hoba kou aki, kho kanei ashaujan; kho kan shanga asaopobü ki.

¹¹“Au saopobü pendou kanei shaula thükkei,

¹²lausikei habü ho kanei ashaujan: wekekshou, aulumai, ngau shaubou aulu,

¹³sou aulu, auluhamshang, hoba aulu haoen phang lulu;

¹⁴aukhomakmak, hoba haoen phang lulu,

¹⁵ostrik, nangnak au, yung- au, aulu hoba khübü phang lulu,

¹⁶ukhoungba hanbou hoba yaangbou, laang angbü ukhoungba;

¹⁷thimkak au, hogon, kormorant,

¹⁸dei au, dei au yaangbou hoba khübü phang lulu, shujem dukutuk hoba pak.

¹⁹“Hobaje kaakyembü yangsikok pendou pendou kan shanga asaopobü ki, khübü kho ashaujan.

²⁰Ausiyuk saopobü pendou kanei shaula thükkei.

²¹“Hao lolo haibü aikei kanei ashaujan; aishanga kan BUNYUBOU kaibü Mühghaü shanga saopobü mütli ki, kanei kho kan yoa kibü yenbou at la kujan, haoei kho shaula thükkei, ayingsi kho küksithang la yaakashi. “Nyi lonshou khoeibü nyueibü sendeia athungjan.

²²“Po weko langle ka longbü kaibü sek ka an phejan kujan.

²³Hobaje laobou kaoen haoeibü nyen shanga haoei pienlaje, khünei BUNYUBOU kaibü Mühghaü thedanga kanei lembü kaneibü youshou, ih, hoba onang hoba kaneibü masu hoba sanlon shuong shaangla shatbü an phejan kho BUNYUBOU kaibü Mühghaü to soumo hatko ponpen kila shanga ditletla shanga kanei shaujan.

²⁴Kanei kho jungan alouenlabü lele lam kho aeibou saalonga, aieilausi BUNYUBOU kaibü Mühghaüei hao kila shanga pienbü kho kan jungka lounyu hauan kialonga, kheijinei BUNYUBOUei ladang kan haükulaje,

²⁵kanei kho nam la yeitiashi, hoba nam kho kaneibü ika jungan BUNYUBOU Mühghaüei pienshang to hauashi,

²⁶hoba nyi ai ong maangangda, masu pongsu shanga yingasikei, sanlon shanga yingasikei, nyakidei yingasikei, ayingsi nyi ai ong maangangkei kho shanga jungeila thükkei, hoba nyi BUNYUBOU kaibü Mühghaü thedanga shaujan, hoba no hoba kaibü chemdangei olinyolabü.

²⁷“Hobaje kan yoa kibü Levibü shuong nyi üpyojan; aishanga kan yoa haoeibü phejan ayingsi phetphanlabü aki.

²⁸Po sem weko thonbüa kho po jeteibüa an phejan hapbü pendou chem to sungjung louan phojan.

²⁹Hobaje Levibü shuong haoeneibü phejan ayingsi phetphanlabü kan yoa aki yingsije, kan yoa kibü yenbou shoujit, latnyu, kan yoa kibü shuong khei kanei ai ong kümlaje BUNYUBOU kaneibü Mühghaüei kan haükula shanga haoen louan maangamaiko shaulabü.