Read Chang Naga NGÜHKÜPAIBÜ 15 Bible Online

NGÜHKÜPAIBÜ 15 - Chang Naga bible

NGÜHKÜPAIBÜ 15

¹“Po nyetboubü thonbü wekoa nyi litila sakkujan.

²Hobaje litibü kho tegü kilabü; nam lotkubou wekoei haoeibü lepbou la ai lotkuan ki kho apbulabü haoei kho jembü lepbou ayingsi jaisina ka kho tukosekko asungjan; aishanga sanghsiyung apbula BUNYUBOUei ngühlang kua.

³Yenbou ka nyi kho hila thükkei; lausikei kaibü jaisina ika ai ong ki kho nyi kuan apjan.

⁴“Khei yingasikei kan yoa shalebü akilabü; aishanga nyi ong tat ngei ka la sakkubü habü pendou jungeila shanga BUNYUBOU kaibü Mühghaüei lenbü ditkho laualonga;

⁵BUNYUBOU kaibü Mühghaüei phetphan lela ka la kubü kaonyeka BUNYUBOUei maimaitham no haükulabü.

⁶Aishanga haoei thekubü tegü, ladang BUNYUBOU kaibü Mühghaüei no haükulaje, nyi phang juong la lotkulabü, lausikei nyije ladangkei lotkoleko akilabü, hoba nyi phang juong thüka songdaklabü, lausikei haoen aoeikei ka thüka song adaklabü.

⁷“Shalebü müt at, kaneibü jaisina yoa at, BUNYUBOU kaibü Mühghaüei kan la kubü sangnyua kisi nyi kaibü maanga makhetko akijan, ayingsi kaneibü jaisina shalebü ka kaibü ik asemeijan;

⁸lausikei nyi kaibü ik hao la sengkujan, hoba hao khambü shanga souko amakhetko lotkuashi.

⁹Po nyetboubü, sanghsiyung apbubü po nyangko kia dogo kaibü maangpona amaibü adamla maangsangashi; hoba kaibü jaisina shalebü khulimbo amaibü dambo hao la nyi aikei akuko phoan haoei ka khulimbo BUNYUBOU to ngekjinei ka la shedbü jinkulabü.

¹⁰Nyi hao la maangmai kuashi, hoba nyi hao la kujinei maangnyuangko kuashi, aishanga ho shangabü BUNYUBOU kaibü Mühghaüei nyi ai ong kümlaje pendoua no haükulabü.

¹¹Aishanga kaneibü kaonyeka shalebü ladangkei akiko akilabü; khoei kaonyeka kaneibü shalebü, kaneibü jaisina hoba khambü shuong to kaneibü ik maisho sengla ngei kan la sakkuda.

¹²“Kaibü jaisina, Ibribü bousu ayingsi yaksa che ka la yaakkuan kialonga, haoei po lak no khangenlabü, lausikei po nyetboubüa nyi hao kaibü kümkaleika litijan.

¹³Hobaje ladang nyi kaibü kümkaleika hao litilaje, nyi hao ikkong angaitijan;

¹⁴BUNYUBOU kaibü Mühghaüei ka la haükubü thüng, hao la nyi amakhetko kaibü sanlon shuong ka, amshang ka, semlüh nitshang ka, hao la kujan.

¹⁵Jih cheneije kankei Ijep kaodaka aaola lean kikei, hoba BUNYUBOU kaibü Mühghaüei kan khümenkei dogo nyi damenashi, kho tat ngei ka la ho sakkubü kuda.

¹⁶“Khei yingasikei haoei ka to ngei kaibü kümsilei üpyolabü dogo laualonga, aieilausi haoei no hoba kaibü chemdang sanouda, hoba ka yoa maian kümbei,

¹⁷kheijinei nyi jalongei haoeibü nou koukhüna sepbulabü, kheijinei ponpen shanga hao kaibü aao la lelabü; kho tegü ong nyi kaibü aaosao tokei kümlabü.

¹⁸Nyi kaibü kümkaleika hao litijinei nyi hoje seka dogo adamjan, aishanga haoei ka shanga po lak mulambü müteibü mukei jamde ong lekuko haoei kümsilei küma. Hobaje nyi kümbüleibü pendoua BUNYUBOU ka Mühghaüei no haükulabü.

¹⁹“Kaibü masu shuong hoba sanlon shuong ka shaang shatbü pendou BUNYUBOU kaibü Mühghaü la khümbo kuashi, shaang shatbü masu pongsu la aikei kümsilei akümtijan, ayingsi shaang shatbü saneibü wi akipjan.

²⁰BUNYUBOUei pienbü kaoena no hoba kaibü chemdangei BUNYUBOU kaibü Mühghaü thedanga kho shaujan.

²¹Khei yingasikei, khünei denche chühenlabü amaibü at kialonga, nyi kho BUNYUBOU kaibü Mühghaü la lemla teku.

²²Kho kanei kaneibü bakhün maanga asaopobü hoba saopobü meisiau khei saak ayingsi meishi tegü shaujan.

²³Kanei sii ashaujan; kho kanei dei tegü kaoa jonan apjan.