Read Chang Naga NGÜHKÜPAIBÜ 24 Bible Online

NGÜHKÜPAIBÜ 24 - Chang Naga bible

NGÜHKÜPAIBÜ 24

¹“Ladang bousu cheei yaksa che lelaje, hoba sao yoa chem kanlaje, yaksanyu to den- che chühenbü ka yaksanyuei hao aolintiko aptisi, haoei sao la bangbü le che dokulabü, hoba kho saoeibü ika kuan haoeibü chem ka sao sattilabü.

²Hobaje ladang haoeneibü chem ka sao bangjung satlaje, sao hauan lubüeibü yakla lela thükkei.

³Hobaje lao khoei sao amangsühsi hoba sao la bangbü le dokualonga, hoba kho saoeibü ika kualonga hoba haoeibü chem ka sao sattialonga, ayingsi haoeibü yakla lela sao ngabü nyiboubü lao kho haian apalonga;

⁴saoeibü shaangbü lao aoei sao sattikei, sao nyibou hao yakla lela shanga sao asaopoko yeisije haoei alejan; aishanga BUNYUBOU thedanga kho mangsenlabü ki; hoba BUNYUBOU kaibü Mühghaüei ka la phetphanla kubü kaodak nyi teshati.

⁵“Ladang müt cheei yaksa haanbü ngalaje, hao sepai tan yo to ohaujan, ayingsi ai kümaleiakei hao pakan ajinjan; po cheje hao chema hopatham kilabü, hoba haoei yaksa kho olinko kitijan.

⁶Aoeikei ngünbü laang ayingsi ngünbü laangdakei athealanjan, aishanga haoei langkei cheei theyolanyoda.

⁷“Müt cheei jembü müt Israel shousi at kokla haubü lapensi, hoba hao to aao tegü jungeialonga, ayingsi hao yaakalonga, kho kokbou kho haitijan. Kho tegü kan yoka amaibü nyi apbulabü.

⁸“Im longjinei Levi ungshedbou shuongei kan la lenbü tegü pendou amashikko kümla maangsangashi; ngei haoen la sakkubü, kanei kho tegü jungeiko kümashi.

⁹Kan Ijep ka longjinei lama BUNYUBOU Mühghaüei Miriam to ai kümbei damenashi.

¹⁰“Ladang nyi kaibü lepbü sangmang la denche lotkulaje no haoeibü chem to haoei theletbü hila ütjan.

¹¹No khonga haiteijan, hoba aola nyi lotkuda haoei authebü kho khongto ka jungto jungan longlabü.

¹²Hao shalebü müt yingalonga haoei authebü peialeia ayepjan.

¹³Hao jembü neia yeplabü hoba no haükulabü shanga maimaitham ladang chanyu neplaje nyi sepeian hao la authebü kungaiashi, hoba kho BUNYUBOU kaibü Mühghaü thedanga ka shanga saopobü kilabü.

¹⁴“Nyi jembü mütli yingsikei, ayingsi kaibü kaonyek, kaibü bamanga kibü kaibü yenbou yingsikei eikmu lambü sambü ao yongko shalebü ki, nyi akhangsejan.

¹⁵Chanyu anepjinei nyi haoeibü munam khünyettham kuashi; aishanga hao shalebü kho maanglema ki; khei ayinglonga haoei kakhu limbo BUNYUBOU to ngeklabü, hoba kho ka shanga shabü kilabü.

¹⁶“Shousi shanga nyusibou ühaitijan, ayingsi nyusibou shanga shousi ühaitijan, mütpem weko jembü shanga haitilabü.

¹⁷“Yenbou ayingsi bou akibü matjem nyi ajuknyinkujan, ayingsi latnyueibü neisimei angla tepho.

¹⁸Lausikei Ijepa no aaola lean kikei, hoba BUNYUBOU kaibü Mühghaüei kho ka khümenkei dogo nyi damenashi.

¹⁹“Ladang nyi kaibü sek ka nyak sunglaje, hoba seka youshang che maalaje, no kho sungla nyibou tengai; nyi kümbü kümsilei pendoua BUNYUBOU kaibü Mühgaüei no haükula shanga kho yenbou, bou akibü hoba latnyu shanga kilabü.

²⁰Ladang oliv long ka hek kheilaje, nyi nyibou bhek lamjung ohaujan, kho yenbou, bou akibü, hoba latnyu shuong shanga kilabü.

²¹Ladang nyi kaibü semlühlaak ka semlüh hek kheilaje, nyi phaito kho heshaila angailabü; ho yenbou, bou akibü hoba latnyu shuong shangabü kilabü.

²²Hobaje Ijep kaodaka no aaola lean kikei dogo nyi damenlabü; hibü ngei ka la ho kümla sakkuda.