Read Chang Naga JOHAN 11 Bible Online

JOHAN 11 - Chang Naga bible

JOHAN 11

¹Mari si Martha habü sang Bethani kabü Lazar nyenbü shatbü müt che kiteikei.

²Kho Bunyubou la ponlem onang naangkuan saoeibü khulouei haman apbunyu Mari, saoeibü na Lazar shatko kiteikei.

³Hibü nounyiei hao jungto hai lauko hautikei, “Bunyubou, kathangbou kho shatda.”

⁴Ladang Jisuei kho ditkei haoei laukei, “Kho shatbü kho haibüa thonlabü aying, lausikei ho danko Mühghaü Shou soneikangtila shanga ki.”

⁵Jisuei Martha hoba saoeibü na hoba Lazar to sanoukei.

⁶Ladang haoei hao shatda dogo ditkei, haoei tokei hao lan kiteikei khünei chalou nyi thüngkei;

⁷hoba kho phaia haoei haoeibü eikshuong to laukei, “Sen Jihuda to han ngaiakho.”

⁸Eikshuongei hao to laukei, “Lenbou, tou nyangko ong Jihudabüei kato laangei tetla lameikei; no khüto nyibou hauda si?”

⁹Jisuei jongaikei, “Chalou chenei angh anthüknyi akida si? Müt cheei chaloua paia longa, aphaiyetlabü, aishanga haoei ho kaodak ngesakbü hapda;

¹⁰lausikei müt cheei nangnak paialonga, hao phaiyetda, aieilausi ngesakbü kho hao to aki.”

¹¹Kho lauan phaia haoei laukei, “Sen thangbou, Lazar nyeket shiakei; lausikei ngo hao lakseptila hauda.”

¹²Eikshuongei hao to laukei, “Bunyubou, hao nyeket shikei longa, hao mailabü.”

¹³Jisuei hao haibü shanga lauan kiteikei, lausikei haoei nyishoubü yepbü shanga lauda dogo haoenei dambei.

¹⁴Kheijinei Jisuei haoen la shangashatko lenkei, “Lazar haia,

¹⁵kanei mailemtila ngo khünei akiteibüei ngo kan shanga olinda. Sen hao jungto hauakho.”

¹⁶Hibü Thoma (laobou ngühtet “Phokshou”) ei jambü eikshuong to laukei, “Hao yoa hailabü lele senkei hauakho.”

¹⁷Ladang Jisu loukei kheijineije Lazar heea khünan phaia chalou leibounyet yingan kikei.

¹⁸Bethani kho Jerusalem nyangko, mail nyi thüngei aoan kikei.

¹⁹Jihudabü juong Martha si Mari jungto haosieibü na shanga maang sula louan kiteikei.

²⁰Ladang Marthaei Jisu louada dogo ditkei, sao shuokla haukei; lausikei Mari chema setteikei.

²¹Kheijinei Marthaei Jisu to laukei, “Bunyubou, no hanei kiteia tegüje küna tehaikhoulabü.

²²Ngei ngeakei, tou yinga tegükei, nyi Mühghaü ka ai ong hilaje, haoei kala kulabü.”

²³Jisuei sao to laukei, “Kana langngailabü.”

²⁴Marthaei Jisu to laukei, “Thonbü Chaloua langngaibü jihsiphaia hao nyibou langkeilabü dogo ngei ngeakei.”

²⁵Jisuei sao to laukei, “Ngo langngaibü hoba langkei ki. Aoei kü to mailemda, hao haiasikei lang kilabü;

²⁶hoba ao lang kida hoba kü to mailemda, hao ladangkei ühailabü. Nyi mailemdalao?”

²⁷Saoei hao to laukei, “Haü, Bunyubou, kaodak to louko kibou, Mühghaü Shou, Messia kho no, dogo ngei mailemda.”

²⁸Saoei kho lauan phaia, sao ngaikei hoba saoeibü na Mari ngalangan, hakphangshoua lenkei, “Lenbou kho hanei kia, hoba haoei no ngada.”

²⁹Ladang Mariei kho ditkei sao tongde loenkei hoba hao jungto haukei.

³⁰Kheijinei Jisu sangnyu to molung, lausikei Marthaei hao haüyoshang kaoena ong kiteikei.

³¹Hibü ladang saoeibü maang suko Mari yoa chema setbü Jihudabü shuongei Mari phühde loenan satan apbü hapbei, haoenei sao heedang to haapla hauda dogo daman sao phai sembei.

³²Ladang saoei Jisu hapbei, saoei haoyou junga khü- petkei hoba hao to laukei, “Bunyubou, no hanei kiteikei teg- üje küna tehaikhoulabou.”

³³Jisuei sao hoba sao yoa loubü Jihudabü shuongkei haapyoko hapbei. Hao to maang leilukei hoba waangkei,

³⁴hoba laukei, “Kanei hao lanei khünkei?” Haoenei hao to laukei, “Yaangbou, louan chühashi.”

³⁵Jisu haapbei.

³⁶Kheijinei Jihudabüei laukei, “Haoei hao to latetche sanoukei, chühashi!”

³⁷Lausikei haoen atei laukei, “Haoei nyekthubü shuong la nyek ipbukei. Ho müt ühaitila haoei dencheje kümbü yingma lo?”

³⁸Jisu to nyibou maangto shatko heekhün to loukei. Kho laangkhün che, hoba laang cheei thangngaian kiteikei.

³⁹Jisuei laukei, “Laang kho khokan apashi.” Haibüeibü nou Marthaei hao to laukei, “Bunyubou, touje mangnyaülüm hilabü; hao haian chalou lei yinga.”

⁴⁰Jisuei sao to laukei, “Nyi mailemsije nyi Mühghaü soneikangbü haplabü dogo ngei kala alen lo?”

⁴¹Hibü haoenei laang kho khokan apbei; hoba Jisuei chühangtikei hoba laukei, “Abou, nyi kü to ditkubü shanga ngei ka nyen sangda.

⁴²Nyi kü to ponpen ditkuda dogo ngeikei ngeakei; lausikei hanei kaijembo loan kibü noknyüh laüa khei ngo hautibou kho no yingan kikei dogo haoenei mailemtila ngei ho laukei.”

⁴³Kho lauan phaia haoei ngüh yaangei ngekkei, “Lazar, longashi.”

⁴⁴Haian kibü müt kho haoeibü mangsho neiei kaian hoba haoeibü thenyek lemhamneiei yuklepan longkei. Jisuei haoen to laukei, “Mangsho nei sengkuashi hoba hao litiashi.”

⁴⁵Hibü Jihudabü juong aoyou Mari jungto loukei, haoenei haoei kümbü hapbei, hoba hao to mailembei,

⁴⁶lausikei haoen yoa at Farisibü jungto haukei hoba Jisuei ai kümbei kho haoen to lenkei.

⁴⁷Hibü thükkabü ungshedbou shuong si Farisibü shuongei Thükkabou Kambü huiletkei hoba laukei, “Kho mütei ama- aphilabü juongnyu kümda. Sen ai kümbo setda?

⁴⁸Senei hao khei apyoa longa, müt pendouei hao to mailemlabü, hoba Rombü louan seneibü lembüchem si sen phang ham leilukulabü.”

⁴⁹Haoen yo kabü müt che Kaifa nyenbü, ao khüpo thükkabou ungshedbou penan kikei, haoei haoen to laukei, “Kanei ai angekei;

⁵⁰sen phangshuong pendou shembhoulabü khantoje mütli shanga müt che haibü kho kan shanga maibou dogo kaneije damankei achühda.”

⁵¹Haoei ho haoeibü hauei laukei ji, lausikei khüpo thükkabou ungshedbou yingbü ka, phangshuong shanga Jisu haijan,

⁵²hoba phangshuong shanga ong aying, lausikei haoei aan kibü Mühghaü shousi shuong chela yeiko leishaila shangabü haoei ho tetenkei.

⁵³Hibü khünyet ka jaüan Jihudabüei Jisu haitila huonkei.

⁵⁴Hibü haoei Jihudabü yoa abongyo, lausikei khüka lamang nyangko kibü kaonyek, Efraim nyenbü sangnyu to haukei, hoba hao khünei eikshuong yoa kikei.

⁵⁵Jihudabü Püetbülem nyangko kikei, hoba haoen lolo saüenla shanga kaonyek ka müt juongnyu Püetbülem thedangto Jerusalem to angkei.

⁵⁶Haoenei Jisu lameiko kikei hoba lembüchema loan haoen si haoen hai lauyokei, “Kanei ai damda? Hao maimaitham lem to aloulabü si ai?”

⁵⁷Haoenei hao lapla shanga müt atei ongkei hao lan kije ngealonga, haoei ngühlang kujan, dogo thükkabü ungshedbü shuong si Farisibü shu- ongei ngühkhüm kuan kiteikei.