Read Chang Naga JOHAN 13 Bible Online

JOHAN 13 - Chang Naga bible

JOHAN 13

¹Ho Püetbü Lem thedangto kikei. Jisuei haoeibü langkei ho kaodak ka Bou jungto banglabü jih lousüha dogo ngekei. Haoei kaodaka kibü haoeibü dan to sanoukei, hoba haoei haoen thonbüa sühko sanoukei.

²Simon Iskhariot shou, Judasei hao khümbomeiko kuan aplabü dogo Sataneije janenan kiteikei. Nyak shaujinei

³Jisuei, Bouei ajanjan pendou haoeibü ikmanga kuan apa, hoba hao Mühghaü ka loukei hoba Mühghaü jungto hauda dogo ngean,

⁴nyakshaushang ka loenkei, haoeibü neisimei saüan phokei, hoba lemhamnei che sungbaan haoeibü manga shenkei;

⁵kheijinei haoei deithunga dei yeikei hoba eikshuongeibü you sakkuan, haoei shenjanga shenan kibü lem- hamneiei haman apbula khangkei.

⁶Hao Simon Peter junga sühlangkei. Peterei hao to laukei, “Bunyubou, nyi kü you sakkula kümda si?”

⁷Jisuei hao to jongaikei, “Ngei ai kümda kho nyi touje angekei; lausikei nyi haphaia ditenlabü.”

⁸Peterei hao to laukei, “Nyi kü you ladangkei asakkulabü!” Jisuei hao to jongaikei, “Ngei no asakku longa, no kü yoa ai phejan aki.”

⁹Simon Peterei hao to laukei, “Bunyubou, kü you ong ayingko kü ik si kü khukei sakbüma.”

¹⁰Jisuei hao to laukei, “Aoei mang yua, you to limanje aikei saklabü aki, lausikei hao mang khümbo saopoakei; hoba kan sao- poakei, lankei kan pendou thamje ji;”

¹¹aishanga haoei hao khümbo yaakshaulabü müt kho ngean kiteikei. Khoei haoei laukei, “Kan pendouje asaopokei.”

¹²Ladang haoei haoeneibü you sakkhümbuan haoeibü neisimei lekei hoba nyibou setkei, haoei haoen to laukei, “Ngei kan to ai kümbei kho kanei ditena lo?

¹³Kanei kü to Lenbou hoba Bunyubou dogo ngada, hoba kho kanei laujana lauda, aishanga ngo kho ki.

¹⁴Kholongaje, ngo kaneibü Bunyubou si Lenbouei kaneibü you sakkukei longa, kaneikei cheei cheeibü you sakkujan.

¹⁵Aieilausi ngei kan shanga kümbü tegü, kaneikei khei kümjan dogo ngei kan la tetsida lena.

¹⁶Maimaitham ngühmaia ngei kan to lenda, aao che kho haoeibü bunyu to yaangbou ayingsi hautibü kho hautibou to yaangbou aying.

¹⁷Kanei ho ngean kanei jungeia longa, kan olinbou.

¹⁸Ngei kan pendou shangabü alauda. Ngei ao pienkeije ngei ngeakei. Lausikei Lai ngüh ho naloushad, ‘Aoei kü shausiyung shauda haoei khü- peian kü khu limbei.’

¹⁹Ladang ho loushadlaje kheijinei kanei ngo kho hao dogo mailemtila shanga, ho ühaüthükjinei ngei kan la tou lenteida.

²⁰Maimaitham ngühmaia ngei kan la lenda, aoei ngei hautibou sungletlaje haoei ngo sungletda, hoba aoei ngo sungletda, haoei ngo hautibou sungletda.”

²¹Jisuei kho lauan phaia hao to maangto shatbü lilitham loukei hoba tang khitko laukei, “Maimaitham ngühmaia ngei kan to lenda, kan yo kabü cheei ngo khümbomeiko kuan aplabü.”

²²Eikshuongei cheei che to chühyo khüpbei, aieilausi haoei ao to laudaje haoenei ashuoken.

²³Haoeibü eikshuong yoa che, Jisuei ao to sanouda, hao kho nongyoan Jisu thena setan kiteikei.

²⁴Simon Peterei hao to nyek sheman lenko, haoei ao shangabü laudaje kho phela shanga laukei.

²⁵Aüan setbü yam, haoei Jisueibü khukua nongngailangan hao to laukei, “Bunyubou, kho ao?”

²⁶Jisuei jongaikei, “Ngei ho wentek phaua haman aola kulaje kho müt yinglabü.” Kheijinei haoei wentek che phaua haman sungenkei hoba Simon Iskhariot shou Judas la kukei.

²⁷Ladang haoei kho shaukei, Satan hao to atkei. Jisuei hao to laukei, “Nyi ai kümlaje, tongde kümashi.”

²⁸Haoei aila hao to khei laukeije khün setbü shuong aoeikei ange.

²⁹“Senei Lem shanga ai khamdaje jekashi,” ayingsi haoei “Shalebü la aicheje kujan,” dogo lauda lembo ateije dambei.

³⁰Hibü haoei wentek kho shauan phaia hao wenjung satkei. Kho nangnak kikei.

³¹Judas satan phaia Jisuei laukei, “Tou Müteibü Shou soneikanga, hoba hao to Mühghaü soneikanga,

³²Mühghaü hao to soneikanga, Mühghaüeikei hao jembü yoa soneikangtilabü, hoba haoei kho toutham kümlabü.

³³Kü shousi shuong, touje ngo kan yoa tuisho ong kilabü. ‘Kanei ngo lameilabü, hoba ngo laeto haulaje kan alouenlabü’, dogo ngei Jihudabü to laukubü tegü, toukei ngei kanlakei lenda.

³⁴Ngei kan la ngühkhüm haanbü che kuda: Kan cheei che to sanouyoashi; ngei kan to sanoubü tegü, cheei che to sanoushi.

³⁵Kan cheei che to sanoubü danko kan ngeibü eikshuong dogo pendouei ngelabü.”

³⁶Simon Peterei hao to laukei, “Bunyubou, no lato hauda?” Jisuei jongaikei, “Ngo laeto haudaje nyi tou kü phai semla athükkei, lausikei nyi phaia semenlabü.”

³⁷Peterei hao to laukei, “Bunyubou, ngei aiei ka phai tou asemenla? Ngei ka shanga kü langkei phoyokulabü.”

³⁸Jisuei jongaikei, “Nyi kü shanga kaibü langkei phokulep si? Maimaitham ngühmaia ngei kato lenda, Nyi ngo angekei dogo semnei alau shongko aunakei akoulabü.”