Read Chang Naga JOHAN 1 Bible Online

JOHAN 1 - Chang Naga bible

JOHAN 1

¹Kaodak moyaüjineithama Ngüh kiteikei. Ngüh kho Mühghaü yoa kikei hoba Mühghaü to jetei kikei.

²Büngla khangla hao Mühghaü yoa kiteikei.

³Ajanjan pendou hao danko ong kümbei, hoba hao ayokoje aikei aküm.

⁴Langkei pendou hao ka pakkei, hoba langkei kho khunak shousi ngesakbü kikei.

⁵Ngesakbüei nakthüh phanga hauda, hoba nakthühei kho ladangkei anyetti.

⁶Mühghaü ka hautibü müt che kiteikei; hao nyen Johan kikei.

⁷Hao danko pendouei mailemtila shanga ngesakbü shangabü ngüh chung künla hao aukabü shanga loukei.

⁸Ngesakbü kho hao aying, lausikei hao ngesakbü shangabü ngühchung künla loukei.

⁹Müt pendou ngesaktibou, tükdebü ngesakbü kho kaodak to louko kikei.

¹⁰Hao kaodaka kiteikei, hoba kaodak kho hao danko longkei, khei yingasikei kaodakei hao ange.

¹¹Hao jembü chem to loukei, lausikei haoeibü jembü mütliei hao asunglet.

¹²Lausikei aoyouei hao sungletkei, haoen la Mühghaü shousi shuong yeila hau kukei.

¹³Haoen müteibü haang ka aying, ayingsi mütei maangangbü ka aying, lausikei Mühghaü ka loukei.

¹⁴Ngüh khoei müt la yeikei hoba sen yoa kikei hoba haoeibü soneikangbü, onou hoba ngühmaiei shenan, Boueibü Jayangshou soneikangbü senei hapbei.

¹⁵Johanei hao shangabü aukabü künkei hoba ngekkei, “Ngei ao shangabü, ‘Ao kü phaito louada, hao küto yaangbou, aishanga hao küto shaang kiteikei’, dogo laukei kho hao ki.”

¹⁶Haoeibü atakenbü keisiyaang ka senei onoubü jongsak che phainei che sungletkei;

¹⁷aishanga Ngühkhüm kho Mosa danko kukei; onou hoba ngühmai Jisu Khrista danko loukei.

¹⁸Aoeikei Mühghaü hapan achühkei; lausikei, tükdebü, Bou jungkabou, Mühghaü-Jayangshouei ong sen la hao tang khittia.

¹⁹Ladang Jihudabüei Jerusalem ka Johan to, “No ao” dogo phela ungshedbü shuong si Levibü shuong hautikei, haoeibü aukabü ho kikei:

²⁰“Ngo Messia aying!” Kho haoei aeibou haüko theletkei.

²¹Haoenei hao to phekei, “Kholonga ai? No Elija sai?” Haoei laukei, “Ngo ji!” “No Thuseibü sai?” Haoei jongaikei, “Aying!”

²²Haoenei hao to laukei, “No ao? Künei kün hautibou la jongaibü kujan yingkei. Nyi ka shangabü ai lenla?”

²³Haoei laukei, “‘Bunyubou lamnyu tangshaitham kümashi’, dogo yama müt atei ngekbou kho ngo.”

²⁴Haoen Farisibü shuongei hautikei,

²⁵hoba haoenei hao to phekei, “No Messia aying. Elija aying, Thuseiboukei aying longa, kholonga nyi aila baptikuda?”

²⁶Johanei haoen to jongaikei, “Ngei deia baptikuda. Kan yoa che loakei, ao kanei ange;

²⁷kü phaito loulabou kho hao yingkei. Ngo haoeibü nguoklüh sengkula amukei.”

²⁸Habü ho Johanei baptikushang Jordan thidang Bethania haüthükkei.

²⁹Nyibounyet haoei Jisu hao jungto louko hapbei, hoba haoei laukei, “Chühashi! Kaodak shabü künlangbou, Mühghaü Sanshoushou.

³⁰‘Kü phaito müt che loulabü, ao kü to thükkabou ki; aieilausi hao kü to shaang kiteikei’, dogo lenko ngei ao shangabü laukei, kho hao.

³¹Ngeikei hao ashenkei, lausikei hao Israel la tang khittila shanga ngei deia baptikuko loukei.”

³²Hobaje Johanei hai lauko aukabü kukei, “Ngei khuthük ka Soushou dukutuk tegü louyenan, hao to pakko hapbei.

³³Ngei hao angeen, lausikei ngo deia baptikula hautibouei kü to laukei, ‘Nyi ao thükto Soushou louyenan pakko hapbei, hao kho Soushou Saopobüa baptikubou ki.’

³⁴Ngei ho hapa, hoba hao kho Mühghaü Shou dogo ngei aukabü küna.”

³⁵Toukei, nyibounyet Johan haoeibü eik müt nyi yoa loan kikei.

³⁶Jisu paiko kibü to chühan haoei laukei, “Chühashi, Mühghaü Sanshoushou.”

³⁷Haoeibü eik müt nyiei haoei laubü ditkei hoba haosi Jisu phai sembei.

³⁸Jisuei sepeian chühngaikei, hoba ladang haoei haosi sembo hapbei, haoei haosi to laukei, “Kasiei ai lamda?” Haosi ei hao to laukei, “Rabai (tetlabü, Lenbou), no lanei kida?”

³⁹Haoei haosi to laukei, “Kaiya, hoba kasiei haplabü.” Hibü haosi haukei hoba hao kishang hapbei, hoba haosi khünyet hao yoa kikei. Kho chasem angh lei thünga kiteikei.

⁴⁰Johanei laubü ditan Jisu phai sembü müt nyi yoa cheje Simon Petereibü na Andria kiteikei.

⁴¹Haoei tongde haojai Simon hapbei hoba hao to laukei, “Künei Messia (tetlabü, Naangenbou) hapa.”

⁴²Haoei hao Jisu jungto leibakei. Jisuei hao to chühkei hoba laukei, “No Jona shou Simon, no Kefa (laobou Peter dogo sepeikei, tetlabü, ‘Laangnyudak’) dogo nyenlabü.”

⁴³Nyibounyet Jisu Galil to haumang sühkei, hoba haoei Filip hapbei. Jisuei hao to laukei, “Kü phai semshi.”

⁴⁴Filip kho Andria si Peter habü sang Bethsaida ka kiteikei.

⁴⁵Filipei Nathaniel hapbei hoba hao to laukei, “Künei Nazaret kabü Josef shou Jisu, ao shanga Mosa Ngühkhüma hoba thuseibü shuongei dokei, kho müt hapa.”

⁴⁶Nathanielei hao to laukei, “Nazaret ka aiche maibü longlep si?” Filipei hao to laukei, “Louan chühashi.”

⁴⁷Jisuei Nathaniel hao jungto louko hapbei hoba hao shangabü laukei, “Tükdebü Israelbü, aeibou lanbü müt che hato chühashi.”

⁴⁸Nathaniel ei hao to laukei, “Nyi ngo lai ngekei?” Jisuei jongaikei, “Filipei no angajinei, no bhuklong che phanga kian ngei no hapbei.”

⁴⁹Nathaniel ei jongaikei, “Lenbou, no Mühghaü Shou; no Israel bü Choba.”

⁵⁰Jisuei jongaikei, “Ngei no bhuklong phanga hapbei dogo lenbü shanga nyi mailemda lo? Nyi khübü to yaangbou haplabü.”

⁵¹Hobaje haoei hao to laukei, “Maimaitham ngei ngühmaia kan pendou to lenda, kanei khuthük ipan haplabü hoba Mühghaü khuthük hangangbü shuong Müteibü Shou thüka angko louyenko haplabü.”