Read Chang Naga NGÜHKÜPAIBÜ 28 Bible Online

NGÜHKÜPAIBÜ 28 - Chang Naga bible

NGÜHKÜPAIBÜ 28

¹“Ngei tat kan la kubü haoei sakkubü pendou jungeila BUNYUBOU kaibü Mühghaü ngüh kanei noua nepbo ditko laualonga, BUNYUBOUei kaodak phang pendou thüka kan phokulabü.

²Hobaje BUNYUBOU kaibü Mühghaü ngüh kanei ditko laualonga khübü haülabü pendou kan thükto loulabü hoba kan phai semlabü.

³“Sangnyua no haükulabü hoba seka no haükulabü.

⁴“Kaibü mang lilabü, kaibü kaokabü buhek, hoba kaibü samkeisamuk shoushou hoba kaibü masu hoba sanlon shoushou haabüa no haükulabü.

⁵“Kaibü kam hoba shem haükulabü.

⁶“No loujinei haükulabü hoba no haujinei haükulabü.

⁷“Dangbou aoei ka to wa- pyolaje BUNYUBOUei ka thedang ka satyotilabü, kakhu limbo haoen lam che ka loulabü, lausikei haoen lam nyet to linlabü.

⁸“Kaibü bunga hoba kaibü ikei kümbü pendoua BUNYUBOUei ka jungto haülabü kaiya dogo sakkulabü; hoba BUNYUBOU kaibü Mühghaüei sakkubü ka la kubü kaodaka haoei no haükulabü.

⁹“BUNYUBOU kaibü Mühghaüei sakkubü nyi jungeialonga hoba haoeibü lamnyua paialonga BUNYUBOUei ka la thekubü tegü hao shanga haoei no saopobü mütli che yeitkulabü.

¹⁰Hobaje kaodakbü müt pendouei no BUNYUBOU nyena ngaakei dogo haplabü, hoba haoenei ka to hatlabü.

¹¹BUNYUBOUei kaneibü pisibou to ka la kulabü dogo thekubü kaodaka kaibü mang lilabüa, kaibü samkeisamuk lilabüa, kaibü kao buheka BUNYUBOUei no juonga haati juongtilabü.

¹²BUNYUBOUei kaibü ikküm iklei pendou haükula shanga hoba kaneibü kao to jih tükdea lang yantila shanga haoei thanshang maibü müh ipbulabü.

¹³BUNYUBOUei no mei aying khu yeitilabü, hoba no phangaenei aying, thük letilabü, nyi ong BUNYUBOU kaibü Mühghaüei sakkubü laobou tat ngei ka la kuko ki kho maangsangko jungeialonga.

¹⁴Hobaje lubü Mühghaü khangenla haula shanga tat ngei sakkubü ngüh ka nanae ayingsi maeae to tohau.

¹⁵“Lausikei tat ngei ka la sakkubü BUNYUBOUei sakkubü hoba haoeibü theletbü ngühkhüm pendou jungeila shanga BUNYUBOU kaibü Mühghaü ngüh teditkho laualonga haoeibü shedsikhau pendou ka jungto loulabü hoba ka to sühlabü.

¹⁶“Sangnyua no shedla khaulabü, hoba seka no shedla khaulabü.

¹⁷“Kaibü kam hoba shem shedla khaulabü.

¹⁸“Kaibü mang lilabü, hoba kaibü kao kabü buhek, kaibü masu hoba sanlon shoushou shuong shedla khaulabü.

¹⁹“No loujinei hoba haujinei shedla khaulabü.

²⁰“Nyi ngo hangletnyu apan nyi kümbü amaibü shanga no amauti shongko hoba no tongde ashem shongko BUNYUBOUei ka thükto nyi kümbü pendoua shedsikhau khonsak maangto shatlabü hoba hakbü hautilabü.

²¹Nyi laobou kaodak lela atda, khünei kho kaodak ka no amau shongko BUNYUBOUei ka to khonkubü lim khaangtian phokulabü.

²²BUNYUBOUei ka to mangshatbü, mangbokshat, mangbokbü, mang auko shatbü, hoba inei, pangnyintibüei, senmaangbokbüei sühtilabü, hoba khübü khoei no amauti shongko no shieilabü.

²³Hobaje kaibü khu thüka kibü thükaenei kibü müh kho chinam kilabü, hoba kaibü phangaenei kibü kaodak kho namkaang kilabü.

²⁴Kaneibü kaoa lang kho BUNYUBOUei thamngu hoba maksilak yeitikulabü, no amauti shongko müh ka kho ka thükto yantikulabü.

²⁵“Kaibü dangbou thedanga BUNYUBOUei no thüktilabü; no haoen khulimbo lam che ka haulabü, lausikei no lam nyetla yeian haoen thedanga sateilabü, hoba kaodak sangle pendou thed- anga no kongaedanga jimlabü.

²⁶Kaibü haibü mang kho müh kabü au pendou hoba kaodak kabü meisiau shanga shausiyung yinglabü hoba khübü shian sattikula ao akilabü.

²⁷BUNYUBOUei no ladangkei amaibü Ijepbüeibü bokbü mouei, mou puyopuyo longbüei sühtilabü.

²⁸BUNYUBOUei ka to dalabü, nyekthubü, hatbümokbüei sühtilabü;

²⁹hoba nyekthubüei daomaua youei shongan chühko paibü tegü no chaloua shongan chühko pailabü, hoba kaibü langkei müisiman akilabü; ponpen no ong khonkulabü hoba soshau soyunglabü, hoba no püetla ao akilabü.

³⁰“Nyi yaksa che phelabü lausikei lubüei sao to yeplabü; nyi chem che danglabü, lausikei khünei no akilabü; nyi semlüh laak lelabü, hoba hek nyi ashaulabü.

³¹Kaibü masu pongsu ka thedanga haitilabü, lausikei nyi kho ashaulabü. Kaibü gadu to ka thedanga ik shatan solanglabü, lausikei ka la angaitilabü; kaibü sanlon kaibü dangbou la kuan aplabü, lausikei no püetla aokei akilabü.

³²Kaibü jayang nouyang shousi lubü la kulabü, hoba chaseko nyi haoen chühmangsühsikei ühüplabü, hoba kaibü ika aikei hau akilabü.

³³Kaibü kao kabü hek hoba nyi küten ongenbü pendou nyi angebü phang cheei ong shauan apbulabü hoba no ong khonkulabü hoba nitnyinan aplabü.

³⁴Hibü nyi ai haplaje kho hapbü khoei no langet bautilabü.

³⁵Kaibü youjishou ka khunyuyo sühko, BUNYUBOUei ka to youküka hoba youa bokbü mou amaibü kaibü youa longtilabü, laobou ka to maila athüklabü.

³⁶“BUNYUBOUei no hoba ka thüka nyi phobü choba, nyi ayingsi kaibü pisibouei angebü phang che to hautilabü. Khünei nyi lubü Mühghaü, laang hoba bu khangenlabü.

³⁷Hobaje BUNYUBOUei no leian haubü aenei mütli pendou yoa no konga jimbü, tetlatalabü hoba amaaphelabü yeilabü.

³⁸“Nyi sek to youli juong künan koulabü, lausikei shisho ong latlabü, aishanga koksüngei kho shaukhümbulabü.

³⁹Nyi semlühlaak lelabü hoba kümlaleilabü, lausikei nyi semlüh ih ayunglabü ayingsi hek akheilabü; aishanga yangei khübü kho shaulabü.

⁴⁰Kaibü kao pendoua oliv bunyu kilabü, lausikei nyi jembü lolo onang anaanglabü.

⁴¹Ka ka jayang nouyang shousi paklabü, lausikei haoen ka shangabü ayinglabü, aishanga haoen phangkabou to atlabü.

⁴²Hobaje kaibü bunyu pendou hoba kaibü kaoa buhek koksüngei pakleplabü.

⁴³“Ka yoa kibü yenbou ong ka to thükkabou to anglabü hoba no phangkabou, phangkabou to ong yanlabü.

⁴⁴Haoei ka la lotkulabü, lausikei nyi hao la alotkulabü, hao khu, hoba no mei kilabü.

⁴⁵“Hobaje no amauti shongko habü shedsikhau shuong pendou ka thüka kilabü hoba no shieilabü, hoba no laphetlabü; aishanga haoei ka la sakkubü hoba haoei jaletkubü ngühkhüm shuong jungeila shanga BUNYUBOU kaibü Mühghaü ngüh adit.

⁴⁶Habü ho ponpen shanga no hoba kaibü shisi shousi la tetsida hoba maangpanglabü kilabü.

⁴⁷Aieilausi nyi apsileko hapan olin angko hoba maanga olinbüei BUNYUBOU kaibü Mühghaü akhangen.

⁴⁸Khei yingbü khoei mühei haiko, dei lako, mütkong, hoba peisilei pendouei kongsepan, BUNYUBOUei no khulimbo hautibü dangbou shuongei no amauti shongko haoei kaibü ngüma nameibü kaang jinkulabü.

⁴⁹Aulu seengeibü tegü BUNYUBOUei no khulimbo saabü ka kaonyek thonbü ka phang che leibalabü, kho phangeibü ngühyem nyi aditenlabü.

⁵⁰Hatlamoklabü thenyek yembü phang, laobouei jaishou shuong wela alelabü, ayingsi nashou meten to onou alenlabü;

⁵¹hoba no amauti shongko haoei kaibü samkeisamuk shoushou hoba kaibü kaokabü hek shaulabü; tokei haoei kan amauti shongko kaibü youshou ih ayingsi onang, kaibü masu ayingsi kaibü sanlon ühaa ayaangtilabü.

⁵²Hobaje nyi maanglembü kaibü ba suokbü kaonyek pendoua athaplet shongko haoei kaibü bakhün pendou komleplabü hoba BUNYUBOU kaibü Mühghaüei kubü kaibü kaonyek pendoua kaneibü sang badang pendoua haoei no komleplabü.

⁵³“Hibü nyi, BUNYUBOU kaibü Mühghaüei kubü jembü jayang nouyang shousieibü phe, kaibü dangbou shuongei komlepan hoba aüyoko no khonkutibüei, nyi shaulabü.

⁵⁴Kan yoa bousu ao teiteitham hoba aeibou inyaitham ki, haoei jembü jaisina hoba haoei sanoubü yak, hoba jouan kibü haoeibü shousi shuong shaulabü.

⁵⁵Hibü kaibü bakhün pendoua kaibü dangbou shuong komlepan kibü hoba khonkutiko aüyobüei haoei shaula kibü haoeneibü shousieibü phe haoen la akulabü, aieilausi haoei aikei jouan aki.

⁵⁶Kan yoa ao teiteitham hoba inyaitham, khei teiteibü hoba inyaibüei saoeibü youei kaoa nakmang asühko ki, saoei sao sanoubou lao to hoba saoeibü shousi to

⁵⁷hoba saoeibü nasetshang ka lotbü sam, hoba saoei bukbü nashou to amaiko jungeilabü; aishanga kaibü sangnyua kaibü dangbouei khonkutiko hoba aüyotiko komlepbüei ajanjan pendouei mühbüei saoei hu- phanga khübü kho shaulabü.

⁵⁸“Ho soneikangbü hoba hatlamoklabü nyen BUNYUBOU kaibü Mühghaü to hatko ho lea doan kibü ho ngühkhüm pendou nyi kümla tejungeikho laualonga,

⁵⁹kheijinei BUNYUBOUei no shieikoelabü, ka to, ka ka bakbü to shieikoe yaang, lounyu athakko kibü lim yaangbü hoba lounyu athakko kibü maangpanglabü yeitikulabü.

⁶⁰Hobaje Ijepbü kishang laobou nyi hatko kikei, pendou haoei ka jungto nyibou sungbakulabü hoba khübü khoei ka to khapetnyu kilabü.

⁶¹Tokei no amauti shongko, ho ngühkhüm lea doan akibü shatsinyat pendou hoba lim pendou BUNYUBOUei ka thükto sungbakulabü.

⁶²Kan che khanshoulitshou lühbak tegü kiasikei lühbak shisho ong yeilabü, aieilausi nyi BUNYUBOU kaibü Mühghaü ngüha ale.

⁶³BUNYUBOUei jih chenei kan to maitila hoba haatila olinbü tegü, kho tegü BUNYUBOUei kan mautila hoba haitila olinlabü; hoba kan laobou kaodak lela atda, kho kaonyek ka kan pheian aplabü.

⁶⁴“Hobaje kaodak jithon ka jithon sühko phang pendou yoa BUNYUBOUei kan phinnyintilabü hoba kaneibü pisibouei angebü lubü mühghaü, bu si laang khangenlabü.

⁶⁵Khübü phang yoa hopatham akilabü hoba kaibü you hakso akilabü; lausikei BUNYUBOUei ka la maangkhu yuibü, nyeklong athükbü hoba koujung ngaibü soushou kulabü.

⁶⁶Kaibü langkei ka thedanga kuia saüan ong kilabü, hoba no change nangnak hatlenbü phang- a ong kilabü, hoba kaibü langkei shanga aikei tükde akilabü.

⁶⁷Kaibü maangpona hatlabüei moktibü hangshong hoba kaibü nyekei ai hapda, kho hangshong, ngeyang nyi laulabü, ‘Mühghaüei ho chasem la ongkei yeitikua yingma!’ hoba chasem nyi ‘Mühghaüei ho ngeyang la ongkei yeitikua yingma!’ dogo laulabü.

⁶⁸BUNYUBOUei no nyibou Ijep to longchema leian ngaitilabü, laobou lamnyu shanga ngei ka to, ‘Nyi touje kho nyibou ühüplabü,’ dogo laukei, hoba khünei kan lolo aaomüt hoba aaosao la yeian yaaklabü, hoba aoeikei kan ajeklabü.”