Read Chang Naga NGÜHKÜPAIBÜ 26 Bible Online

NGÜHKÜPAIBÜ 26 - Chang Naga bible

NGÜHKÜPAIBÜ 26

¹“Ladang BUNYUBOU kaibü Mühghaüei kan la phet- phan kubü kaonyek to kan atlaje hoba khonei shaian aplaje, hoba khünei kilaje

²BUNYUBOU Mühghaüei kan la kubü kaodak ka hapbü pendou ka shaangbü buhek kanei jungan loulabü, hoba kho kama phoashi, hoba BUNYUBOU kaibü Mühghaüei haoeibü nyen laobou kaonyeka kitila pienlaje khüto haulabü.

³Kho jiha ungshed jaishoubou jungto no haulabü, hoba hao to lenashi, ‘BUNYUBOUei seneibü pisibou la thekubü kaodak to ngo lotan kia dogo tat ngei BUNYUBOU kaibü Mühghaü to ngekda.’

⁴“Hobaje ungshedbouei kaibü ik ka kam kho sungletlabü, hoba kho BUNYUBOU kaibü lemshang thedanga pholabü.

⁵Kho phaia nyi BUNYUBOU kaibü Mühghaü thedanga laulabü, ‘Ngeibü bou shoongaiko kibü Arambü che kikei, hao tan hanbü che yoa Ijepa kila yankei, hoba khünei hao phang che, yaangbü, hau yaangbü hoba juong la yeikei;

⁶Ijepbüei kün to kaangko jungeikei, kün aaola lekei, hoba kün la aaoeibü kümsilei jangan phokukei.

⁷Lausikei künei küneibü pisibou Mühghaü to ngekkei, hoba BUNYUBOUei küneibü ngühlang ditkei, hoba kün aaola lebü, kün hükomangko kümbü hoba kün khonkutibü hapbei.

⁸Hobaje BUNYUBOUei hau kibü ik hoba phem shingan, hatlamoklabü yaang tetsida hoba seikümseileiei kün Ijep ka leiyenkei.

⁹Hobaje ho kaodak to kün leian louan haoei kün la sendei hoba naodei koubü kaodak kukei.

¹⁰Hobaje tou chühashi, O BUNYUBOU, nyi kü la kubü kao ka longbü shaangbü buhek ngei BUNYUBOU jungto sungbada.’ “Hobaje nyi BUNYUBOU kaibü Mühghaü thedanga kho phokulabü, hoba BUNYUBOU kaibü Mühghaü thedanga lemashi.

¹¹Hobaje BUNYUBOU Mühghaüei ka la hoba kaibü chemdang la kubü maibü pendou, no hoba Levibü kan yoa kibü yenbou yoan olinyoashi.

¹²“Sembou poa, kho an phejan kubü po, ladang nyi an phejan kubü pendou thonlaje, kheijinei nyi kho Levibü la, yenbou la, bou akibü la hoba latnyu la kaibü bakou phanga haoen shishenko shaula nyi kujan.

¹³Hobaje BUNYUBOU kaibü Mühghaü to nyi laulabü, ‘Nyi kü la sakkubü tegü, nyi sakkubü aikei aleilutiko ayingsi khübü kho amaako, ngei kün chema ngei khümbo kubü peisilei sungena, hoba tokei, ngei kho Levibü la, ngeibü benbou yenbou la, bou akibü hoba latnyu la kua; nyi sakkubü at ongkei ngei aleilukukei, ayingsi ngei khübü kho amaakei.

¹⁴Ngo mang haapjinei ngei an phejan ashau, ayingsi ngo ihinseibü chaloua khübü denche ongkei sungan üp, ayingsi haibü la khübü ka ai aku; ngei BUNYUBOU kü Mühghaüeibü ngüha lekei, hoba khübü pendou nyi kü la sakkubü tegü kümbei.

¹⁵Kaibü saoposhang khuthük ka chühyantiashi, hoba kaibü mütli hoba küneibü pisibou la thekubü sendei hoba naodei koubü kaodak haübuma.’

¹⁶“Tat BUNYUBOU kaibü Mühghaüei sakkubü ngühkhüm deikhüm kümla ka la sakkuda; hibü nyi habü ho kaibü maangpon pendouei hoba kaibü soushou pendouei jungeiashi.

¹⁷Haoeibü lamnyua paila hoba haoeibü sakkubü ngühkhüm hoba haoeibü matjem hoba haoeibü ngüha lela, tat BUNYUBOU kho kaibü Mühghaü yingla theleda.

¹⁸Hobaje haoei thekubü tegü hoba nyi haoeibü ngühkhüm pholabü lele BUNYUBOUei no tat chalou hao shanga mütli phangche yeila takleda.

¹⁹Hobaje haoei kümbü phang pendou thüka nyen shanga, hoba hao nyena hoba nyenhanga thükkabou yeitilabü; hoba haoei laubü tegü BUNYUBOU kaibü Mühghaü shanga no saopobü mütli kilabü.”