Read Chang Naga NGÜHKÜPAIBÜ 6 Bible Online

NGÜHKÜPAIBÜ 6 - Chang Naga bible

NGÜHKÜPAIBÜ 6

¹“Tou kanei laobou kaodak lela atda, kho kaodaka khübü kho kümla BUNYUBOU kaneibü Mühghaüei kan to lenla sakkubü ngühkhüm deikhüm hoba matjembü ho ki:

²Khei haoeibü ngühkhüm hoba haoei sakkubü laobou ngei ka la sakkuda, no hoba kaibü shousi hoba kaibü shisishousiei, hoba kaibü salang sünga, hoba khei kaibü salang loula shanga nyi BUNYUBOU kaibü Mühghaü to soumo hatlabü hoba ho po pendoua jungeila shanga ki.

³Khoei, O Israel, BUNYUBOU kaneibü nyusibou Mühghaüei kan la thekubü tegü sendei hoba naodei kouko kibü kaodaka kan naang mailabü, hoba bukyohaayola shanga khübü kho maangsangko jungeila shanga ditashi.

⁴“Ditashi, O Israel, BUNYUBOU seneibü Mühghaü kho BUNYUBOU che ong ki;

⁵hibü nyi BUNYUBOU kaibü Mühghaü kaibü maangpon pendouei, kaibü soushou pendouei hoba kaibü hau pendouei sanouashi.

⁶Tat ngei kan la sakkubü ho kaneibü maanga phojan.

⁷Habü ho nyi kaibü shousi la moshikko lenashi, hoba no chema setjinei hoba no lama paijinei hoba no yepjinei hoba no pijinei habü ho shangabü lauashi,

⁸hoba nyi khübü kho shensinge kaibü ika khühashi, hoba khübü kho kaibü khüngjaa shensinge kilabü;

⁹hoba nyi khübü kho kaibü koukhua hoba bakhüna dojan.

¹⁰“Hobaje ladang BUNYUBOU kaneibü Mühghaüei kaneibü pisibou Abraham, Isak hoba Jakob to kan la kula sangnyu yaangbü hoba maibü shuong laobou kanei aküm,

¹¹kanei ayoshaibü peisileiei chem shenko, kanei athubü deikhün lamlean semlüh ba, hoba oliv bunyu, laobou kanei ake, lausikei kanei shishenko shaula thükkei, khüto ladang nyi haoen leian loulaje.

¹²Kheijinei Ijep kaodaka aaochem ka kan leiyenbü BUNYUBOU amaako kila maangsangashi.

¹³Nyi BUNYUBOU kaibü Mühghaü to soumo hatashi, hao ong nyi khangenjan, hoba haoeibü nyena thealanashi.

¹⁴BUNYUBOU kaibü Mühghaüei kakhu limbo khauangko kaonyu ka no amautila shanga,

¹⁵no kaijembo kibü phangeibü mühghaü küksithang mühghaü phai asemjan, aishanga kan yoa kibü BUNYUBOU kaibü Mühghaü nyekto shatbü Mühghaü ki.

¹⁶“Kanei Massaa hao takteibü tegü kanei BUNYUBOU kaneibü Mühghaü atakteijan.

¹⁷BUNYUBOU kaneibü Mühghaüei sakkubü shuong hoba haoei kan la sakkubü ngühkhüm shuong kanei tükde jungeiashi.

¹⁸BUNYUBOUei thekubü tegü kan naangmailabü hoba kaonyek maibü khüto atan kila BUNYUBOU kaneibü pisibou to theyolanyoko laobou shanga kaneibü lamnyu ka kaneibü dangbou pendou shian apbula shanga

¹⁹BUNYUBOU junga ai tükde hoba maibü ki kho kanei kümjan.

²⁰“Ladang kaibü shouei ka to loulabü jihsiphaia, ‘Aila seneibü BUNYUBOU Mühghaüei sen la habü sakkubü ngühkhüm, song ngühkhüm hoba matjem jungeila sakkukei?’ dogo phelaje,

²¹kheijinei nyi ka shou to lenshi, ‘Sen Ijepa Faraoeibü aao la yeian kikei, hoba BUNYUBOUei hau kibü ikei sen Ijep ka leiyenkei.

²²Kün thedanga Ijepbü thükto, Farao thükto hoba haoeibü chema kibü pendou thükto shenla ngelabü hoba seikümseilei yaang hoba hatlamoklabü lenkei.

²³Lausikei haoei seneibü pisibou la thekuko theyolanyobü kaodak kho sen la kula leian loula shanga haoei khüka sen leiyenkei.

²⁴Hibü tat sühko kibü tegü, haoei sen lang phokula hoba sen ponpen maila shanga BUNYUBOU seneibü Mühghaü to souhatla habü ngühkhüm pendou kümla BUNYUBOUei sen la sakkukei.

²⁵Hibü khoei BUNYUBOU seneibü Mühghaü thedanga haoei sen la sakkubü tegü kho sakkubü pendou kümalonga sen shanga kho saopobü kilabü.’