Read Chang Naga NGÜHKÜPAIBÜ 9 Bible Online

NGÜHKÜPAIBÜ 9 - Chang Naga bible

NGÜHKÜPAIBÜ 9

¹“Ditashi, O Israel, tat no Jordan danjung haulabü kia, kan to yaangbou hoba hau kibou phangshuong aüan apbo sangnyu yaangbü hoba müh sühko ba lelepan

²mütshuong kho yaangbü hoba thong loubü Anakim shousi shuong aoyou shangabü kan lolo ngean laukei, ‘Anakim shousi thedanga aoei loenla?’

³Hibü BUNYUBOU kaibü Mühghaü, ka thedanga mautibou wan tegü hao hauda dogo nyi tat ngeashi, haoei haoen mautilabü hoba ka thedanga haoei haoen yantilabü, hibü BUNYUBOUei joyobü tegü, nyi haoen shian aplabü hoba haoen sosotham mautilabü.

⁴“BUNYUBOU kaibü Mühghaüei haoen ka thedang ka shian apbusi nyi ho no lolo, ‘Ngo saopobüei BUNYUBOUei ngo ho kaonyek phet- phanla leian loukei dogo ladangkei telau;’ lausikei habü phang amaibü hangshong BUNYUBOUei kan thedang ka haoen shian apbü ki.

⁵Ho no saopobüei ayingsi no maang tangbüei haoeneibü kaonyek lela no hauda dogo aying lausikei khübü phang amaibü hangshong BUNYUBOU kaibü Mühghaüei haoen ka thedang ka shian sattibü ki; khei kaneibü pisibou, Abraham, Isak hoba Jakob la thekubü haüthükla ki.

⁶Hibü maisho ngeashi, kan sao- pobü shanga BUNYUBOU kaibü Mühghaüei ho kaonyek maibü lela ka la kuda aying, aishanga kan maangkaangbü ki.

⁷“Nyi lai BUNYUBOU kaibü Mühghaü khau angtikei kho damenashi, hoba nyi tema; Ijep kaodak apyoan haubü chalou ka ho kishang asühshongko kanei BUNYUBOU to dangyoko ong louda.

⁸Horebakei khei kanei BUNYUBOU khauangtikei hoba kan mautilabü lele haoei kan to khauangkei.

⁹Ladang ngo laangdaka dobü sungletla ngo shongh to angkei, kho kan to BUNYUBOUei thekubü laangdak kikei, ngo chalou saonyi shongha kikei, ngei shaukei ashau, deikei ayung.

¹⁰Kheijinei BUNYUBOUei laangdak penyia Mühghaüeibü ikjishouei doan kü la kukei; hoba shuong yoshaibü chaloua wan ka BUNYUBOUeibü shongha kan to joyobü ngüh pendou khünei doan kikei.

¹¹Hobaje chalou saonyi langyang saonyi thonbüa khei theyolanyobü dobü laangdak penyi BUNYUBOUei kü la kukei.

¹²“Hobaje BUNYUBOUei kü to laukei, ‘Meimeiashi, haka panteiko yanashi, aishanga nyi Ijep ka leian loubü kaibü eikshuong haoen lolo shaa; ngei haoen la sakkubü lam ka haoen lolo tongde sepeinyu ngaia, haoenei haoen lolo nam tühnyinbüei heangsho küma.’

¹³“Tokei BUNYUBOUei kü to laukei, habü mütshuong ngei hapa, hoba chühashi, ho maangkaangbü mütshuong ki;

¹⁴ngei haoen mautilabü hoba mühnyu phang ka haoeneibü nyen haman aplabü, ngo kü mütpem apyoshi; hoba ngei ka ka haoen to aeibü hau kibü hoba phangyaang che yeitikulabü.

¹⁵“Hibü ngo sepeikei hoba shongh ka yankei, hoba wanei shongh kho juokkei, hoba theyolanyobü laangdak penyi kho ngeibü ika jungan kikei.

¹⁶Hobaje ngei chühkei hoba chühashi, BUNYUBOU kaneibü Mühghaü khulimbo kanei shabü shonan kikei; kanei jembü shanga namdei jonbü masu paangshou küman kikei; BUNYUBOUei kan la sakkubü lam ka kan tongde sepeinyu ngaian kikei.

¹⁷Hobaje ngei laangdak penyi kho jungkei, hoba ngeibü ik penyi ka attikei, hoba kan thedanga khübü kho phetnyinkei.

¹⁸Hobaje BUNYUBOU thedanga shaangla tegütham chalou saonyi hoba langyang saonyi ngo khüpetkei; ngei ashau ayung; kho kanei shonbü shedbü pendou, khei BUNYUBOU junga lai amaibü kikei, hoba hao maangto shatko khau angtikei kho tegü kümbü hangshong kikei.

¹⁹Aishanga khau angbü hoba aeibou aolinbü laobouei BUNYUBOUei kan khulimbo kan mautila khauangko kikei, kho ngei hatko kikei. Lausikei kho jihsiphaiakei BUNYUBOUei kü to ngüha lekei.

²⁰Hobaje BUNYUBOUei Aron mautila aeibou khau angko kikei, hoba tokei kho jihsiphaiatham ngei Aron shanga welaukei.

²¹Hobaje kanei kümbü masu paangshou, kaneibü shabü ngei wanei jikan apbukei hoba jangnyinkei hoba kho thamngu la ayeishongko netla phoula yeiko ngümnyinkei, hoba shongh ka loukoubü shumanga tap kho jinkukei.

²²“Hobaje Teberaa, Maasaa, Kibroth Hataavaa, kanei BUNYUBOU maangpoktikei.

²³Hobaje ladang BUNYUBOUei kan Kadesh Barnea ka hautiko, ‘Angashi, ngei kan la kubü kaodak kho leashi’ dogo laukei, kheijinei kanei BUNYUBOU kaneibü Mühghaüei sakkubü khulimbo kanei meimeikei, hoba kanei hao to maialem, ayingsi haoeibü ngühlang maialem.

²⁴Ngei kan ngebü chalou ka kanei BUNYUBOU khulimbo louda.

²⁵“Hibü ngo BUNYUBOU thedanga chalou saonyi langyang saonyi khüpetan kikei; aieilausi BUNYUBOUei kan mautilabü dogo laukei.

²⁶Hobaje ngei BUNYUBOU to welaukei, hoba laukei, ‘O BUNYUBOU, kaibü mütshuong kaibü phetphanbü shuong aoyou no yaangenbü danko nyi jekthetkei, hau kibü ikei nyi laobou Ijep ka leiyenkei, haoen temautima.

²⁷No khangenbou Abraham, Isak, hoba Jakob damenashima; habü mütshuong maangkaangbü ayingsi haoen amaibü ayingsi haoeneibü shabü to techühma;

²⁸kho tegü ayinglonga nyi kün leiyenbü kaonyekei, BUNYUBOUei haoen la thekubü kaodak to haoen leian loula athüksi, hoba haoei haoen to mangsensi haoei haoen yama haitila haoen leian loukei dogo laulabü.

²⁹Kho khei yingasikei haoen kaibü mütshuong kaibü phetphanbü, laobou nyi kaibü sei yaangbüei hoba kaibü ik shingbüei leian loukei.’