Read Chang Naga NGÜHKÜPAIBÜ 22 Bible Online

NGÜHKÜPAIBÜ 22 - Chang Naga bible

NGÜHKÜPAIBÜ 22

¹“Nyi kaibü jaisinaeibü masu pongsu ayingsi sanlon lam maan satbü hapan nyi hukoshepbo teki; nyi haoen kaibü jaisina jungto nyibou leian longeikujan.

²Hobaje kaibü jaisina kho ka junga nyangko akilonga, ayingsi nyi hao angelonga, kheijinei nyi kaibü chem to leian loulabü hoba kho ka yoa kaibü jaisinaei lamjung alou shongko phokulabü hoba nyi nyibou hao la kungaijan.

³Hobaje kho tegü nyi haoeibü gadu shangakei kümjan; hoba haoeibü neisimei shangakei kho tegü kümlabü; hoba kaibü jaisina ka maubü ajanjan pendou haoei ai maukei, hoba laobou nyi hapbei, kho tegü kümjan, nyi no lolo tehuei.

⁴“Nyi kaibü jaisinaeibü gadu ayingsi haoeibü masu pongsu lama tuongan hapsi nyi khübü ka no hueiko teki, nyi maimaitham haoen thuiko phonashi.

⁵“Yaksa cheei bousueibü neisimei alejan, ayingsi bousuei yaksaeibü neisimei alejan, aishanga aoyouei khübü kümsilei kümlaje, BUNYUBOU kaibü Mühghaü thedanga mangsenlabü ki.

⁶“Kaibü lamnyua aueibü hap che ka thedanga kialonga, bunyu ata ayingsi kaoa shoushou ayingsi tei kisi ayingsi teia ayingsi shoushou yoa pakan kisi nyi nyunyu kho asungjan.

⁷Nyi nyunyu kho sattiashi, lausikei shoushouje nyi sungla thükkei, khünei no maian kilabü, hoba kaibü salang louko kienlabü.

⁸“Ladang nyi chem haanbü danglaje, kheijinei nyi kaibü chemdaka chem kaijembo thangngaijan, khüka müt at atetsi, kho ka nyi kaibü chemdang thükto sii angbü shedbü asungbalabü.

⁹“Nyi kaibü semlühlaaka lilabü den penyi awenjan; khei ayinglonga buhek khümbo kho nyi wenbü lilabü hoba semlühlaak ka longbü kho saoposhanga khümbo kuan apjan.

¹⁰“Nyi masu che si gadu che la liko sek alaütijan,

¹¹“Nyi wi si phemba souyobü nei aneijan.

¹²“Kaibü nei laobou nyi neida nei nyek leia neiyik jinashi.

¹³“Müt cheei yaksa che ngasi hoba sao jungto atsi, hoba sao amangsühlonga,

¹⁴hoba himou kümsilei sao la jinkualonga, hoba sao la nyenshed sungbualonga, ‘Hobaje ngei ho yaksa ngakei, hoba ngo sao nyangko loujinei ngei sao to saosüng medei tetsida ühüp,’ dogo laualonga;

¹⁵“kheijinei medeinyueibü nyusibouei medeinyu saosüngbü tetsida shuong sungjung louan bakhüna sangnyu jaishou shuong jungto sungbalabü.

¹⁶Hobaje medeinyueibü bouei leiyeibü jaishou shuong to laulabü, ‘Ngei kü shou nouyangnyu ho müt la yakla lela kukei hoba haoei sao amangsühda;

¹⁷hoba chühashi, haoei sao la himou baulabü kümsilei jinkuko laukei: Ngei sao to saosüngbü medei tetsida ühüp; khei yingsikei, habü ho kü shou saosüngbü medei tetsida shuong ki!’ Hobaje haoenei sangnyu leiyeibü jaishou shuong thedanga nei laman phokulabü.

¹⁸Hobaje sangnyu leiyeibü jaishou shuongei müt kho leijung louan hao to ngümlabü.

¹⁹Hobaje haoenei hao ka namshau chandinam saongao shaulabü, hoba medeinyueibü bou la kho kulabü; aieilausi Israelbü medei che thükto nyenshed sungbakukei; hoba sao haoeibü yakla yeingailabü; haoei haoeibü langkei salang sünga sao asattijan.

²⁰“Lausikei kho tükde yingan kialonga, hoba saosüngbü medei tetsida sao to ühüplonga;

²¹kheijinei haoenei medeinyu kho boueibü koukhün to leian longlabü, hoba sao sangnyu kabü mütshuongei sao haitila laangei tetlabü; aieilausi saoei Israela boueibü chema pejapela yeian kümbei; kho tegü nyi kan yo ka amaibü apjan.

²²“Müt cheei lubüeibü yak to jambo hapalonga kheijinei haosiham hailabü, yaksanyu to asangalanbou bousubou hoba yaksanyu kho; kho tegü nyi Israel ka amaibü tekan apjan.

²³“Phean phobü yaksa che kisi, hoba müt cheei sangnyua sao haüyoan sao to jamalonga,

²⁴kheijinei nyi sangnyu bakhün ka haosi ham leijung longjan, hoba kanei haosi ham laangei tetetjan; aieilausi sao sangnyua kisikei, yaksanyuei thuibü shang- a angek, hoba bousubou khokei jembü lepboueibü yak haoei leilukukei; kho tegü nyi kan yo ka amaibü tekan apjan.

²⁵“Lausikei bousubou khoei phean kibü yaksanyu kho seka hapan bousubou khoei sao to tukosekko jamalonga; kheijineije bousu aoei sao to jambei hao ong hailabü.

²⁶Lausikei medeinyu kho to nyi ai akümlabü, medeinyu to haila muko shedbü aki; aishanga ladang müt cheei jembü lepbou khulimbo meimeilaje hoba hao haitilaje, kho tegü ong kho kümsilei ki.

²⁷Aishanga haoei sao seka hapbei; phean phobü medeiei ngekkei hoba sao khümenla khünei ao akitei.

²⁸“Müt cheei saosüngbü medei nashou che, ao müei phean aki sao hapan sao to hatyolanga longa hoba sao to jamalonga hoba haoen hapenalonga;

²⁹kheijinei aoei sao to jambei haoei medeinyueibü bou la chandinam shekel anjinsem kulabü, hoba sao haoeibü yak la lelabü; aieilausi haoei sao leilutikei, haoeibü salang sünga sao üpbo kijan.

³⁰“Müt cheei haoeibü boueibü yak alejan, hoba boueibü yak to ajamjan.