Read Chang Naga NGÜHKÜPAIBÜ 27 Bible Online

NGÜHKÜPAIBÜ 27 - Chang Naga bible

NGÜHKÜPAIBÜ 27

¹Kheijinei Mosa hoba Israelbü leiyeibü jaishou shuongei mütshuong la sakkuko laukei, “Tat ngei kan la sakkubü pendou jungeiashi,

²Hobaje BUNYUBOU kaibü Mühghaüei kan la kubü kaodak to kan Jordan danko atbü chaloua tham laang yaangbü at shini naangan kanei kean phojan.

³Hobaje BUNYUBOU kaneibü pisibou Mühghaüei kan la thekubü tegütham BUNYUBOU kaibü Mühghaüei kan la kubü, sendei hoba naodei kouko kibü kaodak to kan atla shanga kanei khübü ngühkhüm ho pendou danga dojan.

⁴Kanei Jordan dansi lengko kanei habü laang, ngei tat kan la sakkubü tegü, Ebal shongha kean phojan, hoba nyi shini naangjan.

⁵Hobaje khünei BUNYUBOU kaibü Mühghaü to lemshang che, laangei kümbü lemshang kümjan, khünei nyi nameibü peisilei aikei ayojan.

⁶BUNYUBOU kaibü Mühghaü lemshang kho athüngbü laangei kümjan, hoba khünei BUNYUBOU kaibü Mühghaü la nyi juokbü lembü kujan.

⁷Hobaje nyi sangmai lembü lemjan, hoba khünei shaulabü, hoba nyi BUNYUBOU kaibü Mühghaü thedanga olinlabü.

⁸Hobaje nyi laang thüka ngühkhüm pendou shangashatko dojan.”

⁹Mosa si ungshedbou shuong Levi shuongei Israelbü pendou to laukei, “Ngüh üangko kishi hoba ditashi, O Israel, tat no BUNYUBOU kaibü Mühghaüeibü mütli yeia.

¹⁰Hibü nyi BUNYUBOU kaibü Mühghaüeibü ngüh ditashi, hoba haoei sakkubü hoba haoeibü ngühkhüm deikhüm laobou tat ngei ka la sakkuda kho kümashi.”

¹¹Khünyet chalouatham Mosaei mütshuong la ngühkhüm kuko laukei,

¹²“Ladang kanei Jordan danjung haulaje, habü hoei mütli haükula shanga Gerizim shongha lojan: Simon, Levi, Jihuda, Issakar, Josef, hoba Benjamin.

¹³Hobaje habü hoei khükla uokla shanga Ebal shongha lojan: Reuben, Gad, Asher, Zebulun, Dan hoba Naftali.

¹⁴Hobaje Levibüei Israelbü pendou to ngühlang yaangbüei laulabü:

¹⁵“ ‘BUNYUBOU thedanga aeibou mangsenlabü maangli maangsang müteibü ikei kümbü huphanga phoan heangsho jakenbü ayingsi nam leman jonbü aoei kümlaje hao shedsikhau yingshi.’ “Hobaje müt pendouei laulabü, ‘Amen!’

¹⁶“‘Aoei bou ayingsi nyu to soumo ühütdaje hao shedsikhau yingshi.’ “Hobaje müt pendouei laulabü, ‘Amen!’

¹⁷“‘Aoei jembü lepboueibü leilang khokan aplaje hao shedsikhau yingshi.’ “Hobaje müt pendouei laulabü, ‘Amen!’

¹⁸“‘Aoei nyekthubü lam ayingbü to leilaje, hao shedsikhau yingshi.’ “Hobaje müt pendouei laulabü, ‘Amen!’

¹⁹“‘Aoei yenbou, bou akibü hoba latnyu matjembü juknyinkulaje, hao shedsikhau yingshi.’ “Hobaje müt pendouei laulabü, ‘Amen!’

²⁰“‘Aoei jembü bou himou bautiko boueibü yak to jamlaje, hao shedsikhau yingshi.’ “Hobaje müt pendouei laulabü, ‘Amen!’

²¹“‘Aoei meisiau at to ongkei jamlaje, hao shedsikhau yingshi.’ “Hobaje müt pendouei laulabü, ‘Amen!’

²²“‘Aoei jaisinaeibü nouyangnyu ayingsi jembü nyueibü nouyangnyu to jamlaje, hao shedsikhau yingshi.’ “Hobaje müt pendouei laulabü, ‘Amen!’

²³“‘Aoei jembü yakeibü nyu to jamlaje hao shedsikhau yingshi.’ “Hobaje müt pendouei laulabü, ‘Amen!’

²⁴“‘Aoei lepbou huphanga haitilaje hao shedsikhau yingshi.’ “Hobaje müt pendouei laulabü, ‘Amen!’

²⁵“‘Aoei shedbü akibü müt haitilaje, hao shedsikhau yingshi.’ “Hobaje müt pendouei laulabü, ‘Amen!’

²⁶“‘Aoei ho ngühkhüm hoba lenbü ühütleplaje hao shedsikhau yingshi.’ “Hobaje müt pendouei laulabü, ‘Amen!’