Read Chang Naga JOHAN 12 Bible Online

JOHAN 12 - Chang Naga bible

JOHAN 12

¹Püetbülem sühla chalou lak kian, Jisu, haoei haibü ka langngaitibou Lazar kishang Bethani to loukei.

²Haoenei hao la shausiyung lamlekukei hoba Marthaei nongnaekei; hoba Lazarkei hao yoa shaushanga setbü yoa che kiteikei.

³Mariei nam juong mubü ponlem onang thungshou che sungjung louan Jisueibü youa naangkukei hoba saoeibü khulouei haman apbukei. Chemmang pendou onang ponlemei shenkei.

⁴Judas Iskhariot, haoeibü eik yoa che, aoei hao khümbo kuan apla kiteikei, haoei laukei,

⁵“Aila kho ponlem onang kho sempak saongao sem lu yakan shalebü la aku?”

⁶Haoei kho shalebü shanga dambubü ka aying, lausikei hao namphot ikjai kikei hoba kokbü yingsije thanbü ka haoei kokshauko kikei.

⁷Jisuei laukei, “Sao khei ong phokushi; saoei ponlem kho ngo khünbü chalou shanga naphoa;

⁸aieilausi shalebü kan yoa ponpen kia, lausikei kan yoa ngo ponpenje akilabü.”

⁹Jihudabü mütshang yaangei Jisu Bethania kia dogo ditletkei, hoba haoen kho shanga ong aying lausikei haoei haikhün ka langngaitibü Lazar to chühlakei dogo loukei.

¹⁰Thükkabü ungshedbü shuongei Lazarkei haitila huonkei,

¹¹aieilausi hao hangshong Jihudabü juongei haoen wailetkei hoba Jisu to mailembei.

¹²Nyibounyet Lem to loubü mütshang yaangei Jisu Jerusalem to louada dogo ditkei;

¹³hoba haoenei hekyang pik pakkei hoba hao shuokla haukei. Haoenei hai ngekdang lekei, “Hosana! Bunyubou nyena ao louada hao haülabü yingshi! Israel Choba haülabou ki!”

¹⁴Jisuei gadu shoushou che hapbei hoba kho thüka setkei, Laia lenan kibü tegü,

¹⁵“Tehüt, Zion Sangnyu; chühashi, kaneibü Choba gadu shoushou chenei setan louada.”

¹⁶Haoeibü eikshuongei shaanglaje kho aditen, lausikei ladang Jisu soneikangkei, kheijinei haoenei ho hao shangabü Laia dobü, hoba mütshuongei hao shanga kheinyu kümbei dogo haoenei damenkei.

¹⁷Haoei Lazar heekhün ka ngaanko, haibü ka langngaikujinei hao yoa kibü mütshang pendouei aukabü kukei.

¹⁸Noknyühkei hao shuokla haukei aieilausi haoenei haoei kho sei kümbü ditkei.

¹⁹Farisibü shuong cheei che to laukei, “Kan ai hang along dogo kanei ngeakei. Chüha, kaodak pendouei hao phai sema!”

²⁰Lem to lemla loubü shuong yoa Grikbü at yoan kikei.

²¹Haoenei Galil kabü Bethsaidabü Filip to hai sukojako phekei, “Yaangbou, künei Jisu hapmang sühda.”

²²Filip loukei hoba Andria to lenkei. Andria si Filip louan Jisu to lenkei.

²³Jisuei haoen to jongaikei, “Müteibü Shou soneikanglabü jih süha.

²⁴Maimaitham ngühmaia ngei kan to lenda: Youli lang che kaoa shatan akhit longa, hao lansan kida; lausikei kho khitalonga, khoei mai juongnyu hekda.

²⁵Aoei haoeibü langkei sanouda, kho mauda, lausikei aoei jembü langkei mangsenda kho phoenlabü hoba thon akibü langkei haplabü.

²⁶Müt atei ngo khangensije, haoei kü phai semkai, hoba ngo lanei kilaje khünei ngo khangenboukei kilabü. Müt atei ngo khangensije, Bouei hao to soumo hatlabü.”

²⁷“Tou kü soushou to lamda, hoba ngei ai laula? Abou, ho jih ka ngo khümenkai dogo si? Lausikei ho shangabü ngo ho jih to loukei.

²⁸Abou, ka nyen soneikangtishi. Khuthük ka ngüh che loukei, ‘Ngei ho soneikangtia, hoba ngei toukei ho nyibou soneikangtilabü.’”

²⁹Khünei loan kibü noknyühei kho ditkei hoba kho langmak yingkei dogo laukei. Atei laukei, “Khuthük hangangbü cheei hao to joyoa.”

³⁰Jisuei laukei, “Ho ngühlang kü shanga aying, lausikei kan shanga ki.

³¹Ho kaodak tou matjemda; ho kaodak songdakbou tou shian sattilabü.

³²Hobaje ngo ladang kaodak ka tonenlaje, ngei müt pendou kü jungto senbalabü.”

³³(Haoei kho hao aiei hailabü yingkeije kho lenla shanga lauan kiteikei.)

³⁴Noknyühei jongaikei, “Messiaje ponpen kida dogo künei Ngühkhüm ka dida; kholonga nyi laibü Müteibü Shou kho tonenlabü dogo lauda? Kho Müteibü Shou kho ao?”

³⁵Jisuei haoen to laukei, “Tuisho shanga ngesakbü kho kan yoa kilabü. Nakthühei ala- phettila shanga kan ngesakbü kijinei paiashi; aishanga ao nakthüh phanga paida haoei hao lae haudaje angeda.

³⁶Ladang kanei ngesakbü kida, kan ngesakbü shousi shuong la yeila shanga, ngesakbü to mailemashi.” Jisuei kho lauan phaia hao satkei hoba haoen la hukukei.

³⁷Haoei haoen thedanga tetsida juongnyu kümasikei haoenei hao to maialem,

³⁸khoei Isaia thuseibüei laubü ngüh ho loushadla kiteikei, “Bunyubou, küneibü ngühlang aoei mailembei? Hobaje ao to Bunyubou hau tang khitkei?”

³⁹Haoenei maialemen, aishanga Isaiaei tokei lauakei,

⁴⁰“Haoei haoeneibü nyek thutiakei, hoba haoeneibü maangpon ngoutiakei. Haoei kheinyu aküm tegüje haoenei haoeneibü nyekei haplabü, haoeneibü maangponei ditenlabü, hoba sepeilabü, hoba ngei haoen maitikulabü.”

⁴¹Isaiaei ho laukei aieilausi haoei Jisu soneikangbü hapbei hoba hao shanga lauko kikei.

⁴²Khei yingasikei, leiyeibü yoan juongei hao to mailembei, lausikei sinagog ka shian sattisi amailabü dogo Farisibü to hatbü ka haoenei atheku;

⁴³aishanga haoenei Mühghaü nyensang toje müteibü nyensang bouje sanoukei.

⁴⁴Jisuei ngekkei, “Aoei kü to mailemda, kü to mailemda aying lausikei ngo hautibou to mailemda;

⁴⁵hoba ngo aoei hapda, haoei ngo hautibou hapda.

⁴⁶Ngo ngesakbü ki, hoba kü to mailembüje aokei nakthüha akilabü shanga ngo kaodak to loukei.

⁴⁷Müt atei kü ngüh ditan ajungei longa, ngei haomat ajemda; aishanga ngo kaodak matjemla aying, lausikei kaodak khümenla loukei.

⁴⁸Aoei ngo asungletlaje hoba ngeibü ngüh asungletda haoei matjembou che kia. Ngei laubü ngühlang hoei hao thonbü chaloua mat jemlabü;

⁴⁹aishanga ngei jembü hauei alau, lausikei ngo hautibou, Bouei, ngei ai laula hoba lenla kho ngühkhüm kukei.

⁵⁰Haoeibü ngühkhüm tetlabü thon akibü langkei dogo ngei ngeakei. Bouei kü to lai lautila lenkei ngei kho ong lauda.”