Read Chang Naga JOHAN 10 Bible Online

JOHAN 10 - Chang Naga bible

JOHAN 10

¹“Ngühmaia ngei kan to lenda, ao koukhüm danko sanchem to alotda lausikei lubü lam aeka nguida, hao kokbü hoba yepeibü;

²lausikei san shuong lombouje koukhüm danko lotda.

³Hao la koukhüm lombouei ipbuda, hoba san shuongei hao ngüh ditda; haoei jembüeibü sanshuong nyenshenko ngada hoba leian satda.

⁴Ladang haoei jembüeibü pendou leibada, hao haoen thedanga paida, hoba sanshuongei hao phai semda aieilausi haoenei hao ngüh ngekei.

⁵Haoenei yenbou phai asemlabü, lausikei hao jungka laangjung satkhümlabü aishanga haoenei yenboueibü ngüh kho ashenkei.”

⁶Jisuei kho ngühphatbü haoen to laukei, lausikei haoei haoen to ai laudaje haoenei aditen.

⁷Jisuei nyibou laukei, “Maimaitham ngühmaia ngei kan to lenda, ngo sanshuong shanga koukhüm.

⁸Kü to shaang loubü shuong pendou kokbü hoba yepeijawebü, lausikei sanshuongei haoen to aditku.

⁹Ngo koukhüm; ngo danko atei lotsije hao khümenlabü, hoba lotlabü hoba anglabü hoba lamshaushang haplabü.

¹⁰Kokbüje koklangla hoba haitila hoba leilutila shanga ong louda. Mütshuongei langkeibü nahapla shanga ngo loukei hoba ho apsileko haplabü.

¹¹Ngo sanlombü maibü. Sanlombü maibüei sanshuong shanga haoeibü langkei phoyokuda.

¹²Mulambü müt, ao sanlombü ji, ayingsi sanbuboukei aying, ladang sho che louko hapda haoei sanshuong apyoda hoba wenjung satda, hoba shoei taketda hoba lintida.

¹³Kho aieilausi hao mulambü müt hoba haoei sanshuong shanga adambuda.

¹⁴Ngo sanlombü maibü, Bouei ngo lai ngekei, kho tegü ngei jembüeibü ngekkei, hoba jembüeibüei ngo ngekei; hoba sanshuong shanga ngei kü langkei phoyokuda.

¹⁶Ho sanchema ayobü ngeibü san lubü kia. Ngei haoenkei leibajan hoba haoenei kü ngüh to ditlabü, hoba haoen sanlombü che yoa sanshuong che yeilabü.

¹⁷Bouei ngo sanouda, aieilausi kho nyibou hapmeilabü lele ngei kü langkei phoyokuda.

¹⁸Aoeikei ho kü ka alangda, lausikei ngei ho ngei lolo phoyokuda. Ngei ho phoyola janbü ki hoba ngei ho nyibou hapmeila janbü ki. Kübouei kü to ho kümla lenkei.”

¹⁹Tokei Jihudabü yoa ho ngüh danko janyinbü longkei.

²⁰Haoen juongei laukei, “Hao to shabü sou kia, hoba langet angda. Kanei aila hao ngüh ditda?”

²¹Lubü shuongei laukei, “Habü hoje shabü souei lapbü ngüh aying. Shabü souei nyekthubü nyek khittikula thüklep si?”

²²Jerusalema Saüenbü Lem kikei. Kho poanga;

²³hoba Jisu Solomon chemsophanga lembü- chema paiko kikei.

²⁴Jihudabüei hao kailepbei hoba hao to laukei, “Nyi kün lalokche phenyemtila? No Messia yingalonga kün la tou chongchingko lenbü.”

²⁵Jisuei haoen to jongaikei, “Ngei kan to lena, hoba kanei maialemda. Ngei kü Bou nyena kümbü kümsileiei kü shangabü aukabü kuda;

²⁶lausikei kanei maialemda, aieilausi kan ngeibü sanshuong aying.

²⁷Kü sanshuongei kü ngüh ditda; ngei haoen ngeakei hoba haoenei kü phai semda.

²⁸Ngei haoen la thon akibü langkei kuda, haoen ladangkei amaulabü, hoba aoeikei kü ikmang ka haoen asolanglabü.

²⁹Kü Bouei ai küla kuan ki kho pendou to yaangbou, hoba aoeikei Boueibü ik ka haoen sola athükkei.”

³⁰Bou hoba ngo che ong.

³¹Jihudabüei hao to tetla nyibou laang hekei.

³²Jisuei haoen to jongaikei, “Bou ka ngei kan la kümsilei juongnyu lena. Khübü yo ka laobou kümsilei shanga kanei kü to tetla?”

³³Jihudabü shuongei hao to jongaikei, “Kümsilei maibü shanga künei kato atetda, lausikei Mühghaü nyikubü shanga, hoba no müt che ong yingan, nyi no lolo Mühghaü la yeibü shanga.

³⁴‘Kan mühghaü shuong’, dogo Mühghaüei laubü kaneibü Ngühkhüma adokei lo?

³⁵Haoen aoyou jungto Mühghaü ngüh loukei, haoei haoen to mühghaü dogo ngakei, hoba Laishiba ngüh sungenan apla athükkei.

³⁶Kholongaje, ngei ‘Ngo Mühghaü Shou’ dogo laubü shanga, Bouei ao saüenkei hoba kaodak to hautikei, hao to kanei ‘Nyi Mühghaü nyikuda’, dogo lauda lo?

³⁷Ngei Kübou kümsilei aküm longaje kü to maitelemkai;

³⁸lausikei ngei khübü kümda longa, kanei kü to maialemasikei, Bou kü to ki hoba ngo Bou to ki dogo kanei damenlabü hoba ngelabü lele, kümsilei shuong to mailemshi.”

³⁹Hibü nyiboukei haoenei hao lapla haujembei; lausikei hao haoen ikmang ka satenkei.

⁴⁰Hao nyibou Jordan thi aedang, Johanei shaangla baptikushang to haukei, hoba hao khünei kikei.

⁴¹Müt juong hao jungto loukei. Haoenei laukei, “Johanei amaaphilabü ai aküm, lausikei Johanei ho müt shangabü laubü pendou kho tükde ong kiteikei.”

⁴²Hobaje juongei hao to khün mailembei.