Read Chang Naga NGÜHKÜPAIBÜ 19 Bible Online

NGÜHKÜPAIBÜ 19 - Chang Naga bible

NGÜHKÜPAIBÜ 19

¹“Ladang BUNYUBOU kaibü Mühghaüei aoyoueibü kaonyek BUNYUBOU kaibü Mühghaüei ka la kuan khübü phang mautilaje, hoba nyi haoen shian apan haoeneibü sangnyu hoba chema kilaje,

²kaneibü kaoa BUNYUBOU kaibü Mühghaüei laobou ka la kuda, ka shanga sangnyu sem nyi phangche phojan.

³Müt haitibou weko khüto satetlanglabü lele BUNYUBOU kaibü Mühghaüei ka la phet phantibü kho lamnyu yeitilabü hoba kaibü kaonyek leilang kho sem la janjan.

⁴Müt haitibou aoei jembü langkei püetla khüto satetlanglaje ho tegü kilabü; aoei shanshedte mü haitilaje, khei shangied hao to mangsenyoko aki.

⁵Khei ladang müt che yam to bu akla koulaje hoba woukung ka wou lakan lubü la hao hailabü lele tetouda, kho müt kho tegübü sangnyu chenei satetlangan langkei püetla thükkei.

⁶Kho khei ayinglonga sii angbü phoklambüei müt haitibou kho shieiko hao khauang longan lam saasikei hao laphetan, khei hao haila muko akisikei hailabü lele hao to ngümlabü.

⁷Khei yingbü khoei ngei ka la sangnyu sem phangche kila sakkuda.

⁸“Hobaje BUNYUBOU kaibü Mühghaüei kaneibü pisibousi shuong to kan la kula thekubü tegü kaonyek pendou kan la kualonga,

⁹tat ngei laobou sakkuda, kho sakkubü pendou nyi jungeiko laualonga khei BUNYUBOU kaibü Mühghaüei sanoulabü, hoba pon- pen haoeibü lamnyua pailabü; kheijinei kho sangnyu sem to limbo nyi sangnyu sem toukei jinyola thükkei.

¹⁰Khünei BUNYUBOU kaibü Mühghaüei phetphanla ka la kubü kaonyeka shedbü akibü sii aphinlabü, khei ayinglonga sii phinbü shedbü ka to jinkulabü.

¹¹“Lausikei müt atei lubü to mangsenyoko kialonga, hoba hao shanga thoko kiteian, hoba hao khulimbo meimeian hao to hailabü lele ngümalonga, hoba khübü sangnyu che to laangatlanga longa;

¹²kheijinei haoenei sangkabü leiyeibü jaishou shuongei tongde hao khüka lapan hao haitila shanga sii phinbou si phoklambou ika khümbo kujan.

¹³Nyi hao to aikei phokei adamjan, lausikei kan haülabü hapla shanga shed akibü müteibü sii Israel ka sungan apashi.

¹⁴“Nyi BUNYUBOU kaibü Mühghaüei kan kila kubü kanei phetphanlabü kaonyeka shang- iedbü mütshuongei küman kibü kaibü leiboueibü leilang sungan üpjan.

¹⁵“Müt che khulimbo aukabü cheei ong ngühkhüm leilubü ayingsi shed shonbü, khei ai ong haoei shed shonlaje yuktila athük, aukabü penyi ayingsi sem sembungei ngüh yeila thükkei.

¹⁶Müt at khulimbo amlang aukabü at longan haoei shedtiyatibü shanga hao khulimbo aukabü kualonga

¹⁷kheijinei müt nyi lemen kibü BUNYUBOU thedanga ungshedbou thedanga hoba kho jihsiphaia kibü matjembou thed- anga lojan.

¹⁸Hobaje matjembouei ngüh haükokuokko lamlabü, hoba chühashi, aukabü kho amlangbü aukabü yingan kialonga

¹⁹kheijinei kanei hao to haoei haoeibü jenabou to kümla dambo kibü tegü kümashi. Kho tegü nyi ka yo ka müt amaibü apjan.

²⁰Hobaje aoyou jouan ki haoenei kho ditlabü, hoba hatlabü hoba touje kan yoa kho tegü amaibü ajungeilabü.

²¹Hobaje kaibü nyekei phokeiko achühjan; langkei jeila langkei, nyek jeila nyek, hauh jeila hauh, ik jeila ik, you jeila you.