Read Chang Naga NGÜHKÜPAIBÜ 2 Bible Online

NGÜHKÜPAIBÜ 2 - Chang Naga bible

NGÜHKÜPAIBÜ 2

¹“Kho phaia BUNYUBOUei kü la lenbü tegü, Saklangbü Yungnyu aeto sen sepeikei hoba yamlamang to meimeikei, hoba jih lounyu senei Seir shongh kaiko paikei.

²“Kheijinei BUNYUBOUei kü to laukei:

³Kanei ho shongh kaiko paithüng paia; yungthang aeto sepeiashi.

⁴Hobaje mütshuong to lenashi, ‘Seira kibü kaneibü jaisina Esaueibü shousi leilang danjung haula lamlean ong kia; hoba haoenei kan to hatlabü hibü kanei maisho ditashi;

⁵haoen to tewapyo; aishanga ngei kan la haoeneibü kao youphen lamshang che ongkei akulabü, aieilausi ngei Esau la Seir shongh kho phet kua.

⁶Kanei haoen ka namei shaula shausiyung jeklabü, hoba tokei kanei nam lu kanei yunglabü dei haoen ka jeklabü.’

⁷“Aishanga BUNYUBOU kaneibü Mühghaüei kümsilei pendoua kan haükua; ho yamlamang yaangbü danko paibü haoei ngeakei; habü po saonyi kan yoa BUNYUBOU Mühghaü yoan kikei; kan aieikei sha aleko kikei.

⁸“Hibü Seira kibü seneibü jaisina Esaueibü shousi shuong ka sen bangan Araba lam ka Elath ka hoba Eziongeber ka haukei.

⁹Hobaje BUNYUBOUei kü to laukei, ‘Moab la kipjim teku, ayingsi haoen to la teshuok; aishanga haoeneibü kao aikei kan la ngei akulabü; aieilausi ngei Loteibü shousi la Ar phet kua.’ ”

¹⁰(Emimbü shangied khünei kikei, eikshuong juong yaangbü hoba Anakimbü tegü thong loubü;

¹¹Anakim tegü haoen to Refaim dogo lauda.

¹²Horbükei shangied Seira kikei, lausikei Esaueibü shousi shuongei haoen kakan apbei, hoba haoen thedanga haoen mautikei, hoba haoen jeiko kikei, BUNYUBOUei haoen la kubü kaonyeka Israelbüei kümbü tegü.)

¹³“Tou meimeiashi, hoba Zered shumang danashi. Hibü Zered shumang dankei.

¹⁴Hobaje senei Kadesh Barnea ka meimeian loubü jih ka Zered shumang danbü sühko po khujinto set kikei, kho BUNYUBOUei haoen to theyolanyobü tegü haoeneibü shaishang kabü yoa wapyola haubü meten pendou amaushongko kikei.

¹⁵Khüto liman haoen amauti shongko haoen shaishanga kibü shuong ka mautila BUNYUBOUeibü ik haoen thüka kikei.

¹⁶“Hibü eikshuong yoka wapyola haubü pendou mautian

¹⁷BUNYUBOUei kü to laukei,

¹⁸Tat kanei Moab leilang Ar danlabü,

¹⁹hoba ladang Ammonbü leilang nyangko kan loulaje hao to la la teyei, ayingsi haoen to tewapyo, aishanga ngei Ammonbü kao kan la phetphanla akulabü; aieilausi ngei Loteibü shousi la kho phetphan kua.”

²⁰(Khoto tokei Refaim kaonyek dogo lauko kikei; shangied Refaim khünei, lausikei Ammonbüei haoen to Zamzamin dogo lauda.

²¹Eikshuong kho yaangbang hoba juong hoba Anakimbü tegü thong loubang yaangbang, lausikei haoen thedanga BUNYUBOUei haoen mautikei, hoba haoenei haoen aüanapbei, hoba haoen kishanga kikei.

²²Khei BUNYUBOUei Horbü haoen thedanga mautiko, Esaueibü shousi shanga haoei kümbü tegü; hoba tat sühko haoenei kakan sattian haoen kishanga kibü tegü;

²³hoba sangkhonga Gaza sühko hauan kibü Avvimbü, Kaftor ka loubü Kaftorbüei haoen mautikei, hoba haoen kishanga kikei.)

²⁴“Senei Moab danjung hauan phaia BUNYUBOUei sen to laukei, ‘Kan meimeijung hauashi hoba Arnon pholi danko haushi, chühashi, Heshbonbü Choba Amorbü Sihon, hoba haoeneibü kaonyek ngei kaneibü ika khümbo kua, shila khangashi, hoba hao lason to shuokyola ngaashi.

²⁵Tat ka khangan mühnyu phanga pendou aenei ka shanga hatlamoklabü ngei mütshuong thükto jinkulabü, haoenei kan shanga ditlabü hoba lühlabü, hoba kan hangshong khonkulabü.’

²⁶“Hobaje Kedemot yam ka ngei ngühlang künbü Heshbon sangnyua kibü Sihon choba jungto sangmai ngühlang hautiko laukei,

²⁷‘Ngo kaibü kaodak danko hautishi, ngo khongnyu lama ong setlabü; nanae maeae aitokei asepeiko ong haulabü.

²⁸Nyi kü la ngei shaulabü shausiyung yaakkulabü, hoba kü la yunglabü dei nam lu yaakkushi.

²⁹BUNYUBOU küneibü Mühghaüei kün la kula kibü kaonyek to Jordan danko ütshongko Seira kibü Esaueibü shousi shuong hoba Ara kibü Moabbüei kü to kümbü tegü ngo youei ong dantishi.’

³⁰“Lausikei Heshbonbü Choba Sihonei hao danko sen adanti, aishanga tat haüthükbü tegü kaneibü ika kulabü shanga BUNYUBOU kaibü Mühghaüei haoeibü maangpon kaangtikei hoba haoeibü maangpon kaangkhühtham aptikei.

³¹“Hobaje BUNYUBOUei kü to lenkei, ‘Chühashi, Sihon hoba haoeibü kaonyek ka la khümbo kula shanga haoeneibü kaodak phanla shanga kho lela khangashi.’

³²Kheijinei kan khulimbo Sihon, hao hoba haoeibü eikshuong pendou Jahaza lason to longkei.

³³Hobaje BUNYUBOU seneibü Mühghaüei sen la hao khümbo kukei, hoba senei hao hoba haoeibü eikshuong pendou haitikei.

³⁴Hobaje senei kho chaloua haoeibü sangnyu lekei, hoba müt kibü sangnyu pendou komlepbei hoba bousu yaksa, nashousi shuong che ongkei ajoutiko haitikei.

³⁵Samkeisamuk ong sen shanga haitikei, shian apbü sangnyu ka peisilei yoan senei sungkei.

³⁶Arnon pholi thonbüa kibü Aroer ka hoba pholia kibü sangnyu ka khei Gilead sühko sen shanga sangnyu che ongkei senei asühlabü lele akitei; BUNYUBOU seneibü Mühghaüei pendou sen la khümbo kukei.

³⁷BUNYUBOU seneibü Mühghaüei thangetbüei ong, kanei Ammonbü kaonyek nyangko, ayingsi Jabbok shumang aenei ayingsi shongh kaodak nyangko alou.