Read Chang Naga NGÜHKÜPAIBÜ 20 Bible Online

NGÜHKÜPAIBÜ 20 - Chang Naga bible

NGÜHKÜPAIBÜ 20

¹“Ladang no dangbou khulimbo lason to haulaje, hoba katoje koli, kailong hoba müt juongbou haplaje, no haoen to hatko teki, aishanga Ijep ka leian longbou BUNYUBOU kaibü Mühghaü ka yoa kia.

²Hobaje ladang kan lason che nyangko loulaje, ungshedbouei louan mütshuong to joyojan.

³Haoei haoen to laulabü, ‘Ditashi, O Israel, kan dangbou khulimbo tat lason che to hauda, kan maang tekou, te- hüt, ayingsi telüh, ayingsi haoen thedanga kan temok.

⁴Aishanga BUNYUBOU kaneibü Mühghaü kan yoa hauda, kaneibü dangbou khulimbo kan wapyolabü hoba kan khümenlabü.’

⁵“Kho phaia leiyeibü shuongei eikshuong to lenlabü, ‘Aoyouei chem haanbü dangan kho asaüenkei, hao chemto ngaila thükkei, kho khei ayinglonga hao lasona haisi lubüei kho saüenlabü.

⁶Aoyouei semlühlaak lean phoan kho ka hek shauan achüh, hao chem to sepeinyu ngaila thükkei, kho khei ayinglonga hao lasona haisi lubü mütei buhek kho shaulabü.

⁷Aoyouei yaksa phean, lausikei sao to chem akanko ki, hao chem to sepeinyu ngaila thükkei, kho khei ayinglonga hao lasona haisi lubüei sao lelabü.’

⁸“Hobaje leiyeibü shuongei toukei laulabü, ‘Aoyou hatda, hoba maang ka ngaian ki, hao chemto sepeinyu ngaijan, kho khei ayinglonga hao himshuong maang ka ngailabü.’

⁹Leiyeibü shuongei eikshuong to joyobü thonjinei eikshuong thüka sekbülakbü lajamleibou haoenei pienjan.

¹⁰“Ladang nyi sangnyu che khulimbo wapyola haulaje shaangla nyi ka to sangmai kümla lenashi.

¹¹Sangnyu to sangmai kümbo kan la bakhün ipbualonga kheijinei khünei kibü müt kümtileitiashi.

¹²Lausikei sangnyu khoei ka to sangmai akümlonga hoba ka khu limbo wapyoalonga, kheijinei nyi hao koman sungashi.

¹³Hobaje ladang BUNYUBOU kaibü Mühghaüei kho ka la khümbo kulaje nyi khünei kibü bousu pendou inei haitijan.

¹⁴Lausikei nashou yaksa hoba samkeisamuk hoba sangnyua kibü pendou khei soletbü peilaleila yeian lelabü hoba BUNYUBOU kaibü Mühghaüei ka la kubü dangbou shangabü soletbü kho nyi shaujan.

¹⁵Sangnyu laobou no kaijembo kibü phang shangabü aying, ka ka lounyu bangjung hauan kibü sangnyu pendou to nyi kho tegü kümshi.

¹⁶“Lausikei hanei kibü phang sangnyua laobou BUNYUBOU kaibü Mühghaüei ka la phetphanla kuda, nyi langkei che ongkei jouan tephoku.

¹⁷Lausikei BUNYUBOU kaibü Mühghaüei ka la sakkubü tegü nyi maisho Hitbü, Amorbü, Kananbü, Perizbü, Hivbü hoba Jebuzbü shuong mautijan.

¹⁸Khünei haoenei kan la haoeneibü Mühghaü shuong shanga haoenei kümbü mangsenlabü kümsilei pendou achühlettilabü hoba kho tegü BUNYUBOU kaneibü Mühghaü khulimbo shabü ashonlabü.

¹⁹“Ladang kanei lela shanga wapyoko jih lounyu leko sangnyu kho komleplaje kan wou jungan hauan bunyu kho awapjan, aieilausi kanei khübü buhek shaulakei aingean, kheibü kho kanei akan üpjan; aishanga khongthua bunyu shuong kho müt tegü kanei shilep sai?

²⁰Nyi ngebü bunyu laobou lang hekbü bunyu aying, kho ong nyi mautilabü, hoba sangnyu kho atuongshongko ka to wapyobü sangnyu khulimbo nyi kaijembo thangetlabü kümjan.