Read Chang Naga NGÜHKÜPAIBÜ 32 Bible Online

NGÜHKÜPAIBÜ 32 - Chang Naga bible

NGÜHKÜPAIBÜ 32

¹“Nou haangashi, kan Mütshuong hoba ngei laukho; hoba kaodakei kü sembung kabü ngüh ditashi.

²Ngeibü lenbü lang tegü yantiashi; ngeibü ngüh nindei tegü sinlettiashi. Sang inyaibü thüka lang tapnin tegü; hoba kesiong thüka nindei lakbü tegü.

³Aishanga ngei BUNYUBOUeibü nyen ngekan jinkukho; küneibü Mühghaü la kanei nyensang kuashi.

⁴“Hao Laangnyudak kia, haoeibü kümsilei penbüsoubü, aishanga haoeibü lamnyu pendou tükde; maanglemlabü hoba shedbü akibü Mühghaü, hao Ngühmai hoba lanbü ki.

⁵Hao to haoenei amaiko jungeikei, haoen haoeibü shousi shuong aying, kho haoen shedbü. Haoen ayingbü to haubü, hoba khüpbülangbü meten kia.

⁶O ngoubü hoba songsido akibü mütli, kanei BUNYUBOU to hai jungeida lo? Hao kan kümbou kaneibü bou aying lo? Haoei kan kümbei hoba yaüenkei.

⁷“Shangiedbü chalou shuong damenashi, po meten juong shanga damenashi; kabou to pheashi, haoei ka to lenlabü. Kaneibü jaishou shuong to pheashi hoba haoei kan to lenlabü.

⁸Ladang Thükkabouei phangshuong la haoeneibü phetphan kukei, ladang khunakshousi yoa haoei janyinbü kümbei, haoei Israel shousi shuong lühbak thüng mütli shuong la leilang jakukei.

⁹Aieilausi BUNYUBOUeibü phejan kho jembü mütli shuong ki; haoeibü phetphan jaletbü kho Jakob ki.

¹⁰“Haoei hao phetsen kaodaka, hoba apshang dangbü ngühko kibü yamlema hapbei; haoei hao aüetkei, haoei hao shanga nongnaekei; haoeibü nyekei dühko chühbü shongbe tegü haoei hao lombei.

¹¹Auluei jembüeibü hap saklettian jembü shoushou thüka seengeibü tegü, haoei haoeibü kaak seengan haoen sungletkei, hoba haoei jembü kaak thüka haoen tonkei.

¹²BUNYUBOUei ong hao leian haukei, hoba hao yoa küksithang mühghaü akitei.

¹³“Haoei hao kaodak thükkaboua settikei, hoba haoei hao ka longbü shautikei; hoba haoei hao la laang ka naodei, hoba laangkoklok ka onang sheptikei.

¹⁴“Masu ka haabü onbü, sanlon ka sendei, san shoushou ka hoba nyunyu ka haabü Bashan masu pongsu hoba lon ka, kelang haabü hoba whet wen. Hobaje semlühdei ka nyi ih yungkei.

¹⁵“Lausikei Jeshurun netkei hoba laukei; ‘No neta no shangtüngtham chinga; no lenglengtham apa.’ Kheijinei hao Kümbou Mühghaü nangletkei, hoba hao khümenbou Laang inletkei.

¹⁶Küksithang mühghaü shuongei hao to nyekto shatko yeitikei, mangsenlabüei haoenei hao maangto shattikei.

¹⁷Haoenei angebü mühghaü shuong, tou nyangko loubü haanbü mühghaü shuong, aoyou to kaneibü pisibousi shuongei ühüt; laobou tükdebü Mühghaü aying, lausikei kaonyu kabü mühghaü ong. Haoenei haitibü lembü kukei.

¹⁸No bukbü Laang nyi nangletkei, hoba no paktibü Mühghaü nyi maan apbei.

¹⁹“Hobaje BUNYUBOUei hao hapbei hoba haoen mangsenkei; aieilausi haoeibü jayang nouyang shousiei khau angtikei.

²⁰Hobaje haoei laukei, ‘Ngei haoen ka ngeibü the hulabü, Haoen thonbü ai yeilaje ngei chühkho.’ Aishanga haoen aeibou ngüha alebü meten, maangalemlabü shousi shuong ki.

²¹Laobou Mühghaü aying, khoei kü to nyekto shattila yeikei. Haoeneibü amlangbü kümsileiei ngo khau angtikei; hibü ao phang che aying haoen yoa ngei theshat maangshat yeitikulabü. Ngei haang alongbü phang che to haoen khauang longtikulabü.

²²Aishanga püngkhün haüboutham sühko juokko, hoba kaodak hoba khünei longbü suiko, hoba shongh chemshanga wan longko, ngo khauang longbüa wan longan kia.

²³“Ngei haoen thüka khonsaklabü ongshaikulabü. Ngei haoen to ngeibü laujin lekhümlabü.

²⁴Mühei haibüei haoen maulabü, hoba wankak yasebüei suilabü. Hobaje aeibou amaibü maula longlabü. Haoen jitnyinla meisiau shuong; hoba haoen komattila pinyu shuong ngei haoen thükto hautikulabü.

²⁵Khongaenei inei hailabü, hoba chemmanga moklabü kilabü; khoei heshou hoba saosüngbü medei ham, senyopbü nasak yoa khuthubü mautilabü.

²⁶Ngei haoen saabüa phinnyintilabü, müt yoa ngei haoen adamentilabü, dogo ngei laukhoulabü;

²⁷Lausikei haoeneibü dangbou shuongei yonglamlabü, haoeneibü dangbou shuongei mashikan ngeklabü, seneibü ikei thük yaang hapa. Ho kümsilei BUNYUBOUei kümbü aying, dogo laubü la ngo hatda.

²⁸“Aishanga haoen songsido akibü phang shuong ki. Hobaje haoen to ditenbü aki.

²⁹O, haoen songsido kiko haoenei ho ditenan, khei haoen phaikabü thu shanga daman chüha tegüje!

³⁰Haoeneibü Laangei haoen ayaak tegüje, BUNYUBOUei haoen khümbo aku tegüje, Lai küman cheei hajar che shieila? Hobaje müt nyiei hajar an lintila?

³¹Aishanga haoeneibü laang seneibü Laang tegü aying, khei seneibü laboueikei haoen lolo ngeakei.

³²Aishanga haoeneibü semlühdei Sodom ka, hoba Gomora bamang ka louda; haoeneibü semlüh khauekbü semlüh ki, haoeneibü shen khauekbü ki.

³³Haoeneibü ih kho pinyueibükom hoba piyangeibü kom kaangbü ki.

³⁴“Ngeibü thanshanga shaangda ho kü yoa thanan phoakei aying lo?

³⁵Haoeneibü you ladang sheketlaje phoklambü hoba sepeian kungaibü kü shangabü ki; aishanga haoen khonsaklabü nyangko kia, hoba hao thükto haüthüklabü shuong panteiko loulabü.

³⁶Aishanga ladang haoeneibü hau satda dogo haplaje, hoba haoen che ongkei aaola leko hoba dongebü thua akilaje, BUNYUBOUei jembü khangenbü shuong shanga sanou dambuko haoei haoeneibü mat jemlabü.

³⁷Hobaje haoei laulabü, ‘Haoen satenshang laang haoeneibü mühghaü shuong. Aoyouei haoeneibü haitibü lembü shaukei, hoba haoeneibü yunglabü lembü ih yungkei haoen lanei ki?

³⁸Haoen louan kan to thuitiashi; kan khümenla haoen yeitiashi.’

³⁹“Kü to liman lubü mühghaüshuong ao aki, ‘Ngo hao ki,’ dogo tou ngeashi. Ngei haitida hoba ngei langngaitida. Hobaje ngeibü ik ka solangla ao aki.

⁴⁰Aishanga ngei müh ae ngeibü ik shingda hoba thekolanko lauda.

⁴¹Ngeibü soneikangbü in ngei ulabü, hoba ngeibü ikei ngühmaia hatleplabü; ngeibü dangbou la ngei phoklambü kulabü; hoba kü to mangsenbü shieikoelabü.

⁴²Haitibü hoba thüngbü siiei, ngeibü laujin siiei jaaktilabü, laobou leiyeibü shuong khulou loubang kibü khu ka, ngeibü inei phe suilabü.

⁴³“Phangshuong yoa olinyoko ngekashi, O kan haoeneibü mütli shuong. Aishanga hao khangenbü shuongeibü sii shanga haoei phoklamlabü. Hobaje haoeibü dangbülebü la phoklambü kulabü. Hobaje haoeibü kaodak haoeibü mütli shanga haoei shabü hangan apbulabü.”

⁴⁴Hobaje Mosa louan kho chisichia ngüh pendou mütli pendouei ditko, hao yoa Naneibü shou Joshua yoan joyokei.

⁴⁵Ladang Mosaei habü ngüh pendou Israelbü pendou to lenkhümbei, haoei haoen to laukei,

⁴⁶“Tat kan to sanglabü ngüh lenbü kho ngühkhüm ngüh pendou khümbo jungeila kaneibü shilashoula ngühkhüm kula shanga ho pendou kaneibü maanga phoashi.

⁴⁷Aieilausi ho kan shanga amlangbü kümsilei aying; aishanga ho kaneibü langkei ki, hoba ho danko kanei Jordan danko hauan lela kibü kaodaka kaneibü salang lounyu kilabü.”

⁴⁸Hobaje BUNYUBOUei khünyettham Mosa to laukei,

⁴⁹“Moab kaodaka Jerikho ae yeian kibü, kho Abarim shongh, hoba Kanan laobou ngei Israel shousi shuong la lela kukei, kho chühashi.

⁵⁰Hobaje kaibü jai Aron ailai Hor shongha haikei, hoba hao himshuong yoa yokei, kho tegü no angshang shongha haishi hoba kaibü himshuong yoa yoshi.

⁵¹Aieilausi Zin yamlamanga, Kadesh sangnyu nyangko Meriba deia, Israel shousi shuong yoa kanei kükhu limbo shed shonkei; aieilausi Israel shousi yoa kanei ngo saüenan apho.

⁵²Nyi saabü ka kaonyu to chühlabü, lausikei ngei Israel shousi shuong la kuko kibü kaonyu to no üetlabü.”