Read Chang Naga NGÜHKÜPAIBÜ 30 Bible Online

NGÜHKÜPAIBÜ 30 - Chang Naga bible

NGÜHKÜPAIBÜ 30

¹“Hibü ladang habü pendou kan to haüthüklaje, haülabü yingsikei shedsikhau yingsikei ngei kan thedanga ai phokua, hoba lae aeto BUNYUBOU kaneibü Mühghaüei kan shian sattikei, khübü phang pendou yoa kaneibü maanga khübü kho shuokenashi.

²Hobaje kan hoba kaneibü shousi shuong BUNYUBOU kaneibü Mühghaü jungto sepeinyu longeia longa hoba kaneibü maangpon pendouei, tat ngei kan la sakkubü haoeibü ngüh ditkho lausi;

³kheijinei BUNYUBOU kaneibü Mühghaüei kan lae laeto ong phinnyintian ki, phang pendou ka nyibou kan leishaian kan to sanouko dambo BUNYUBOU kaneibü Mühghaüei kaneibü thu kümetkulabü.

⁴Kan tekan apan kiasikei, khüka BUNYUBOU kaneibü Mühghaüei kan leishailabü, hoba kho ka haoei kan leian loulabü.

⁵Hobaje BUNYUBOU kaibü Mühghaüei kaneibü pisibouei lebü kaodak to kan leian loulabü hoba kho kanei lelabü; hoba haoei kan naang maitilabü hoba kaneibü pisibou toje aei bukyo haayotilabü.

⁶Hobaje kan lang kila shanga BUNYUBOU kaneibü Mühghaü kaibü maangpon pendouei hoba kaibü soushou pendouei sanoutila shanga BUNYUBOU kaibü Mühghaüei no hoba kaibü shisishousi shuongeibü maangpon kipan apbulabü.

⁷Hobaje BUNYUBOU kaibü Mühghaüei ho shedsikhau pendou kaibü dangbou shuong aoyouei ka to mangsenda hoba shieikoeda haoen la jinkulabü.

⁸Hobaje kan sepeinyu longailabü hoba BUNYUBOU ngüh ditlabü hoba ngei tat kan la kubü haoei sakkubü pendou jungeijan.

⁹Hobaje BUNYUBOU kaibü Mühghaüei kanei kümbü pendoua püngti juongtilabü; kaneibü shousimia, kaneibü samkeisamuk haabüyaangbüa hoba kaneibü kao ka longbüa; aishanga kaneibü pisibou to tegü nyibou BUNYUBOU kan püngti juongtibüa olinlabü,

¹⁰kanei ong ngühkhüm lea doan kibü tegü, haoeibü ngühkhüm hoba sakkubü shuong jungeiko kanei BUNYUBOU kaneibü Mühghaü ngüh ditko laualonga; hoba BUNYUBOU kaibü Mühghaü jungto kaibü maangpon pendouei hoba soushou pendouei sepeijung longeia longa.

¹¹“Aishanga ho sakkubü ngei tat kan la sakkuda, ho kan shanga yongko sekbü aying, ayingsi kanei asühlabü lele aying.

¹²‘Kho künei kümla shanga hoba kho kün jungto sungbaan künla kho dittila shanga ao kün shanga müh to angla?’ dogo kanei laulabü lele kho müha aki.

¹³Ayingsi, ‘Künei kho kümlabü lele kün shanga aoei yungnyu to kün shanga hauan kho kün jungto sungbaan kün la dittila?’ dogo nyi laulabü lele kho yungnyu danjung hauan aki.

¹⁴Lausikei nyi kümla shanga kho ka junga aeibou nyangko kaibü sembunga hoba kaibü maangpona kia.

¹⁵“Chühashi, tat ngei kan thedanga langkei hoba püngbü juongbü, haibü hoba amaibü phokuda.

¹⁶Tat ngei kan la BUNYUBOU kaibü Mühghaü sanoubüei haoeibü lamnyua paibüei haoei sakkubü hoba jaletkubü ngühkhüm deikhüm ditko jungeikho laualonga, kheijinei kaibü langkei kilabü hoba bukyohaayolabü hoba kanei lela atan kibü kaodaka BUNYUBOU kaibü Mühghaüei kan la haükulabü.

¹⁷Khei yingsi dogokei, kan maangpon sepeinyu satan hoba maang akuko küksithang mühghaü to lemla hoba haoen khangenla ditletan satalonga,

¹⁸ngei kan to lenda, kanei lela shanga Jordan danjung atbü kaodaka lounyu akiko maimaitham kan maulabü.

¹⁹Kan thed- anga langkeibü hoba haibü, haülabü hoba shedsikhau phokua dogo kan khulimbo tat aukabü lela ngei müh si kao phongko lauda; hibü langkei pienashi, khei no hoba kaibü shousi langkei kienla shanga;

²⁰BUNYUBOU kaibü Mühghaü sanoula, haoeibü ngüh ditla, hoba hao to khapetan kila shanga, aishanga hao kho kaibü langkei hoba kaibü salang ki, khei BUNYUBOU kaibü pisibousi to, Abraham to, Isak to, hoba Jakob to, haoen la kula thekubü kaodaka no kienlabü.”