Read Chang Naga NGÜHKÜPAIBÜ 4 Bible Online

NGÜHKÜPAIBÜ 4 - Chang Naga bible

NGÜHKÜPAIBÜ 4

¹Hobaje tou, O Israel, ngei kan la lenbü ngühkhüm hoba matjembü jungeila shanga ditashi, “Khei BUNYUBOU kaneibü nyusibou Mühghaüei kan la kubü kaodak to atla hoba lela, hoba kan lang kilabü lele,

²BUNYUBOU kaneibü Mühghaüei laobou kan la kuda kho kanei jungeila shanga ngei kan la sakkubü ngüha aei ajinyolabü ayingsi kanei kho ashitilabü.

³Kanei jembü nyekei BUNYUBOUei Baal to Peora ai kümbei kho hapa; aishanga Peorbü Baal phai sembü mütpem weko BUNYUBOU kaneibü Mühghaüei kan yo ka mautia.

⁴Lausikei kan aoyouei BUNYUBOU kaneibü Mühghaü to hatlepnyu khüpbei tat sühko kan mütpem weko langkei kia.

⁵“Chühashi, BUNYUBOU ngeibü Mühghaüei kula sakkubü tegü kanei lelabü, hauko kibü kaonyeka jungeila shanga ngei ngühkhüm hoba matjembü kan la lena.

⁶Hibü khübü kho jungeiashi hoba kümashi, aishanga phang shuong thedanga ho kaneibü songsido hoba ditenbü ki; haoenei khübü pendou dittijinei laulabü, ‘Maimaitham habü phang yaangbü ho songei keibü hoba ditenbü mütshuong ki!’

⁷“Aishanga BUNYUBOU seneibü Mühghaü to ladang ong senei ngalaje hao aeibou nyangko kibü tegü ai phangyaangeibü mühghaü kho tegü ki?

⁸Hobaje tat ngei kan la phokuko kibü ai phang yaangbüa habü ngühkhüm pendou saopobü tegü sakkubü ngühkhüm hoba matjembü ki?

⁹Kan jembü nyekei habü kümsilei shuong kho amaalabü, hoba khübü kho kaneibü maanga kan lang kishongko amaala shanga ong maangsangashi; hoba kan lolo pialeman kishi, lausikei khübü kho kaneibü shousi hoba kaneibü shila shoula ngetiashi;

¹⁰laobou Horeba BUNYUBOU kaibü Mühghaü thedanga kan lobü chaloua BUNYUBOUei kü to laukei: ‘Ngeibü ngüh haoen la dittilabü lele hoba khoei haoen salang sünga kü to hatko kila ditletlabü lele hoba kho tegü haoeneibü shousi shuong la lenla shanga mütshuong kü junga kamtiashi.’

¹¹“Hobaje kan nyangko loukei hoba shongh phanga lokei, hoba sangmei nakthühbü, hoba daomauei küplepan mühyaak sühko shongha wan longkei.

¹²Hobaje BUNYUBOUei kan to wan ka joyokei, kanei ngühlang ditkei, lausikei mang ühüp, ngühlang ong kikei.

¹³Hobaje haoei haoeibü theyolanyobü kan la ngetikei, laobou haoei kan la jungeila sakkukei, kho ngühkhüm an hoba haoei kho laangdak nyia dokei.

¹⁴Hobaje kanei tou phet phanla hauko kibü kaonyeka jungeilabü lele kan la thebülanbü hoba ngühkhüm lenla shanga BUNYUBOUei kü la sakkukei.

¹⁵“Hibü kan lolo maangsang- ashi, aishanga wan ka BUNYUBOUei Horeba kan to joyobü chaloua kanei mang ühüp.

¹⁶Kho khei ayinglonga kanei heangsho kümbo pi si paang phatko noksa mangthem küman aplabü.

¹⁷Khei kaoa kibü meisiau phatbü at ayingsi müha sengeibü au phatbü at,

¹⁸ayingsi kaoa shanbü phatbü at, ayingsi kaonyu maanga deia kibü ngao phatbü at küman kanei shatilabü;

¹⁹ladang kanei müh to chühlaje, hoba müha kibü chanyu, litnyu, hoba khanshoulitshou haplaje khei müh kabü tan pendou kaneibü maangpon to senjung louan khübü kho alemla hoba akhangenla shanga maangsangashi; khübü kho müh phanga müt pendou la BUNYUBOU kaneibü Mühghaüei janletkuakei;

²⁰lausikei kanje BUNYUBOUei tat tegü jembü mütshuong yeila shanga, Ijep ka namyaüshang wan ka kan leian loukei.

²¹Kho ong aying, kan hangshong BUNYUBOUei kü to maangpokkei, hoba Jordan danko ngoje ohaulabü, ayingsi kaodak maibü laobou BUNYUBOU kaneibü Mühghaüei kan la phetphanla shanga kukei khüto ngoje ütla theyolanyoa.

²²Lausikei ngoje ho kaodaka hailabü, ngo Jordan danjung ohaulabü, khei yingsikei kanje haulabü, hoba kho kaodak maibü kho lelabü.

²³BUNYUBOU kaneibü Mühghaü to theyolanyobü laobou haoei kan yoa kümbei hoba kan jembü shanga heangsho noksa akümla shanga BUNYUBOU kaibü Mühghaüei thangetbü shanga kanei amaala maangsangashi;

²⁴aishanga BUNYUBOU kaneibü Mühghaüeibü mautibü wan, nyekto shatbü Mühghaü ki.

²⁵“Kanei ladang shousimi hoba shisi shousi shuong haplaje hoba kaonyeka lounyu kilaje, hoba heangsho noksa at küman kan lolo shalaje hoba BUNYUBOU kaibü Mühghaü thedanga ai amaibü ki kho kümbo hao khauang longtilaje,

²⁶tou kanei Jordan danjung atan lela kibü kaodak ka kan tongde lepde shanga mautilabü, tat ngei kan khulimbo müh si kao aukabü lela ngaan sungda, kan kho thüka saalanglabü, lausikei lemailela maulabü.

²⁷Hobaje BUNYUBOUei mütshuong yoto kan lintilabü, hoba BUNYUBOUei kan lae aeto leilaje kan phangshuong yoa kan mütshang shisho ong kilabü.

²⁸Khünei kanei mühghaü shuong khangenlabü, mütei kümbü bu si laang, laobouei hapbei ühüpda, ayingsi aditda, ayingsi ashauda ayingsi lümbei ajemda.

²⁹Khei yingsikei khünei kanei BUNYUBOU kaibü Mühghaü lamalonga, hoba kaibü maangpon khümboei, kaibü soushou pendouei hao lamalonga, kanei hao haplabü.

³⁰Ladang kan khonku khonsak kilaje hoba ho pendou thonbü chaloua ka to haüthükla BUNYUBOU kaibü Mühghaü jungto sepeinyu longeilabü hoba haoeibü ngüh dittilabü.

³¹Aishanga BUNYUBOU kaibü Mühghaü onoubü Mühghaü ki; haoei kan üpyolabü, ayingsi amautilabü, ayingsi kaneibü nyusibousi to theyolanyobü amaalabü.

³²“Aieilausi tou khei Mühghaüei kaodaka müt pakentida, kan to shaang kibü, danbü chalou shanga pheyoleyoashi, hoba müh jithon ka jithon sühko phanashi, ho tegü kümsilei yaangbü haüthükan chühlao ayingsi ditkei ditoulao?

³³Mühghaüei wan ka joyobü kanei ditbü tegü müt atei ditan lang kia sai?

³⁴Ayingsi mühghaü atei BUNYUBOU kaneibü Mühghaüei kan shanga Ijepa kümbü kanei hapbü tegü, takteibüei, tetsidaei, seikümseilei, wa- pyobüei, hau kibü ikei hoba phemshingbüei hoba hatlabü yaangbüei lubü phang yo ka jembü shanga lela maangkangko küman chühasai?

³⁵Kanei BUNYUBOU kho Mühghaü dogo ngela shanga kho kan la lenkei; hao to limbo ao aki.

³⁶Kan thepetla haoei müh ka kan la haoeibü ngüh dittikei; hoba kaodaka haoei haoeibü wan yaangbü kan la haptikei, hoba wanlong jenyu ka kanei haoeibü ngüh ditkei.

³⁷Hobaje haoei kaneibü nyusibou sanousije haoen phainei haoeneibü lilabü pienkei, hoba Ijep ka hau yaangbüei hao yoan kan leiyenkei,

³⁸hoba kan to yaangbou hoba hau kibü phangshuong shian apbo, khei tat sühko kibü tegü haoei kan la haoeneibü kao phetphanla kula shanga.

³⁹Hibü tat ngeashi, thükaenei khuthüka, hoba phangaenei kaodaka BUNYUBOU hao Mühghaü dogo maanga phoashi, lubü ao aki.

⁴⁰BUNYUBOU kaibü Mühghaüei ponpen shanga kan la kubü kaodak kan phainei kaneibü shousi shuong kikokeiko kilabü hoba kaonyeka kan lounyu salangko haangko kila shanga tat ngei kan la kubü haoeibü ngühkhüm hoba sakkubü shuong kanei jungeijan.”

⁴¹Kheijinei müt haitibou aoei angeko shaangla mangsenyoko akibü shanshedte jembü lepbou haitilaje khübü sangnyu chenei satenan hao langkei kila shanga,

⁴²Mosaei Jordan chaangboua sangnyu sem bangan phokukei;

⁴³khei Reubenbü shanga yomanga yamlamanga Bezer; Gadbü shanga Gileada Ramoth, hoba Manassebü shanga Bashana Golan.

⁴⁴Hobaje Israel shousi thedanga Mosaei phokubü ngühkhüm habü ho;

⁴⁵Ijep ka haoen longjinei Mosaei Israel shousi to joyobü aukabü, yeikubü ngühkhüm, janthetkubü habü ki;

⁴⁶Jordan danjung hauan, Beth Peor thedanga pholia Heshbona kibü Amorbü choba Sihon kaodaka aoyou Mosa si Israelbüei haoen Ijep ka longjinei thükkei,

⁴⁷hoba haoenei haoeneibü kaodak hoba Bashanbü choba Og kaodak Jordan danjung hauan Chaangbou Amorbü choba müt nyi haoenei lekei.

⁴⁸Arnon pholi thonbüa kibü Aroer ka Siyon (kho Hermon) shongh sühko.

⁴⁹Hobaje Jordan danan chaangbou Araba pendou khei Pisga anglek phang Araba yungnyu sühko.