Read Chang Naga NGÜHKÜPAIBÜ 16 Bible Online

NGÜHKÜPAIBÜ 16 - Chang Naga bible

NGÜHKÜPAIBÜ 16

¹“Abib lit nou nouashi, hoba Püetbü lem BUNYUBOU kaneibü Mühghaü la likuashi; aishanga Abib lita BUNYUBOU kaibü Mühghaüei Ijep ka nangnak no leiyenkei.

²Kanei Püetbü lem shanga sanlon shuong hoba masu shuong ka lanei BUNYUBOUei haoeibü nyen phola pienlaje khünei BUNYUBOU kaibü Mühghaü la haitikuashi.

³Tokai jinbü wentek nyi kho yoa ashaujan; aishanga chalou nyet nyi ho yoa tokai ajinbü wentek, khonkulabü wentek shaujan; aishanga kan Ijep ka panteiko longkei; kaneibü salang sünga kanei Ijep kaodak apyobü chalou damenla shanga kanei shaujan.

⁴Chalou nyetnyet kan kishang aineikei tokai ühüptijan, hoba phe laobou khangnyet chasem kanei haitian lemda, ngeyang sühko aikei ajoutijan.

⁵BUNYUBOU kaibü Mühghaüei kan la kubü sangnyu aineikei kanei Püetbü lem lembü kho akulabü;

⁶lausikei BUNYUBOU kaibü Mühghaüei lanei haoeibü nyen phola pienlaje, khünei kanei Ijep apyobü chalou chasemlamto chanyu neplamto kanei Püetbü lem lembü kho kujan.

⁷BUNYUBOU kaibü Mühghaüei pienbü kaoena kanei thunganjuokan shaujan; hoba ngeyang kaneibü neichem lamjung sepeinyu longeijan.

⁸Chalou lak kanei tokai ajinbü wentek shaujan, hoba nyetbounyeta BUNYUBOU kaibü Mühghaü shanga saopobü kambü che kijan; kheijinei kanei kümsilei ai akümjan.

⁹“Kanei bale nyet wean chühjan; kanei bale nyet wean chühbü kho youshoua shaangbou langku hautibü jih ka youshou loan kibü sühko wean chühjan.

¹⁰Hobaje BUNYUBOU kaibü Mühghaüei kan la haükubü thüng, BUNYUBOU kaibü Mühghaü shanga mütpem wekoei luluei maangangbü jongsak kuko bale lem lijan;

¹¹hoba kaibü shou yoa, kaibü nou- yangnyu yoa, kaibü sambou hoba samnyu yoa, kaneibü sangnyua kibü Levibü yoa, yenbou, aaomüt, latnyu aoyou kan yoa ki, BUNYUBOU kaibü Mühghaüei haoeibü nyen doan phola pienbü kaoena BUNYUBOU kaibü Mühghaü thedanga kanei olinyojan.

¹²Kankei jih cheneije Ijepa aaola lean kikei, dogo kanei damenjan; hibü kanei habü yeikubü ngühkhüm maangsangko jungeijan.

¹³“Nyi kaibü aam ka hoba kaibü semlüh nitshang ka yoshaian phaia chalou nyetbounyet Dip lem nyi noujan.

¹⁴Hobaje no kaibü jayang nouyang shousi, kaibü sambou hoba samnyu, Levibü, yenbou, shoujit, latnyu, aoyou kaneibü sanga kida, haoen yoan kaibü lem olinyojan.

¹⁵Chalou nyet BUNYUBOUei pienbü kaoen che BUNYUBOU kaibü Mühghaüei nyi mouenbü pendoua hoba kaibü ikei kümbü pendoua haükulabü, hoba no lemailela olinlabü.

¹⁶“Poa semnei kan bousu pendou BUNYUBOU kaibü Mühghaü jungto haoei pienbü kaoen to loujan; tokai ajinbü wentek lema, bale lema, hoba dip lema; hoba haoen BUNYUBOU jungto ik kong aloujan.

¹⁷Mütpem weko BUNYUBOU kaibü Mühghaüei ka la haükubü thüng, haoei thükbü sungbajan.

¹⁸“BUNYUBOU kaibü Mühghaüei ka la kukho laubü sangnyu pendoua kan phang lulu shanga mütshuong mat tükde jemla shanga matjembü shuong hoba kümsilei bunyu shuong pienjan.

¹⁹Nyi ngühmai anangletjan, nyi the achühjan; aishanga besaei songbüdobü nyek thutida, hoba saopobü mütshuongeibü inletkuda.

²⁰No lang kila hoba BUNYUBOU kaibü Mühghaüei ka la kubü kaonyek phetphanla shanga ngühmai hoba nyi ngühmai ong shijan;

²¹“BUNYUBOU kaibü Mühghaüeibü lemshon thedanga nyi Ashera tegübü ai bulongkei akelabü;

²²ayingsi BUNYUBOU kaibü Mühghaüei mangsenbü saopobü thaonyu aikei kean aphojan.