Read Chang Naga NGÜHKÜPAIBÜ 21 Bible Online

NGÜHKÜPAIBÜ 21 - Chang Naga bible

NGÜHKÜPAIBÜ 21

¹“BUNYUBOU kaibü Mühghaüei no kila kubü kaodaka khongthua müt at aoei ngümettikei kho angeko haitian hapalonga,

²kaneibü leiyeibü hoba matjembü shuong jungto haujan, hoba hao haitibü kaijembo kibü sangnyu shuong müt haibü kaoen ka lalokche kho takanchühjan.

³Hobaje haibü mang nyangetnyu kibü sangnyu jaishou shuongei kümsilei küman achühbü hoba sek shapan achühbü masu saoen che sungbalabü.

⁴Hobaje kho sangnyu jaishou shuongei ladangkei sek amoubü hoba lilabú jinan achühbü dei kouko kishang yomang to leian yanlabü hoba yomang khünei masu saoeneibü ngüm kho leilutikulabü.

⁵Hobaje Levi shousi ungshedbou shuong nyangko loulabü, aishanga haoenei hao khangenlabü, hoba hao nyen haükulabü. BUNYUBOU kaibü Mühghaüei haoen pienkei, hoba kho tegü lemenbü pendou hoba ngümyobü pendou haoenei panlabü.

⁶Hobaje kho sangnyu kabü leiyeibü jaishou shuong pendouei haibü mang nyangko kibü yomanga masu saoeneibü ngüm leilubü thüka ik sakan aplabü.

⁷Kho phaia haoenei ho hai laulabü, ‘Küneibü ikei ho sii üangti, ayingsi küneibü nyekei ho kümbo ühüp.

⁸Kaibü mütli Israel nyi ao- you khümenkei shedbü apbushi. O BUNYUBOU, hoba shedbü akibü sii shanga ka mütli Israel thüka tentian tephokuma. Hobaje haoen la sii phinbü shedbü apbushi.’

⁹Kho tegü BUNYUBOU thedanga ai tükde ki kho nyi kümjinei shedbü akakbü sii kan yo ka saüenlabü.

¹⁰“Ladang kaibü dangbou khulimbo lason to haulaje, hoba BUNYUBOUei haoen kaibü ika thüngbou yeitilaje,

¹¹langsenbü yoa saomaibü yaksa at nyi mangsühko damalonga yakla lela nyi sao ngala thükkei.

¹²Kheijinei nyi sao kaibü chem to leian loulabü, hoba saoeibü khu shuan aplabü hoba saoei iksen linan aplabü.

¹³Hobaje saoei langsenbü neisimei aplabü hoba kaibü chema kilabü, hoba saoeibü nyusibou shanga lit che manghaaplabü. Kho phaia no sao jungto haula thükkei, hoba no saoeibü lao yeilabü, hoba sao kaibü yak yeilabü.

¹⁴Nyi sao to maang ühailonga nyi sao haumangsühbü to hautiashi; lausikei ai nam lukei sao ayaakjan; nyi sao himou bautisikei sao to nyi aao che tegü tejungei.

¹⁵“Müt cheei yak müt nyi kialonga che haoei sanouda, cheje haoei nangletda, hoba haoei sanoubü hoba nangletbü hamei hao la shou bukkualonga, hoba shaangbü shou kho nangletnyu apyonyueibü shou yingalonga,

¹⁶kheijinei haoei haoeibü shousi la jembü nyaksinam phet phantinyet haoei sanounyueibü shou kho haoei nangletnyu apyonyueibü shou, ao shaangbü shou ki, hao to jai teyeiti.

¹⁷Lausikei haoei nangletnyu apyonyueibü shou la haoei kibü ka phejan nyi aei kuko hao sungletjan; aishanga hao ka shaang pakbü hao ki, hoba jaishou phejan kho hao shangabü ki.

¹⁸“Müt ateibü shou maang amaibü hoba ngüha alebü at kialonga, khei nyueibouei haksikei haoen to aditkuko kialonga,

¹⁹nyusibouei hao laplabü hoba haoeneibü sangnyu leiyeibü shuong jungto hoba hao kishang sangnyu bakhün to leian loulabü.

²⁰Hobaje sangnyu leiyeibü jaishou shuong to laulabü, ‘Küneibü shou ho maang amai hoba ngüha aleda, haoei künei lenbü aditda; hao apsileko kibü yoa ihei jaakbü müt ki.’

²¹Kheijinei sangnyua kibü müt pendouei hao laangei tetetkulabü; kho tegü kan yoka kan la amaikubü aplabü, hoba Israelbü pendouei ditan hatlabü.

²²“Hobaje müt atei haila muko shabü shonalonga, hoba hao haitialonga hoba bua saütian phoalonga,

²³haoeibü mang langyang sünga bua aphokujan, lausikei nyi khünyettham khünan apjan, aishanga ao phenetnyu hailaje, hao Mühghaüeibü shedsikhau phanga kia; hoba BUNYUBOU kaibü Mühghaüei kanei phetphanla kubü kaonyek ashatijan.