Read Chang Naga NGÜHKÜPAIBÜ 33 Bible Online

NGÜHKÜPAIBÜ 33 - Chang Naga bible

NGÜHKÜPAIBÜ 33

¹Tou Mühghaü müt Mosaei hao ühaijinei Israel shousi shuong haükubü haülabü kho ho ki.

²Haoei laukei, BUNYUBOU Sinai shongh ka loukei, hoba haoen jungto Seir ka longkei. Haoei haoeibü mütshuong la Paran shongh ka hauan yantikukei. Hobaje saopobü hajar an yo ka hao loukei; haoeibü mae aenei haoeibü ngühkhüm kaangbü kikei.

³Haü, haoei jembü mütli sanouda, haoeibü saopobü shuong pendou kaibü ika kia; Hobaje ka thedanga haoen setda Mütpem wekoei kaibü ngüh sungletlabü.

⁴Mosaei kün la ngühkhüm che sakkukei; Jakobeibü tan shanga phetphanlabü kia.

⁵Mütshuong leiyeibü shuong kaman Israel phang pendou kijinei hao Jeshuruna choba yeikei.

⁶Mosaei Reuben phang shangabü laukei, “Reuben hao junga shisho ong yingasikei ühaiko lang kitishi.”

⁷Hobaje Jihuda haülabü ho ki; hoba haoei laukei: “Jihudaeibü ngüh ditashi, O BUNYUBOU, Hao jembü mütli jungto leian loutiashi; Hao lolo haoeibü ikei wapyoa; Hobaje hao khulimbü shuong khulimbo kaibü thuibü che kilabü.”

⁸Hobaje Levi shangabü haoei laukei, “Kaibü Thummim hoba kaibü Urim nyi aoyou sanouda haoen yoa kia. Nyi haoen Massaa takteikei, No haoen to Meriba deia wapyokei.

⁹Aoei haoeibü nyu si bou shangabü, ‘Ngei haoen ühüp’ dogo laukei. Hobaje haoei jaisinakei asunglet hoba jembü shoukei angeko apbei. Aishanga haoenei kaibü ngüh jungeikei hoba kaibü thebülanbü phoda.

¹⁰Haoenei Jakob to haoeneibümatjembü Hobaje Israel to kaibü ngühkhüm lenlabü; Haoei kaibü kunga ponlem jinkulabü. Hobaje kaibü lemshanga juokbü lembü khümbo lemlabü.

¹¹Haükuashi, BUNYUBOU, haoeikibü, Hobaje haoeibü ikkümiklei sungletashi; Hao khulimbo longbü hoba hao mangsenbü shuong khei hao khulimbo nyibou alolabü lele haoeneibü ngeilo ngoktikuashi.”

¹²Benjamin shangabü haoei laukei, “BUNYUBOUei sanoubü hao ki Hao yoa haoei khümenan kilabü; Chalou sünga haoei hao kaplepan kida.”

¹³Josef shangabü haoei laukei, “Haoeneibü kaodak BUNYUBOUei haükushi; Müh thükaenei nyakeinamei nindei yoa, Hobaje thungshing akibü haübü deiei.

¹⁴Chanyu ngesakbü ka namsek buhek langei, Hobaje lit weko apsileko longtibüei;

¹⁵Shangieda kibü shongha longbü maibouthamei, Hobaje ponpen kibü shongh nyaksinamei;

¹⁶Kaodak nyaksinam hoba khünei shenko kibüei, Hobaje buhama kibü haoeibü maangshikbüei, Josef haoeibü jaisina yoa yaangenbou, Haoeibü khu thükto haülabü louyantiashi.

¹⁷Hao kho soumo kibüa, shaang shatbü masu pongsu phatkei; Haoeibü laang kho Mühghaü ngou tegü; Khünyi khoei phang pendou to thenlabü, Khei kaodak thonbü sühko shian aplabü; Hibü Efraim shanga kho tegü hajar an kilabü. Hobaje Manasse shanga kho tegü hajar juong kilabü.”

¹⁸Hobaje Zebulun shangabü haoei laukei, “Zebulun no haushanga olinangko kishi. Hobaje Issakar, kaibü neichema no olinangko kishi.

¹⁹Haoenei mütshuong shongh to ngalabü; Khünei haoenei saopobü lembü kulabü. Aishanga haoenei yungnyu nyaksinam Hobaje phetsena huan kibü nyaksinam sheplabü.”

²⁰Hobaje Gad shangabü haoeihai laukei, “Gad yaangentibou haobou yingshi. Hao molosaonyu tegü thoan kida, hoba phem si ngümjong phenthetkuda.

²¹Haoei jembü shanga büngbükhangbü phejan pienkei Aishanga songdakbou phejanje lipletan sungletan kiteikei; Hobaje hao mütli leiyeibü shuong jungto loukei, Hobaje haoei BUNYUBOUei maangangbü ngühmai, Hobaje Israel shanga matjembü kümbei.”

²²Hobaje Dan shangabü haoeilaukei, “Dan Bashan ka tomjung longbü molosaonyu shoushou ki.”

²³Naftali shangabü haoei laukei: “O Naftali, BUNYUBOU senyühshembü maangshik hoba haülabü shenko Yungnyu hoba yungkük kho leashi.”

²⁴Hobaje Asher shangabü haoei laukei, “Shousiei haükubou, Ashereibü shousi to aei haübou yingshi. Hobaje haoeibü you onanga naketlangtishi.

²⁵Kaibü ngok nam hoba chinam kilabü; Hobaje kaibü chalou shuong tegü kaibü hau kilabü.”

²⁶O Jeshurun, kaibü Mühghaü tegü lubü ao aki. Aoei kaibü thuibü shanga khuthüka hoba hao yaangenbüa müh danko sangda.

²⁷Thon akibü Mühghaü kho no kishang, hoba phangaenei ponpen thon akibü ik ki. Hobaje kaibü thedang ka dangbou shian apbei, hoba laukei, ‘Mauashi.’

²⁸Hobaje youshou si ih kibü kaodak Jakob deikük hao ong Israel khümenbüa kikei. Haü, haoeibü mühei nindei yantikuda.

²⁹O Israel, no olinlabü, no tegü BUNYUBOUei püetbü mütli ao ki? Kaneibü thuibü shanga aih, hoba kaneibü hangenbü ik kho hao ki! Kaneibü dangbou shuong kan phangto loulabü. Hobaje nyi haoeneibü angudonga saiyeilabü.