Read Chang Naga NGÜHKÜPAIBÜ 5 Bible Online

NGÜHKÜPAIBÜ 5 - Chang Naga bible

NGÜHKÜPAIBÜ 5

¹Kheijinei Mosaei Israelbü pendou ngakei hoba haoen to laukei, “O Israel, tat ngei kaneibü nouei ditko lenbü hoba yeikubü ngühkhüm kanei ditletan khübü kho jungeila ditashi.

²BUNYUBOU seneibü Mühghaüei Horeba sen to theyolanyobü che kümbei.

³BUNYUBOUei ho theyolanyobü seneibü nyusibou to aying, lausikei sen aoyou tat ki khei sen to kümbei.

⁴BUNYUBOUei shongha wan jenyu ka kan to the thenthen joyokei,

⁵kho jiha BUNYUBOUeibü ngüh kan la lenla shanga BUNYUBOU si kan kanglanga ngo lokei, aishanga kan wan to hatko kikei, hoba shongh to along.” Hobaje BUNYUBOUei laukei,

⁶“No Ijep kaodak aaothu ka leiyenbou ngo Mühghaü BUNYUBOU kho ngo ki.

⁷“‘Nyi kü thedanga lubü Mühghaü aikei tekiti.

⁸“‘Thükaenei müh, ayingsi maang aenei kao ayingsi kao phanga deia kibü phatbü aikei ka thedanga heangsho teküm;

⁹Nyi haoen thedanga tekhüpet, ayingsi haoen telem, aieilausi kü to mangsenbü nyusiboueibü shabü hangshong haoeneibü shousi shuong meten sem lei sühko shieikoebü;

¹⁰hoba kü to sanoubü hoba ngeibü ngüh ditbü hajar hajar to onoubü ngo BUNYUBOU kaibü Mühghaü nyekto shatbou Mühghaü ki.

¹¹“‘Nyi BUNYUBOU kaibü Mühghaü nyen amlanga telauei; aishanga aoei haoeibü nyen amlanga laueilaje BUNYUBOUei hao ayuktiko aphokulabü.

¹²“‘BUNYUBOU kaibü Mühghaüei ka la sakkubü tegü, Nounyet saopotham phoko nouashi.

¹³Kan chalou laknyet koua ungashi, hoba kaibü kümsilei pendou kümashi,

¹⁴lausikei nyetbounyet kho BUNYUBOU kaibü Mühghaü shanga Nounyet ki; khünei nyi kümsilei ai akümlabü, no yingsikei, kaibü shou yingsikei, kaibü yaksashou yingsikei, kaibü sambou yingsikei, kaibü samnyu yingsikei, kaibü masu pongsu yingsikei, kaibü gadu yingsikei, kaibü samkeisamuk yoa yingsikei, kaibü chema kibü yenbou yingsikei, khei kaibü sambou si samnyu no tegü haksolabü lele,

¹⁵Hobaje no Ijep kaodaka sambula lean kikei, hoba BUNYUBOU kaibü Mühghaüei hau kibü ikei hoba phem shingan no khüka leian loukei dogo nyi damenlabü; hibü BUNYUBOU kaibü Mühghaü Nounyet saopotham phola ka la sakkukei.

¹⁶“‘BUNYUBOU kaibü Mühghaüei ka la sakkubü tegü kabou si kanyu to soumo hatashi; khünei BUNYUBOU kaibü Mühghaüei laobou kaonyek ka la kuda khünei no salangko hoba maisho kilabü.

¹⁷“ ‘Nyi müt tehaiti.

¹⁸“ ‘Nyi asangalanbü tejungei.

¹⁹“ ‘Nyi tekok.

²⁰“ ‘Nyi kaibü lepbü khulimbo amlangbü aukabü tüt.

²¹“ ‘Nyi ka lepboueibü yak to tedüh, nyi kaibü lepboueibü chem yingsikei, haoeneibü sek yingsikei, haoeneibü sambü yingsikei, haoeibü masu yingsikei, haoeibü gadu yingsikei, ayingsi ai ong ka lepboueibü kilaje kho tedüh.’

²²“Habü ngüh BUNYUBOUei kan kaman kibü pendou la wan jenyu ka shongha sangmei ka hoba nakthüh shangbü yaangbü ka ngüh yaangbüei joyokei, hoba haoei aeila ajinku. Hobaje haoei khübü kho laangdak penyia dokei hoba kho kü la kukei.

²³“Hobaje shongh wanei laakko kijinei, ladang kanei nakthüh shangbü jenyu ka ngühlang kho ditkei khei kan chung leiyeibü shuong hoba kan jaishou shuong kü jungto nyangko loukei,

²⁴hoba kanei laukei, ‘Chühashi, BUNYUBOU seneibü Mühghaüei sen la haoeibü soneikangbü hoba hao yaangbü lena, hoba wanlong jenyu ka senei haoeibü ngühlang ditda, hoba hao lang kida dogo senei hapa.

²⁵Hibü tou aila sen haila? aishanga ho wan yaangbüei sen shemlabü; tokei BUNYUBOU seneibü Mühghaüeibü ngühlang senei didalonga kheijinei sen hailabü.

²⁶Aishanga langkeibü Mühghaüei wan ka joyobü senei ditbü tegü müt aoei ditan lang ki?

²⁷No nyangko hauashi, hoba BUNYUBOU seneibü Mühghaüei lenla kibü pendou ditashi, hoba BUNYUBOU seneibü Mühghaüei ka to joyobü pendou nyi kün la lenbü; künei kho ditlabü hoba kümlabü.’

²⁸“Hobaje ladang kanei kü to joyokei, BUNYUBOUei kaneibü ngüh ditkei; hoba haoei kü to laukei, ‘Habü mütshuongei ka to joyobü haoeneibü ngüh ngei dida; haoenei laubü pendou kho tükde lauda.

²⁹Oh, khei haoen hoba haoeneibü shousinasi ponpen maian kila shanga haoenei kü to soumo hatko hoba ponpen ngeibü ngühkhüm ditlabü lele haoeneibü maangpon khei ong kiama!

³⁰Hauan haoen to lenashi: Kan neichem to sepeinyu ngaiashi.

³¹Lausikei noje kü junga nyangko loteishi, hoba ngei ka la sakkubü ngühkhüm hoba matjem pendou ngei haoen kila kubü kaonyeka haoenei kümlabü ngei ka la lenlabü.’

³²“Hibü khoei BUNYUBOU kaneibü Mühghaüei kan la sakkubü tegü kanei kümla jungeiashi; kan nanae maeae to tesepei.

³³Kan lang kila hoba kan maian kila hoba kanei lebü kaonyeka kan langkei salang loula shanga, BUNYUBOU kaneibü Mühghaüei kan la sakkubü lamnyu pendoua kanei paijan.