Read Chang Naga NGÜHKÜPAIBÜ 17 Bible Online

NGÜHKÜPAIBÜ 17 - Chang Naga bible

NGÜHKÜPAIBÜ 17

¹“Nyi BUNYUBOU kaibü Mühghaü to chühenlabü kakbü ayingsi nali thebü masu pongsuei ayingsi sanlonei telem; aishanga kho BUNYUBOU kaibü Mühghaü thedanga mangsenlabü ki.

²“Kan yoa hoba BUNYUBOU kaibü Mühghaüei ka la kubü sangnyua luluei theletlanletbü leiluko bousuei yingsikei yaksaei yingsikei BUNYUBOU kaibü Mühghaü thedanga amaibü kümalonga,

³hoba thinei lubü mühghaü khangenalonga, khei ngei asakkubü, chanyu ayingsi litnyu müha kibü dan lembo hapalonga;

⁴hoba kho kan la lenalonga, hoba kho kanei dida longa, kanei maisho lamenjan, hoba chühashi, kho tükde dogo aukabü longan khei Israela mangsenlabü kümbei dogo chunga lapbü kialonga,

⁵kheijinei kanei bousu yingasikei yaksa yingasikei amaibü kümbü müt kho batak aijung longan laangei tetetjan.

⁶Müt nyi ayingsi sem aukabüei shedkubü müt kho haitijan; müt cheeibü aukabüei hao ühaitijan.

⁷Hao haitila shanga hao khulimbo aukabü shuongei shaangla ik shatjan, kho phaia ong müt pendouei ik shatlabü, kho tegü kan yoka müt amaibou kho apjan.

⁸“Ngüh at kan shanga matjemla aeibou sekan longalonga, sii angbü ngüh shanga ayingsi ngümyobü ayingsi kan yoa ngühsaknepbü shanga kaneibü bamanga lemenbü kisi kheijinei kanei meimeian BUNYUBOU kaibü Mühghaüei pienbü kaoen to angashi.

⁹Hobaje kho jiha Levi ungshedbou shuong hoba matjembü shuong jungto no loujan, hoba nyi haoen ka phelabü, hoba haoenei ka la matjembü ngetilabü.

¹⁰Hobaje kaoen laobou BUNYUBOUei pienlaje, khünei haoenei ka la lenbü pendou kho tegü nyi kümla maangsangjan.

¹¹Ngühkhüm laobou haoenei janenan ka la lenlaje kho tegütham hoba matjembü laobou haoenei ka to lenlaje nyi kümlabü, maeae yingsikei nanae yingsikei matjem laobou haoenei ka la lenlaje kho ka no asepeijan.

¹²Hobaje ao mütei BUNYUBOU kaibü Mühghaü thedanga khangenla khünei loan kibü ungshedbou to ayingsi matjem ngüha aleko, jembü maangleko kümlaje kho müt hailabü. Kho tegü kanei Israel ka amaibü apjan;

¹³hoba müt pendouei kho ditlabü, hoba hatlabü, hoba touje jembüei dambüei ongje akümlabü.

¹⁴“BUNYUBOU kaibü Mühghaüei ka la kubü kaonyek to no ladang loulaje, hoba kho jembüeibü yeian khünei kilaje, hoba ngo kaijembo kibü phang pendou phatko ngei kü thüka choba che pholabü dogo laulaje,

¹⁵BUNYUBOU kaibü Mühghaüei ao pienlaje nyi hao ka thüka choba yeitijan; kaibü mütli yo ka che ka thüka choba phokujan; kaibü mütli ayingbü küksithang nyi ka thüka aphojan.

¹⁶Khei yingsikei haoei hao shanga koli juong apholabü, ayingsi koli juong phola shanga mütshuong nyibou Ijep to üttijan, aishanga BUNYUBOUei ho hai lenakei, ‘Tou kan thito asepeilabü.’

¹⁷Ayingsi haoei maangpon sepeinyu angaila shanga haoei yak juong aphojan, ayingsi haoei jembü shanga hon hoba chandinam juong thanan aphojan.

¹⁸Ladang hao choba setshanga setlaje Levi ungshedbou shuong thedanga kibü ka haoei jembü shanga ho ngühkhüm le chenei dojan;

¹⁹hoba haoei kho hao yoa pholabü, khei BUNYUBOU haoeibü Mühghaü to soumo hatla ditletlabü shanga hoba ho ngühkhüm hoba sakkubü ngühkhüm shuong kümla shanga haoei haoeibü langkei salang sünga ho wejan.

²⁰Khei haoeibü maangpon jembü jaisina thüka atonenlabü, hoba hao hoba haoeibü shousi shuong athakko lounyu Israelbü yoa sanglea kila shanga haoei sakkubü ngühkhüm ka maeae ayingsi nanae asepeijan.