Read Chang Naga NGÜHKÜPAIBÜ 23 Bible Online

NGÜHKÜPAIBÜ 23 - Chang Naga bible

NGÜHKÜPAIBÜ 23

¹“Aoeibü temlang nitnyinan ki, ayingsi mütlüh lipan apan ki, hao BUNYUBOUeibü kamshang to atla athük.

²“Dangshouei BUNYUBOUeibü kamshang to atla athük; meten anboubü sühko hao ka pakbü shuongei BUNYUBOUeibü saopobü kamshang to ütlabü.

³“Amonbü ayingsi Moabbü BUNYUBOUeibü kamshang to ütjan.

⁴Aieilausi kan Ijep ka longjinei haoenei shausiyung hoba dei jungan kan shuokla alou, hoba kan to khükti uoktila shanga Mesopotamaiaa kibü Pethor ka Beoreibü shou Balaam haoenei chikei.

⁵Khei yingasikei BUNYUBOUei Balaameibü ngüha ale, lausikei BUNYUBOU kaibü Mühghaüei khükbüokbü kho ka shanga haülabü yeitikei, aieilausi BUNYUBOU kaibü Mühghaüei ka to sanoukei.

⁶Nyi kaibü langkei sünga haoeneibü hakso ayingsi haoen naangmaibü telam.

⁷“Nyi Edombü amangsenjan, aieilausi hao kan bukjambü ki. Nyi Ijepbü to amangsenjan, aieilausi haoeneibü kaoa no yen la lean kikei.

⁸Meten semboubüa bukbü haoeneibü shousi shuongei BUNYUBOUeibü kamshang to atla thükkei.

⁹“Ladang nyi kaibü dangbou shuong khulimbo meimeilaje, hoba shaishanga kilaje, kheijinei nyi kümsilei amaibü pendou ka saüenan kijan.

¹⁰Kan yoa müt at nangnak saangan apbüei asao- poko apalonga hao shaishang ka longtijan, hao shaishang to ütjan.

¹¹Lausikei chasem haoei jembü lolo mang yuan apjan, hoba chanyu nepan hao shaishang to loulabü.

¹²“Tokei no kishang khongaenei apshang leshang kijan, hoba no khüto khongaeto haujan.

¹³Kaibü shapsikün yoa thamsuokjin che kijan, hoba ladang nyi khongaenei aplalelaje nyi khoei thujan, hoba nyi apbü kho jonlepan phojan.

¹⁴Aishanga BUNYUBOU kaibü Mühghaüei kan khümenla hoba kaneibü dangbou shuong kaneibü ika kula shanga kan shaishanga paida, hibü ka to aikei asaopobü ühüplabü, hoba ka jungka hao sepeijung asatla shanga kan shaishang saopobü kijan.

¹⁵“Sambü ao jembü bunyu jungka satjung louan ki, hao bunyu la khümbo akujan.

¹⁶Kan yoa hao kimangsühbü tan laoboua hao kila haoei pienlaje khünei hao ka yoa kilabü, nyi hao to mangthem ajungeilabü.

¹⁷“Israel sao aokei suonlamnyu la ayeijan, hoba Israelbü bousu aokei suonlambou la ayeijan.

¹⁸BUNYUBOU kaibü Mühghaü chem to takletbü lembü shanga pejapelabü mueibü nam, ayingsi keieibü munam aikei asungbajan; aishanga penyi ham kho BUNYUBOU kaibü Mühghaü thedanga mangsenlabü.

¹⁹“Nyi kaibü jaisina la phopbü yoan, nam phopnam yingsikei, shauayunga ayingsi ajanjan phopbü yoan alotkujan.

²⁰Küksithang la nyi phopnam yoan lotkula thükkei, lausikei laobou kaodak nyi lela hauda khünei nyi kümbü pendoua BUNYUBOU kaibü Mühghaüei no haükulabü shanga jembü jaisina la nyi phopbü yoan alotkujan.

²¹“Ladang nyi BUNYUBOU kaibü Mühghaü la denche takletkulaje, kho nyi aphaiko kujan, aishanga BUNYUBOU kaibü Mühghaüei kho ka ka lelabü haang, hoba kho ka shanga shedbü yinglabü.

²²Lausikei atheletko kialonga kho ka to shabü akilabü.

²³Lauan apbo thekubü kho nyi maangangko thekubü yingsije BUNYUBOU kaibü Mühghaü to nyi thekubü tegü nyi kümjan.

²⁴“Ladang kaibü lepboueibü semlühlaak to atlaje, nyi shaumang sühbü tegü semlüh hek shaumang maiko shaula thükkei; lausikei nyi kaibü ona aikei ajinjan.

²⁵Ladang kaibü lepboueibü loan kibü youshou laak to no atlaje, nyi kaibü ikei youman yetan shaula thükkei, lausikei kaibü lepboueibü youshou to nyi laangku alitijan.