Read Chang Naga NGÜHKÜPAIBÜ 29 Bible Online

NGÜHKÜPAIBÜ 29 - Chang Naga bible

NGÜHKÜPAIBÜ 29

¹Israel shousi shuong yoa BUNYUBOUei Horeba theyolanyobü lebü to liman BUNYUBOUei Mosa to Moab kaodaka haoen yoa theyolanyobü lela sakkubü habü ngüh ki.

²Kheijinei Mosaei Israelbü pendou ngakei, hoba haoen to laukei, “Ijep kaodaka BUNYUBOUei Farao to hoba haoeibü khangenbü pendou to hoba haoen kaonyek pendou to kümbü kanei hapa.

³Takteibü yaang, tetsida, hoba seikümseilei shuong kho kanei hapa.

⁴Lausikei tat sühko BUNYUBOUei kan la ngelabü maang- pon, haplabü nyek, ditlabü nou aku.

⁵Po saonyi ngei kan yamlamanga leia; kaneibü neisimei ühang, hoba kaneibü ngokkei aleilu.

⁶Kanei ngo BUNYUBOU kaneibü Mühghaü dogo ngela shanga kanei wentek ashau, hoba ih ayung.

⁷Ladang kan ho kaodak to loukei, Heshbol choba Sihon, hoba Bashanbü choba Og, sen naklepbo lason to longkei, lausikei senei haoen thükkei.

⁸Hobaje haoeneibü kaodak senei lekei, hoba kho Reubenbü la hoba Gadbü hoba Manasse chung jamde la phetphanla shanga kukei.

⁹Hibü kanei kümbü pendoua naangmaila shanga ho theyolanyobü ngüh shuong maangpona phoashi hoba khübü kho kümashi.

¹⁰“Tat kan pendou BUNYUBOU kaneibü Mühghaü thedanga loashi, kaneibü leiyeibü shuong, kaneibü chung shuong, kaneibü jaishou shuong hoba songdakbü shuong, khei Israel mütshuong pendou,

¹¹kaneibü nashou hanbü shuong, kaneibü yaksi shuong hoba kan shaishanga kibü yoa yenbou bu shenbü ka deikhubüa sühko.

¹²Khei BUNYUBOU kaibü Mühghaüei tat ka yoa kümbo kibü BUNYUBOU kaibü Mühghaüeibü thesilan to, hoba haoeibü thekubü to no atenlabü lele,

¹³khei ka to joyobü tegü hoba haoenei kaneibü pisibou to, Abraham to, Isak to hoba Jakob to thekubü tegü, khei tat haoei no jembü mütli yeitilabü hoba hao kaibü Mühghaü yeitila shanga,

¹⁴ho theyolanyobü hoba theletbü ho ngei kan yoa ong kümda aying;

¹⁵lausikei tat sen yoa BUNYUBOU seneibü Mühghaü thedanga loan kibü hoba tokei tat sen yoa ayobü shuong yoa ngei kümda.

¹⁶“Aieilausi sen Ijepa, lai kikei senei ngekei, hoba lai kanei danjung loubü phang yoa senei lai dankei,

¹⁷hoba haoen yoa kibü haoeneibü heangsho hoba laang, chandinam hoba hon, haoen mangsenlabü kanei hapa.

¹⁸Kho khei ayinglonga kan bousu, yaksa, chempen ayingsi chung yoa maangpon sepeian BUNYUBOU seneibü Mühghaü jungka satlabü hoba khübü phangeibü mühghaü khangenlabü hoba kan yoa kom khauekbü longbü li kilabü.

¹⁹Hobaje ladang haoei theletbü ditlaje, jembü lolo yonglambo laulabü, ‘Nembü kho ulangbüei mautila shanga kü maangpon kaangbüei paiasikei, ngo hakso kilabü.’

²⁰BUNYUBOUei hao la amai üpbulabü, lausikei kheijinei BUNYUBOU khauangbü hoba nyekto shatbü kho müt khulimbo longlabü, hoba ho lea doan kibü shedsikhau pendou hao to baulabü, hoba haoeibü nyen mühnyu phang ka haman apbulabü.

²¹Hobaje ho ngühkhüm lea dobü shedsikhau thesilan pendou tegütham Israelbü chung pendou ka hao amaibü la kula shanga BUNYUBOUei hao sungan aplabü.

²²“Kheijinei loulabü metena kan phainei longbü kaneibü shousiei hoba kaodak saabü ka loubü yenbouei ladang haoenei ho kaodak lim hoba shatsinyat laobouei BUNYUBOUei kho shattida,

²³hoba khei kaodak khümbo wansat moli hoba wanui hoba tühnyinbü, khei youli awenshang hoba ai ayemshang, ayingsi khünei sang ayemda, lausikei BUNYUBOUei hao khau lotjinei hoba maangpokjinei khüpan apbubü Sodom hoba Gomora, Adma hoba Zeboiim leilutibü tegü, haoenei hapjinei,

²⁴khei phang pendouei laulabü, ‘Aila BUNYUBOUei ho kaodaka hainyu kümbei? Ho tegü khauang lotbü tetlabü ai?’

²⁵Kheijinei mütshuongei laulabü, ‘Aieilausi BUNYUBOUei Ijep kaodak ka haoen leian longjinei haoei haoen yoa kümbü BUNYUBOU haoeneibü pisibou Mühghaü yoa theyolanyobü haoenei inletnyu apbei.

²⁶Hobaje haoenei angebü hoba laobou haoei haoen la aku, thinei lubü mühghaü shuong khangenkei, hoba haoen to lembei.

²⁷Hibü ho lea dobü shedsikhau pendou ho mütli thükto sungbakukei. Ho kaodak khulimbo BUNYUBOU khauang longkei.

²⁸Hobaje tat sühko kibü tegü, hoba khauang yaang longbüei, BUNYUBOUei haoen kaodak ka haoen pheian apbei.’

²⁹“Huphanga kibü shuong BUNYUBOU seneibü Mühghaü shangabü ki, lausikei senei ho ngühkhüm ngühshuong pendou kümlabü lele tang khitan kibü shuong khoje ponpen shanga sen hoba seneibü shousi shuong shangabü ki.