Read Chang Naga NGÜHKÜPAIBÜ 3 Bible Online

NGÜHKÜPAIBÜ 3 - Chang Naga bible

NGÜHKÜPAIBÜ 3

¹“Kheijinei sen sepeinyu Bashan aeto angkei, hoba Bashanbü choba Og hao hoba haoeibü eikshuong pendou sen khulimbo Edreia lason longkei.

²Hobaje BUNYUBOUei kü to laukei, ‘Hao to tehüt, aishanga hao hoba haoeibü eikshuong pendou hoba haoeibü kaonyek kaibü ikto ngei khümbo kua, hoba Heshbona kibü Amorbü choba Sihon to nyi kümbü tegü nyi hao to kümlabü.’

³“Hibü BUNYUBOU seneibü Mühghaüei Bashanbü choba Og hoba haoeibü eikshuong pendou seneibü ikto khümbo kukei; hoba che ongkei jouan aphoku shongko senei hao thükkei.

⁴Hobaje kho chaloua haoeibü sangnyu ka alebü sangnyu che ongkei akitei; sangnyu saosem, Bashana Og sangle Argob kongshui pendou.

⁵Ataklepbo kibü sangnyu juong to liman khübü pendouei ba suoketnyu bakhün hoba bakouei kaplepan kibü sangnyu kikei.

⁶Hobaje Heshbonbü choba Sihon to senei kümbü tegü müt kibü sangnyu weko bousu, yaksa hoba nashousi yoan senei haoen maisho mautikei.

⁷Lausikei samkeisamuk, meisiau pendou hoba sangnyu ka makshaibü peisilei sen shanga soan phokei.

⁸“Hobaje kho chaloua Jordan danan kibü Amorbü choba müt nyieibü ik ka Arnon pholi ka Hermon shongh sühko, senei kaonyek lekei;

⁹(ho Hermon to Sihonbüei Siron dogo lauda)

¹⁰pholia kibü sangnyu pendou Gilead pendou, hoba Bashan pendou Saleka hoba Edrei sühko, Bashana Og sanglea sangnyu shuong senei lekei.”

¹¹(Aishanga Bashanbü Choba Og ong Refaima joubü ka jouan kikei; chühashi, haoeibü shen kho namkung shen kikei, kho Amonbü Rabbaa akilo? Müteibü iknopei tousüng iknop gü, hoba khaang iknop lei)

¹²“Hibü senei kho jih khünei kho kaodak lekei, Arnon pholi nyangko kibü Aroer ka, hoba Gilead shongh kaodak jamde hoba kho sangnyu shuong ngei Reubenbü hoba Gadbü la kukei.

¹³Hobaje Gilead joubü hoba Og sangle, Bashan pendou ngei Manasse chung jamde la kukei; kho Argob kongshui pendou, khei Bashan pendou. (Ho to ong Refaim kaonyek dogokei lauda.

¹⁴Manasseeibü shou Jairei Argob kongshui pendou Geshur hoba Makat leilang sühko lekei, hoba Bashan ong hao jembü nyen phaito nyenkei, tat sühko Havoth Jair dogo lauda.)

¹⁵“Hobaje Makir la ngei Gilead kukei.

¹⁶Hobaje Reubenbü si Gadbüla Gilead ka Arnon shumang sühko yomang jenyu hoba khoeibü leilang, Ammonbü leilang Jabbok shumang sühko ngei kukei;

¹⁷tokei Arba hoba Jordan hoba khoeibü leilang hoba Kineret ka chaangbou ae Pisga shongh youa Araba yungnyu kho Jemdei Yungnyu sühko.

¹⁸“Hobaje kheijinei ngei kan la sakkuko laukei, ‘BUNYUBOU kaneibü Mühghaüei kho kaodak kanei phetphanla kukei; kan maangkaangbü pendou, Israel shousi kaneibü jaisinasi shuong thedangto insiaubu jungan danjung haulabü.

¹⁹Lausikei ngei kan la kubü sangnyua kaneibü shousi yaksi nashou hanbü shuong hoba kaneibü samkeisamuk kilabü (aieilausi kaneibü samkeisamuk juong kia dogo ngei ngekei),

²⁰khei BUNYUBOUei kaneibü jaisina la hakso akushongko, hoba tokei BUNYUBOU kaneibü Mühghaüei Jordan danjung hauan thi aedanga, kan la tegü haoen la kubü kaodaka haoen akishongko, kheijinei ngei kan la kubü, kan luluei kibü jungto kan mütpem weko sepeinyu loulabü.’

²¹“Hobaje kho jihsiphaia ngei Jihuda la sakkuko laukei, ‘Habü choba müt nyi to BUNYUBOU kaneibü Mühghaüei kümbü pendou kaibü nyekei hapda; kho tegü nyi danjung haulabü sangle pendou to BUNYUBOUei kümlabü.

²²Haoen to hatko teki, aishanga kan shanga wapyolabü kho BUNYUBOU kaneibü Mühghaü ki.’

²³“Hobaje kho jihsiphaia ngei BUNYUBOU to kaangkosekko sukeijakei.

²⁴‘O BUNYUBOU Mühghaü, nyi no khangenbou la no yaangbü lenla khanga, aishanga müha hoba kaodaka mühghaü aoei nyi tegü ho hai kümsilei yaangbü kümenla!

²⁵Ngei ka to sudajada, Jordan danan thi aedang kaodak maibü kho shongh maibü hoba Lebanon, chühla ngo hautikai.’

²⁶“Lausikei kan hangshong BUNYUBOUei kü to maangpokkei, hoba kü to ngüha ale; hoba BUNYUBOUei kü to laukei, ‘Khüaeleshi! ho shanga touje kü la telen!

²⁷Pisga shongh to angashi, hoba chaang, chanep, yungkük hoba yungthang to kaibü nyekei tangko chühko limchühashi, aishanga nyi Jordan ho danjung ohaulabü.

²⁸Lausikei Joshua la kümsilei khümbo kuashi, hao thungeijangeiashi, hoba hao hau kitiashi, aishanga haoei habü mütshuong Jordan danko leian haulabü, hoba nyi hapbü kaonyek kho haoei haoen la letilabü.’

²⁹“Hibü sen Beth Peor thedanga thüngkei.”