Read Chang Naga NGÜHKÜPAIBÜ 7 Bible Online

NGÜHKÜPAIBÜ 7 - Chang Naga bible

NGÜHKÜPAIBÜ 7

¹“Ladang BUNYUBOU kaibü Mühghaüei nyi lela kibü kaodak to no leian loulaje, hoba ka thedang ka phang juong, Hitbü, Girgasbü, Amorbü, Kananbü, Perizbü, Hivbü hoba Jebuzbü, kan to yaangbou hoba hau kibou phang nyet kan thedang ka shian aplaje;

²hoba ladang BUNYUBOU kaibü Mühghaüei haoen kaibü ik to kulaje hoba nyi haoen thüklaje, kheijinei haoen lemailela mautiashi; nyi haoen to aikei theyolanyobü teküm, ayingsi haoen to üeisanou telen;

³ayingsi haoen to laolam yaknga teki, kaneibü nou- yangnyu haoeneibü jayangshou la teku, ayingsi haoeneibü nou- yangnyu kaneibü jayangshou la teleti:

⁴Aishanga kaneibü ja- yangshou küphai asembo haoenei lubü mühghaü khangenla haoenei sepeitilabü; khoei BUNYUBOU khauang kakhu limbo longlabü hoba haoei no tongde mautilabü.

⁵Lausikei kanei haoen to hai jungeiashi, kanei haoeneibü lemshang leilukuko haoeneibü sao- pobü thaonyu netla yeiko leilukuashi, haoeneibü Asherim chengan koutikuashi, hoba haoeneibü heangsho wanei jikan apbuashi.

⁶Aishanga BUNYUBOU kaibü Mühghaü shanga kan saopobü mütli ki, BUNYUBOU kaibü Mühghaüei kaodaka phang pendou thüka haoei jembü mütli phangche yeila haoei kan pienkei.

⁷“Lubü toje kan mütli juongbou yingbü ka BUNYUBOUei kan to maangshikkei hoba pienkei aying, aishanga phang pendou to kan shibou ki;

⁸lausikei kho BUNYUBOUei kan to sanoubü ka hoba kaneibü pisibou to theyolanyoan kibü ka BUNYUBOUei hau kibü ikei kan leiyenkei, hoba Ijepbü choba Farao ik ka aaochem ka kan khümenkei.

⁹Hibü BUNYUBOU kaneibü Mühghaü kho maanglemlabü Mühghaü dogo ngeashi; ao hao to sanoubü hoba haoei sakkubü jungeibü dan to meten hajar sühko thebülanbü hoba üeisanou lenbou ki;

¹⁰lausikei hao to mangsenbü la lemthek haoen mautila sepeinyu khüpngaida, hao to mangsenbü to hao nyibutham akida, lausikei lemthek hao to shemngaida.

¹¹Hibü tat ngei kan la kubü sakkubü, ngühkhüm, hoba matjembü nyi maangsangko jungeiashi.

¹²“Hobaje kanei habü ngühkhüm didalonga, phoalonga, hoba jungeialonga, khei BUNYUBOU kaneibü Mühghaüei kaneibü pisibou to theyolanyobü tegü, takletbü hoba üeisanou kan yoa pholabü.

¹³Hobaje haoei kan to sanoulabü, hoba haükulabü hoba bukyohaa- yotilabü, tokei haoei kan ka pakbü hoba kaneibü kao ka longbü kaneibü youshou, kaneibü semlühdei, kaneibü onang, kaneibü samkeisamuk, hoba kaneibü sanlon haabüyaangbü haoei kan la kulabü dogo kaneibü pisibou to thekuko lenbü kaonyeka haükulabü.

¹⁴Phang pendou to aei no haükulabü; kan yoa bousu yingsikei yaksa yingsikei, ayingsi kaneibü samkeisamuk yoa yingsikei angkongbü che ongkei akilabü.

¹⁵Hobaje BUNYUBOUei tokei kan shatsinyat pendou ka satentilabü; hoba kanei ngebü Ijepbüeibü shatsinyat amaibü aieikei kan to abaulabü; lausikei kan to mangsenbü pendou thükto kho jinkulabü.

¹⁶Hobaje BUNYUBOU kaneibü Mühghaüei kan la khümbo kubü müt pendou kanei mautijan; kaneibü nyekei haoen to sanouko achühjan, ayingsi kanei haoeneibü mühghaü alemjan; aishanga kho kan shanga sung che kilabü.

¹⁷“Habü phang kün to yaangbou künei lai shian apla? dogo kanei kan lolo telau.

¹⁸Kan haoen to ühütjan; BUNYUBOU kaneibü Mühghaüei Farao hoba Ijepbü pendou to kümbü kanei damen- ashi;

¹⁹Kan jembü nyekei hapbü takteibü yaangbü, tetsida, seikümseilei, hau kibü ik, hoba phemshingbü, laobouei ong BUNYUBOU kaneibü Mühghaüei kan aoyou to hatda haoen to kümlabü.

²⁰Tokei haoen jouan kibü hoba haoen lolo huan kibü kanei amauti shongko BUNYUBOU kaneibü Mühghaüei haoen yoto naoyang hautilabü.

²¹Kan haoen thedanga temok; aishanga BUNYUBOU kaneibü Mühghaü hatlamoklabü Mühghaü yaangbü kan yoa kia.

²²Hobaje BUNYUBOU kaneibü Mühghaüei habü phang ho hangsho hangsho ka jungka apbulabü, yama yamkabü meisiau yongko ühaala shanga kanei haoen chemala amautijan.

²³Kaneibü BUNYUBOU kaneibü Mühghaüei haoen kaneibü ika kulabü, hoba haoen amaushongko haoen aeibou phenyemtilabü.

²⁴Haoeneibü choba shuong haoei kaneibü ika khümbo kulabü, hoba haoeneibü nyen mühnyu phang ka kanei mautikulabü, kanei haoen amauti shongko cheei ongkei kan khulimbo alolabü.

²⁵Haoeneibü mühghaü heangsho shuong kanei jikan apjan; haoen to kibü chandinam ayingsi hon kanei adühjan, ayingsi kho jembü shanga asungjan; kho khei ayinglonga khoeibü sunga minan aplabü; aishanga ho BUNYUBOU kaneibü Mühghaü thedanga mangsenlabü ki,

²⁶hoba kaneibü chem to mangsenlabü aikei asungbajan, hoba kho phatko khüksiuok ayeitijan, kanei kho lepde asungletlabü hoba kho mangsenjan, aishanga ho shedsikhau peisilei ki.