Read Chang Naga NGÜHKÜPAIBÜ 8 Bible Online

NGÜHKÜPAIBÜ 8 - Chang Naga bible

NGÜHKÜPAIBÜ 8

¹“Kan lang kilabü, hoba bukyo- haayolabü, hoba BUNYUBOUei kaneibü pisibou la thekubü kaodak to atlabü hoba lela shanga sakkubü pendou laobou ngei ka la sakkuda kho kanei kümjan.

²Hobaje haoei kan semtiamtila, kan takteila kaneibü maanga ai kikei kho ngela haoei sakkubü kanei jungeiasaoje ngela shanga BUNYUBOU kaneibü Mühghaüei khübü po saonyi yama kan leibü lamnyu pendou kanei damenjan.

³Hobaje müt wentekei ong lang akida, lausikei BUNYUBOUeibü sembung ka ai ong longlaje khoei müt lang kida dogo haoei kan la ngetila shanga, haoei kan ea aoa yeitikei, hoba kan mühei haitikei, hoba manaei haoei kan sambei, laobou nyikei hoba kaneibü pisibousieikei angeko kikei.

⁴Khübü po saonyi kaneibü neisimei ühang ayingsi kaneibü you abok.

⁵Hibü mütei jembüeibü shou thepetbü tegü BUNYUBOU kaneibü Mühghaüei kan thepetda dogo kaneibü maanga damashi.

⁶Hobaje haoeibü lamnyua paibüei hoba hao to souhatbüei kanei BUNYUBOU kaneibü Mühghaüei sakkubü jungeiashi.

⁷Aishanga BUNYUBOU kaneibü Mühghaüei kan kaodak maibü che to leian louada, shushou kibü kaonyek, deikhün hoba deikük pholi hoba shongh ka kouko kishang,

⁸whet si barli youshou kibü kaonyek, semlühlaak, hoba bhuklong, hoba chilang kishang; onang longbü oliv long hoba naodei kibü kaonyek,

⁹kongbü kaangbü akiko kanei wentek shaulabü kaonyek, khünei kan aieikei shaalelabü; laang kho namkung kishang hoba kho shongh ka chinam thuenlabü kaonyek ki.

¹⁰Hobaje ladang kan shishenko shaulaje, BUNYUBOU kaneibü Mühghaüei kan la kaonyek maibü kubü shanga kanei hao nyen sanglabü.

¹¹“Tat ngei kan la kubü haoeibü sakkubü, matjembü hoba haoeibü ngühkhüm ajungeibüei BUNYUBOU kaneibü Mühghaü amaala maangsangashi;

¹²hoba ladang kan shishenko shauan, hoba kishang chem dangan,

¹³hoba kaneibü chandinam hoba hon haalaje hoba nyi kibü pendou haako yaangko yeilaje;

¹⁴kheijinei kaibü maanga yonglam liliko Ijep kaodak aaochem ka kan lei- yenbü BUNYUBOU kaneibü Mühghaü amaala shanga,

¹⁵aoei kan yam yaangbü hoba hatlamoklabü ainei pinyu hoba sinkip ki hoba dei lako kibü dei akishang kaonyek danko leian angkei hoba laangkoklok ka kan la dei longtikei;

¹⁶hoba yama kaneibü pisibouei angebü manaei sambei, kho khei kan eaaoa yeitila hoba takteila, khei thonla kan maila kümlabü shanga kikei,

¹⁷hoba kanei jembü maanga kün jembü seisihauei ho nyaksinam kün shanga hapbei dogo alaula maangsangashi.

¹⁸Lausikei nyi BUNYUBOU kaibü Mühghaü damenjan, aishanga ka la kaibü nyaksinam hapla sei kubou kho hao ki, tat sühko kibü tegü, kaneibü pisibou la haoei thekubü haoei haüthüktila shanga kho khei kikei.

¹⁹Kanei BUNYUBOU kaneibü Mühghaü maan lubü mühghaü phaito paialonga hoba haoen khangenalonga hoba hao to lemalonga maimaitham kan maulabü dogo tat kan khulimbo ngei aukabü kuda.

²⁰Kan thed- anga BUNYUBOUei phang shuong mautibü tegü kankei mautilabü, aieilausi BUNYUBOU kaneibü Mühghaüei lenbü ngüh kanei adit.